استانا قالاسىنىڭ اكىمدىگى مەن «فوليانت» باسپاسىنىڭ ۇيىمداستىرۋىمەن «كورمە» ورتالىعىندا «EURASIAN BOOK FAIR-2017» اتتى ءىى ەۋرازيالىق حالىقارالىق كىتاپ كورمە-جارمەڭكەسى اشىلدى. ايتۋلى شاراعا رەسەي, قىتاي, اقش, گەرمانيا, تۇركيا, يران, ءۇندىستان سىندى الەمنىڭ 25 ەلىنەن 90 باسپا وكىلى جينالدى. ولار وقىرماندارعا 3 مىڭنان استام كىتاپ ۇسىنىپ وتىر. كورمە-جارمەڭكەنىڭ اشىلۋ سالتاناتىنا قر مەملەكەتتىك حاتشىسى گۇلشارا ابدىقالىقوۆا قاتىستى.
– الەمدىك ايتۋلى شارا «ەكسپو-2017» كورمەسىمەن تۇسپا-تۇس كەلگەن حالىقارالىق كىتاپ كورمە-جارمەڭكەسى – ەرەكشە وقيعا. باس قالامىزدا حالىقارالىق كىتاپ فورۋمىن وتكىزۋ بۇگىنگى تاڭدا مادەنيەتتىڭ, ادەبيەتتىڭ, كىتاپ شىعارۋ ءىسىنىڭ جاڭالىقتارىن تانىستىرۋدىڭ سالتاناتى عانا ەمەس, ول – بارشا كىتاپسۇيەر قاۋىمنىڭ رۋحاني مەرەكەسى. ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنداعى مىندەتتەردى ىسكە اسىرۋ تۋرالى ايتاتىن بولسام, بۇل كورمەنىڭ وزەكتىلىگى ارتا تۇسەدى. ادامزاتتى زياتكەرلىككە, ىزگىلىككە, وركەنيەتكە باستايتىن كىتاپ مەرەكەسى قۇتتى بولسىن! – دەدى گۇلشارا ابدىقالىقوۆا.
كىتاپ كورمە-جارمەڭكەسى جەكسەنبىگە دەيىن جالعاسادى. ونىڭ اياسىندا جاڭا كىتاپتاردىڭ تانىستىرىلىمى, دوڭگەلەك ۇستەل ماجىلىستەرى, وقىرماندار فورۋمى, بەلگىلى مادەنيەت قايراتكەرلەرىمەن, اقىن-جازۋشىلارمەن, عالىمدارمەن كەزدەسۋلەر, جالپى العاندا, 100-گە جۋىق مادەني-ىسكەرلىك شارالار ۇيىمداستىرىلادى. سونداي-اق, ءتۇرلى ويىندار, كونكۋرستار, شەبەرلىك ساباقتارى, ءان مەن بي سياقتى بالالارعا ارنالعان باعدارلاما دا دايىندالعان.
«ۇزدىك وقۋلىق», «ۇزدىك ولكەتانۋ باسىلىمى», «بالالار مەن جاسوسپىرىمدەرگە ارنالعان ۇزدىك باسىلىم», «كورمە-جارمەڭكەدە ۇسىنىلعان ۇزدىك ەكسپوزيتسيا», «عىلىم جانە يننوۆاتسيا», «گران-پري» سىندى التى اتالىم بويىنشا كونكۋرستار وتەدى. جەڭىمپازدار مەن جۇلدەگەرلەر مەدال, ديپلومدار جانە باعالى سىيلىقتارمەن ماراپاتتالادى.
كورمە-جارمەڭكە شەڭبەرىندە وتكەن العاشقى شارالاردىڭ لەگىن قازاق ۇلتتىق ونەر ۋنيۆەرسيتەتى «ونەرتانۋ» كافەدراسىنىڭ دوتسەنتى, كينوتانۋشى, ونەرتانۋ كانديداتى, قازاقستان كينەماتوگرافيستەر وداعىنىڭ مۇشەسى نازيرا راحمانقىزىنىڭ «قازاق كينوسى: كەشە جانە بۇگىن» اتتى كىتابىنىڭ تۇساۋكەسەرى باستادى.
تاياۋدا كورنەكتى مەملەكەت جانە قوعام قايراتكەرى, اكادەميك مىرزاتاي جولداسبەكوۆ مەرەيلى 80 جاسقا تولدى. وسىعان وراي, ونىڭ «كىسىلىك كىتابى», «دۇنيە شىركىن» (پارتيتۋرالار جيناعى) كىتاپتارى جانە جازۋشى بولات بوداۋبايدىڭ مەرەيتوي يەسى تۋرالى «تاڭعالامىن ءومىردىڭ عاجابىنا» اتتى كىتابى جارىق كوردى. كورمە-جارمەڭكەدە وسى كىتاپتار دا تانىستىرىلدى.
