«كوكتال-1» تۇرعىن الابىنىڭ تۇرعىندارى كوپتەن بەرى ەلدى مەكەندە كۇكىرتسۋتەك شىعارىندىلارىنىڭ بەلگىلەنگەن شامادان اسىپ, اۋاعا تارالۋ ماسەلەسىن كوتەرىپ كەلە جاتىر. جاقىندا استانا قالاسى ءماسليحاتىنىڭ دەپۋتاتتارى باۋىرجان سمايىلوۆ پەن تابيعات زەينۋلقابدەن, سارىارقا اۋدانىنىڭ اكىمى باۋىرجان ەرالى, «قازگيدرومەت» كاسىپورنى مەن سەس وكىلدەرى كوكتالدىقتارمەن كەزدەسىپ, وسى ماسەلەنى تالقىلادى.
تابيعات زەينۋلقابدەن «استانا سۋ ارناسى» كاسىپورنىنىڭ باس ديرەكتورى قىزمەتىن اتقارادى. ول ەلدى مەكەندە قوسىمشا سۇزگىلەردى ورناتۋعا ۋادە بەردى. سونداي-اق الكەي مارعۇلان اتىنداعى №40 مەكتەپ-ليتسەي ماڭايىندا كۇكىرتسۋتەك شىعارىندىلارىنىڭ اۋاعا تارالۋىن ازايتاتىن كورپۋس سالىناتىن بولدى. كەزدەسۋدە قالا بيۋدجەتىنەن سۇزگىلەردى تۇراقتى اۋىستىرىپ وتىرۋعا قاراجات ءبولۋ ماسەلەسى كوتەرىلدى.
«مەن بۇل ماسەلەنى ەرەكشە باقىلاۋعا الامىن. بىراق ماعان بۇل جاعدايدا قالانىڭ وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ ۇستانىمى تۇسىنىكسىز. باسقارمانىڭ بىردە-ءبىر وكىلى كەزدەسۋگە قاتىسقان جوق. وسى باعدارلامالاردىڭ اكىمشىلەرى رەتىندە بۇل كەزدەسۋگە قاتىسۋعا مىندەتتى ەدى» دەدى باۋىرجان سمايىلوۆ.
ونىڭ ايتۋىنشا, وتكەن كوكتەمدە كوكتالدىقتارمەن ءتيىستى ماسەلە بويىنشا كەزدەسۋ ۇيىمداستىرىلىپ, وعان دەنساۋلىق ساقتاۋ ءمينيسترىنىڭ ورىنباسارى-باس مەملەكەتتىك سانيتارلىق دارىگەر ايجان ەسماعامبەتوۆا, سانيتارلىق-ەپيدەميولوگيالىق قاداعالاۋ ماماندارى, استانا قالاسى سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى سارحات بەيسەنوۆا شاقىرىلدى.
«بۇل ماسەلە تۇرعىن الاپ تۇرعىندارى ءۇشىن وتە وزەكتى. كۇكىرتسۋتەك شىعارىندىلارىنىڭ شامادان كوپ بولۋى سالدارىنان ادامداردىڭ تىنىسى تارىلادى. ولاردىڭ دەنساۋلىعى, اسىرەسە, ەگدە جاستاعى ادامدار مەن بالالار زيان شەگەدى. سوندىقتان بۇل ماسەلەنى مۇمكىندىگىنشە تەزىرەك شەشۋ قاجەت» دەدى باۋىرجان سمايىلوۆ.
سونىمەن قاتار دەپۋتاتقا «كوكتال-1» تۇرعىن الابىنىڭ جاڭا قونىس جانە تالاپكەر كوشەلەرىنىڭ تۇرعىندارى كارىز ماسەلەسىن شەشۋدى ءوتىندى. «بۇل وسى كوشەلەردىڭ تۇرعىندارى ءۇشىن وتە ماڭىزدى ماسەلە. ول مەنىڭ سايلاۋالدى باعدارلامامدا بار. سوندىقتان مەن بۇل ماسەلەنى ەرەكشە باقىلاۋدا ۇستايمىن» دەدى باۋىرجان سمايىلوۆ.
ەلدى مەكەندەگى تيتوۆ كوشەسىندە قۇرىلىس جۇمىستارى ءجۇرىپ جاتىر. بۇل قاتاردا اۋماقتى اباتتاندىرۋ اياسىندا جاياۋ جۇرگىنشىلەر جولى توسەلىپ جاتىر. الايدا تۇرعىندار جاياۋ جۇرگىنشىلەر جولىنىڭ وتە تار ەكەنىن جەتكىزدى. ال ارداگەرلەر كوشەسى اۋلالارىنداعى ويىن الاڭدارى جاڭارتۋدى قاجەت ەتەدى. سونىمەن قاتار اعاشتاردى كەسۋ جانە تۇپتەرىن قوپسىتۋ تۋرالى ماسەلەلەر دە بار.
باۋىرجان سمايىلوۆ ارىپتەسى, قالالىق ءماسليحات دەپۋتاتى التىنشاش تابۋلدينامەن بىرگە «كوكتال-2» تۇرعىن الابىنداعى «ءۇي جانىنداعى دارىگەر» جوباسى اياسىندا جۇمىس ىستەپ جاتقان ەمحاناعا دا باردى. مۇندا كوپتەگەن ادامعا قىزمەت كورسەتىلەدى ەكەن. وسىعان بايلانىستى دارىگەرلىك بولمەلەردىڭ جەتىسپەۋشىلىگى تۋىندادى.
«كوكتال-2» تۇرعىندارى دەپۋتاتتارعا قوعامدىق كولىك قاتىناسى تۋرالى دا سۇراقتاردى قويدى. اسىرەسە, قالانىڭ سول جاعالاۋىنا قاتىنايتىن باعدارلاردىڭ ازدىعىن ايتتى.
«بۇل ماسەلە قازىر پىسىقتالىپ جاتىر. قالاعا 400 جاڭا اۆتوبۋستىڭ كەلۋىنە بايلانىستى «كوكتال-2»-ءنى سول جاعالاۋمەن بايلانىستىراتىن №49 باعدار اشىلادى» دەدى باۋىرجان
سمايىلوۆ.
