تاياۋدا «استانا بالەت» ساحناسىندا حورەوگراف اينۇر ابىلعازينا قويعان «تريۋمف» ديۆەرتيسمەنتىنىڭ پرەمەراسى ءوتتى. سونىمەن بىرگە كورەرمەندەر دجوردج ءبالانچيننىڭ «سەرەنادا» ءبىر اكتىلى بالەتى مەن ريكاردو امارانتەنىڭ «Diversity» بالەتىنىڭ ءۇزىندىسىن تاماشالادى.
اتاقتى كومپوزيتور پەتر چايكوۆسكيدىڭ مۋزىكاسىنا قويىلعان «تريۋمف» – اينۇر ابىلعازينانىڭ ساحنالاعان العاشقى تۋىندىسى. ەكى كەش بويى ول حورەوگراف قانا ەمەس, سوليست رەتىندە دە ونەر كورسەتتى.
«رەپەرتۋارداعى سپەكتاكلدەردىڭ دايىندىعىنا قاتىسۋ, قويىلىم جاساۋ, اراسىندا كوستيۋم ديزاينىنىڭ ماسەلەسىن تالقىلاۋ ءسال قيىنداۋ بولعانىن جاسىرا المايمىن. سوندا دا ارتىستەرمەن جۇمىس ىستەۋگە كوڭىلىم تولدى دەپ ايتا الامىن. ولارعا دا مەنىڭ قويىلىمىم ۇناعاندىعىن بايقادىم. وسىنشاما اتقارىلعان جۇمىس ءۇشىن بارىنە ايتار العىسىم شەكسىز» دەيدى اينۇر ابىلعازينا.
حورەوگرافتىڭ سوزىنە زەر سالساق, «تريۋمف» اكادەميالىق بي ءتىلىنىڭ كۇشىمەن كلاسسيكالىق بيگە جاسالعان قۇرمەت دەۋگە بولادى. ون بەس مينۋتتىق قويىلىمدا دەمەۋ مەن شىر اينالۋ سەكىلدى وتە كۇردەلى قيمىلدار كورسەتىلدى. اسىرەسە ءارتىستەر ءوز ونەرلەرى ارقىلى ءبيدىڭ كەز كەلگەن جانرىن ەركىن مەڭگەرگەنىن دالەلدەدى.
ا.سەلەزنەۆ اتىنداعى الماتى حورەوگرافيا ۋچيليششەسىنىڭ كوركەمدىك جەتەكشىسى ليۋدميلا لي جاس حورەوگراف ءوز قويىلىمىندا كلاسسيكالىق ءبيدىڭ اسقاق رۋحىن تانىتا بىلگەندىگىن ايتتى.
سونداي-اق ديريجەر ارمان ورازعاليەۆ جەتەكشىلىك ەتكەن وركەستر پەتر چايكوۆسكي, انتونيو ۆيۆالدي, ليۋدۆيگ مينكۋس, الەكساندر گلازۋنوۆ, سەرگەي راحمانينوۆ, شارل گۋنو مەن كاميل سەن-سانس سەكىلدى كورنەكتى كومپوزيتورلاردىڭ شىعارمالارىن جۇرەككە جەتكىزە ورىنداپ, كورەرمەندەردىڭ ريزاشىلىعىنا بولەندى.