اقىن مارجان ەرشۋدىڭ قازاقتىڭ كۇي اناسى دينا نۇرپەيىسوۆا تۋرالى قازاق جانە تۇرىك تىلدەرىندە شىققان «دينا» اتتى كىتابىنىڭ جازىلۋىنا تۇركسوي حالىقارالىق ۇيىمىنىڭ باس حاتشىسى دۇيسەن قاسەيىنوۆ سەبەپ بولىپتى. كىتاپتىڭ ىشىنە سالىنعان كۇيتاباقتا اۆتوردىڭ «دينا» اتتى پوەماسى بار. اتالمىش شىعارما بەلگىلى ديكتور, قر ەڭبەك سىڭىرگەن ءارتىسى ساۋىق جاقانوۆانىڭ وقۋىندا بەرىلگەن. بۇل تۋىندى دينانىڭ كۇيلەرىمەن ارلەنگەن. سونداي-اق, كۇيتاباققا قازاقستاننىڭ حالىق ءارتىسى قارشىعا احمەدياروۆ پەن قر ەڭبەك سىڭىرگەن قايراتكەرى ايتقالي جايىموۆتىڭ دينا نۇرپەيىسوۆاعا ارنالعان كۇيلەرى ەنگەن.
اتاپ وتەرلىگى, بۇل تۇساۋكەسەرگە باقىت قارابالينانىڭ ۇلى – داۋرەن مەن جۇمەكەن, اقىننىڭ قىزى – توعجان, بەلگىلى تۇركىتانۋشى عالىم, مارقۇم يشتۆان قوڭىر ماندوكيدىڭ جەسىرى وڭايشا ماقسۇمقىزى قاتىستى.
ۇلتتىق ادەبيەت پەن ونەرگە ولشەۋسىز ەڭبەك سىڭىرگەن بەلگىلى جازۋشى, عالىم اقسەلەۋ سەيدىمبەكتىڭ «قازاقتىڭ اۋىزشا تاريحى» كىتابىن «فوليانت» باسپاسى قايتا باسىپ شىقتى. اقسەلەۋ مەن قويشىعارا سالعاراۇلى اينىماس دوس قانا ەمەس, عىلىمدا ۇزەڭگى قاعىستىرىپ قاتار ءجۇردى. ۇيىمداستىرۋشىلار بۇل ەكەۋىن بولمەي, جوعارىداعى ەڭبەك پەن قويشىعارا اعانىڭ «تۇركىلەر» كىتابىنىڭ تانىستىرىلىمىن بىرگە وتكىزدى.
كەشە جۇمىسى جالعاسقان كورمە-جارمەڭكە بارىسىندا تۇركى اكادەمياسى حالىقارالىق ۇيىمى شىعارعان تىلتانىمدىق زەرتتەۋلەر مەن سوزدىكتەر باعىتىنداعى ءا.ءناجىپ, ءا.قايدار, م.جولداسبەكوۆ, ءا.جۇنىسبەك سياقتى بەلگىلى عالىمداردىڭ اكادەميا تاراپىنان شىعارىلعان ەڭبەكتەردىڭ, «قازاقپارات» باسپا كومپانياسى باسقان «اقسەلەۋ سەيدىمبەك» كىتابىنىڭ, جازۋشى قاجىعالي مۇحامبەتقاليەۆكە مەملەكەتتىك سىيلىق اپەرگەن «تار كەزەڭ» رومانىنىڭ ورىس تىلىندەگى اۋدارماسىنىڭ, ت.ب. ەڭبەكتەردىڭ تۇساۋى كەسىلدى.
بۇگىن كورمە الاڭىندا بەلگىلى اقىن ۇلىقبەك ەسداۋلەتتىڭ «پەرىشتە قىز», يسپان اقىنى, اۋدارماشىسى حۋستو حورحە پادرون يسپان تىلىنە اۋدارعان «قازاق پوەزياسى انتولوگياسى» مەن وسى اۆتوردىڭ اقىن تاناكوز تولقىنقىزى قازاقشا تارجىمالاعان «توزاق شەڭبەرلەرى», اقىن داۋلەتكەرەي كاپۇلىنىڭ «تەرىسبۇراۋ» كىتاپتارى تانىستىرىلىپ, كورنەكتى جازۋشى تولەن ابدىكپەن كەزدەسۋ وتەدى.
ال ەرتەڭ بەلگىلى قالامگەر ساۋلە دوسجاننىڭ «موە چۋجوە سەردتسە» كىتابىنىڭ تۇساۋكەسەرى ءوتىپ, تۇركىتانۋشى عالىم قارجاۋباي سارتقوجاۇلىمەن جۇزدەسۋ ۇيىمداستىرىلادى. كىتاپ كورمە-جارمەڭكەسى ەكسپوزيتسياداعى كىتاپتاردىڭ استاناداعى مادەني وشاقتار مەن ءبىلىم بەرۋ مەكەمەلەرىنە سىيعا تارتۋ شاراسىمەن تۇيىندەلمەك.
امانعالي قالجانوۆ
