كۇن جىلىنىپ, جەر اياعى كەڭىگەلى بەرى ەلوردانىڭ كوممۋنالدىق سالا قىزمەتكەرلەرى جىلداعى قالىپتاسقان ءداستۇر بويىنشا اينالانى تازالاۋ جۇمىستارىنا كىرىستى. نۇر-سۇلتان قالاسىنداعى ءتورت اۋداندا دا كوشەلەردى كوگالداندىرۋ جانە سانيتارلىق تازارتۋ جۇمىستارى بەلسەندى ءجۇرىپ جاتىر.
اۋا رايىنىڭ قولايلىلىعىن پايدالانىپ, جۇيەلى سانيتارلىق تازالاۋ اياسىندا ەسىل اۋدانىنىڭ كوشەلەرىنە 198 بىرلىك تەحنيكا مەن 1002 قىزمەتكەر شىقتى. سونىمەن قاتار, الماتى اۋدانىنىڭ كوممۋنالدىق قىزمەتتەرى سانيتارلىق تازالاۋعا 110 بىرلىك تەحنيكا مەن 350 جول مامانىن جۇمىلدىردى. بايقوڭىر اۋدانىندا 271 ادام مەن 71 بىرلىك ارنايى تەحنيكا, سارىارقا اۋدانىندا 161 بىرلىك ارنايى تەحنيكا مەن 455 جۇمىسشى اۋماقتى تازالاۋعا كىرىستى.
جول قىزمەتكەرلەرى اسفالت پەن تروتۋارلاردى, ايالدامالار مەن جول بەلگىلەرىن, قورشاۋلار مەن جەراستى وتكەلدەرىن ارنايى ەرىتىندىمەن جۋىپ, كوممۋنالدىق قىزمەتكەرلەر ءتيىستى اۋماقتاردى كۇندەلىكتى تازالاۋمەن اينالىسۋدا. وسىلايشا, باس قالاداعى ساياباقتار, گۇلزارلار, الاڭدار, اۋلا ايماقتارى, ايالدامالار, قورشاۋلار جانە ت.ب. تۇستار قىستان قالعان كۇل-قوقىستان تازارتىلدى. سول سياقتى ەلوردا اۋداندارىن كوگالداندىرۋ, اعاشتاردىڭ ءتۇبىن قوپسىتۋ, وتىرعىزۋ ورىندارىن دايىنداۋ بويىنشا ۇلكەن جۇمىستار اتقارىلۋدا.
«قورشاعان ورتانىڭ تازالىعىنا جاۋاپكەرشىلىكپەن قاراۋ – ءاربىر ازاماتتىڭ باستى مىندەتى. قالانىڭ تازا, ادەمى ءارى جاسىل جەلەككە ورانىپ تۇرۋى ءاربىر ادامنىڭ سۇيىسپەنشىلىگى مەن جاناشىرلىعىن قاجەت ەتەدى. سوندىقتان تازالىق ماسەلەسى الدىڭعى ورىندا تۇرۋى كەرەك دەپ ەسەپتەيمىن. سوڭعى جىلدارى ەلوردانىڭ اۋقىمى كەڭەيىپ, كۇن ساناپ قارىشتاپ دامۋدا. بۇل رەتتە اۋدانىمىزدىڭ ءاربىر تۇرعىنى اينالامىزدىڭ كوركەيىپ, گۇلدەنۋىنە بەي-جاي قاراماي, تۇرمىستىق قالدىقتاردى كەز كەلگەن جەرگە لاقتىرماي, تازا ۇستاۋعا اتسالىسۋلارى قاجەت» دەدى سارىارقا اۋدانى اكىمى اپپاراتىنىڭ كوممۋنالدىق شارۋاشىلىق ءبولىمىنىڭ باسشىسى ت.ارينوۆ.
بۇعان دەيىن دە ايتىلعانداي, 1 مامىردان باستاپ باس قالادا سۋبۇرقاقتار ىسكە قوسىلادى. وسىعان بايلانىستى ەلوردادا سۋبۇرقاقتاردى قايتا ىسكە قوسۋ جۇمىسى دا قىزۋ جۇرگىزىلۋدە.
كوممۋنالدىق قىزمەتتەر ارنايى تەحنيكامەن جابدىقتالىپ, اسفالتتى تۇستاردى, تروتۋارلاردى, ايالدامالاردى جۋىپ, قالا اۋداندارىن تازارتۋمەن جانە كوگالداندىرۋمەن اينالىسىپ ءجۇر. يگى ءىستىڭ ناتيجەسىندە اۋداندارداعى قورشاۋلار, جەراستى وتكەلدەرى, جول بەلگىلەرى, قوقىس جاشىكتەرى دە كىردەن تازارتىلىپ, وسى جۇمىستار ءۇشىن سۋارۋ-جۋ جانە سىپىرۋ-جيناۋ ماشينالارى ىسكە قوسىلدى.
الماتى اۋدانى اكىمدىگىندەگى وندىرىستىك-تەحنيكالىق ءبولىمنىڭ باس مامانى باتىرحان جازىقباەۆتىڭ ايتۋىنشا, كوممۋنالدىق قىزمەتتەر ەكى اۋىسىمدا جۇمىس ىستەيدى, ال تازالىق جۇمىسى تاۋلىك بويى جۇرگىزىلەدى. سونداي-اق سانيتارلىق تازارتۋ جانە كوگالداندىرۋ جۇمىستارى اۋدانداردىڭ ورتالىق بولىكتەرىندە عانا ەمەس, تۇرعىن الاپتارىندا دا جۇرگىزىلىپ جاتىر.
گۇلبارشىن وكەشقىزى
