ەلوردا كۇنىنە وراي قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ قولداۋىمەن قازاقستان رەسپۋبليكاسىنىڭ ۇلتتىق اكادەميالىق كىتاپحاناسى, نۇر-سۇلتان قالاسى ەسىل اۋدانىنىڭ اكىمدىگى جانە «فوليانت» باسپاسى بىرلەسىپ, «Eلوردا – KitapTime» كىتاپ كورمە-جارمەڭكەسىن وتكىزدى.
كىتاپ وقۋدى قولداۋ, وقىرمانداردىڭ كىتاپ وقۋ مادەنيەتىن قالىپتاستىرۋ, ەلوردامىز تۋرالى ادەبيەتتەردى كەڭىنەن ناسيحاتتاۋ, سونداي-اق وتاندىق كىتاپ باسپالارىنىڭ جاڭا ونىمدەرىمەن تانىستىرۋ ماقساتىندا وتكىزىلگەن بۇل شارادا «فوليانت», «ەلدورادو» كىتاپ دۇكەنى, «اباي» كىتاپ ءۇيى, «الماتىكىتاپ» باسپاسى ءوز ونىمدەرىن تانىستىرسا, «Qyr balasy» قوعامدىق بىرلەستىگى جاڭا كىتاپتارىن, Akel ينتەرنەت-دۇكەنى «Qasym» سەرياسىمەن جارىق كورگەن كىتاپتارىن كورەرمەن نازارىنا ۇسىندى. سونداي-اق «Oyna» بالالىق شاق ينستيتۋتىمەن بىرلەسكەن «وقيمىز, جازامىز, سۋرەت سالامىز!» بالالاردىڭ شىعارماشىلىق ساعاتى, بالالار سۋرەتىنەن ارت-گالەرەيا, بالالارعا ارنالعان شاحمات ويىنىنان شەبەرلىك ساعاتى, «بىرگە.كز» الەۋمەتتىك قولونەر شەبەرحاناسىنىڭ شەبەرلىك سىنىبى وتكىزىلدى.
– بۇگىنگى شارا جاي عانا كورمە نەمەسە جارمەڭكە ەمەس, بۇل – رۋحاني جارمەڭكە. باس قالامىزدا اۋىل شارۋاشىلىعى, قولونەر جارمەڭكەلەرى ءجيى ءوتىپ تۇرادى. الايدا رۋحاني جارمەڭكە وتە از وتكىزىلەدى. سوندىقتان ءبىز بيىلعى بالالار جىلى مەن قالا كۇنىنە ورايلاستىرىپ, وسى شارانى ۇيىمداستىرىپ وتىرمىز. بۇل – بيىل وتكىزەمىز دەپ جوسپارلاعان جوبانىڭ باسى. بۇيىرسا, الداعى ۋاقىتتا ءتىپتى دە كولەمدەندىرىپ وتكىزەمىز. ماسەلەن, «بايتەرەك» كەشەنىنىڭ ماڭىندا ۇلكەن رۋحاني جارمەڭكە وتكىزۋدىڭ جوبا-جوسپارىن جاساپ قويدىق. مەنىڭشە, مۇنداي ءىس-شارالار باس قالادا ءجيى وتكىزىلىپ تۇرسا, وسكەلەڭ ۇرپاقتى كىتاپ وقۋعا تاربيەلەپ, رۋحاني بايلىعىمىزدى مولايتۋعا كۇش سالساق, نۇر ۇستىنە نۇر بولار ەدى, – دەدى قازاقستان رەسپۋبليكاسى ۇلتتىق اكادەميالىق كىتاپحاناسى باس ديرەكتورىنىڭ مىندەتىن اتقارۋشى نۇرجان نۇرلانۇلى.
