قالالىق №3 كوپشىلىك كىتاپحانادا «مەنىڭ العاشقى كىتابىم» اتتى تاقىرىپتا تاعىلىمدى شارا ءوتتى. وعان №40 الكەي مارعۇلان اتىنداعى ورتا مەكتەپتىڭ باستاۋىش سىنىپ وقۋشىلارى قاتىستى.
بۇگىندە «بالالار كىتاپ وقي ما؟» دەگەن ساۋال ءجيى قويىلادى. عالامتور مەن ۇيالى تەلەفوننىڭ ءداۋىرى اسپانداپ تۇرعان قازىرگى ۋاقىتتا قىزىعۋشىلىقتىڭ ازايىپ كەتكەنى جاسىرىن ەمەس. دەگەنمەن, كىتاپتىڭ قادىرى ەشقاشان كەمىمەيدى. سانالى ادام ونىمەن ماڭگى دوس بولادى. ءبىز قاتىسقان شارادا وقۋشىلاردىڭ كىتاپ وقۋعا دەگەن ىنتاسىن كورىپ, قۋانىپ قالدىق. كەش بارىسىندا بالالار وزدەرىنىڭ العاش وقىعان ەرتەگىلەرى جايىندا اڭگىمەلەپ, العان اسەرلەرىمەن ءبولىستى. كىتاپ تۋرالى ايتقان تۇلعالاردىڭ اسىل سوزدەرىن وقىدى. ماقال-ماتەل ايتۋدان جارىستى. كىتاپتىڭ قۇندىلىعىن دارىپتەيتىن شاعىن كورىنىس قويدى. ەكى توپقا ءبولىنىپ, وزدەرى وقىعان شىعارمالاردان جۇمباقتار جاسىرىپ, قىزىقتى ويىندار وينادى. كىتاپحانا ءىشىن ارالاپ, سورەدە جيناقتارى تۇرعان اقىن-جازۋشىلاردىڭ تۋىندىلارىمەن تانىستى.
«كىتاپ پەن كىتاپحانا – ەگىز ۇعىم. ءبىز – سونىڭ اراسىن جالعايتىن كوپىرمىز.
كىتاپ ءبىر وقىلىپ, ەرتەڭ ەسكەرۋسىز قالاتىن مەرزىمدىك دۇنيە ەمەس. ول – ۇرپاقتان ۇرپاققا ميراس بولاتىن رۋحاني مۇرا. سوندىقتان بالالارعا كىتاپتىڭ قاسيەتى تۋرالى تاعىلىمدى وي ايتتىق. ولاردىڭ دا پىكىرلەرىن بىلدىك. ءبىر جاعىنان, وقۋشىلاردىڭ كىتاپقا دەگەن قۇرمەتى ەرەكشە ەكەنى بايقالدى. سوعان ءتانتى بولدىم» دەدى كىتاپحانا مەڭگەرۋشىسى نۇرگۇل ءامىرجانوۆا.
مەرەي دىلداباەۆ
