بيىل ءار بالاعا مەكتەپ فورماسى مەن وقۋ قۇرالدارىن ساتىپ الۋعا بولىنەتىن ماتەريالدىق كومەك سوماسىنىڭ ەڭ تومەنگى مولشەرى – 40 567 تەڭگە بولىپ بەلگىلەندى. بۇل تۋرالى وقۋ-اعارتۋ ۆيتسە-ءمينيسترى ەدىل وسپان ءمالىم ەتتى.
«وتكەن جىلى ءبىزدىڭ مينيسترلىك كوپبالالى جانە از قامتىلعان اتا-انالاردىڭ تالاپتارىن ەسكەرە وتىرىپ, مەكتەپ قاجەتتىلىگىنە قاراجات اۋدارۋ تۋرالى ۇكىمەت قاۋلىسىنا وزگەرىس ەنگىزدى. وعان سايكەس ءار بالاعا مەكتەپ فورماسى مەن وقۋ قۇرالدارىن ساتىپ الۋعا بولىنەتىن قاراجاتتىڭ ەڭ تومەنگى مولشەرى – 40 567 تەڭگە بولىپ بەلگىلەندى. ەستەرىڭىزگە سالا كەتەيىك, بۇعان دەيىن بولىنەتىن سوما 17 مىڭنان باستالعان ەدى» دەدى ەدىل وسپان ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا.
ونىڭ ايتۋىنشا, اتا-انالارعا بالاسىنا مەكتەپ فورماسى مەن وقۋ قۇرالدارىن الۋ كەزىندە تاڭداۋ بەرىلەدى. «ەنگىزىلگەن وزگەرىستەر اتا-انالار مەن بالالارعا مەكتەپ فورماسىن, اياق كيىمدى, كەڭسە تاۋارلارىن, ءارى جەتكىزۋشىلەردى ءوز بەتىنشە تاڭداۋعا مۇمكىندىك بەرەدى. سونىمەن قاتار, اتالعان جاڭاشىلدىق بالالارعا بۇرىنعىداي ساپاسىز تاۋارلاردىڭ بەرىلۋىنە جول بەرمەيدى» دەيدى ءمينيستردىڭ ورىنباسارى.
