سوڭعى كۇندەرى ەلوردادا قار جاۋىپ, ەكپىندى جەل ەستى. اۋا رايىنىڭ وسىنداي قۇبىلمالى جاعدايىنا بايلانىستى استانالىقتار «كوكتەم بيىل بولا ما؟» دەگەندەي كوڭىلدە ءجۇر.
قالادا قالىڭ قارعا بايلانىستى ەسكەرتۋ جاريالانىپ, توتەنشە جاعدايلار دەپارتامەنتى شەدەل شتاب قۇردى. شۇعىل تەلەفون جەلىسى ىسكە قوسىلدى. بوران مەن كوكتايعاق سالدارىنان ەلوردا ماڭىنا قاتىنايتىن قوعامدىق كولىك قىزمەتى توقتاتىلدى. قالادان شىعاتىن بارلىق اۆتوجولدار جابىلدى. قاتتى جەل مەن جولدىڭ دۇرىس كورىنبەۋى سەبەبىنەن ەلوردا اۋەجايىنىڭ قىزمەتى دە ۋاقىتشا توقتاتىلدى. ال قالا ىشىندەگى ايالدامالاردا اۆتوبۋس كۇتىپ تۇرعان جولاۋشىلار جەتكىزۋ ءۇشىن 25 جەرگىلىكتى ۆاحتا جۇمىلدىرىلدى. اۆاريالىق-قۇتقارۋ جۇمىستارىنا, ازاماتتار مەن اۆتوكولىكتەردى ەۆاكۋاتسيالاۋدى جۇزەگە اسىراتىن ارنايى ماماندار مەن تەحنيكالار ۇيىمداستىرىلدى.
ەلوردالىق قۇتقارۋشىلار قالادا جانە قالاعا جاقىن ماڭداعى ۋچاسكەلەردە اۆاريالىق-قۇتقارۋ وپەراتسيالارىن جۇرگىزۋ كەزىندە 160 ادامدى, ونىڭ ىشىندە 52 بالانى قۇتقاردى. جول پوليتسياسى اۆتوكولىكتەردىڭ شىعىپ كەتپەۋىنە جول بەرمەۋ ءۇشىن بەكەتتەر قويدى.
بۇگىندە ەلوردانىڭ بارلىق اۋدان اكىمدىكتەرىندە قولايسىز اۋا رايى سالدارىن جويۋ جونىندەگى جەدەل شتاب كۇشەيتىلگەن رەجيمدە جۇمىسىن جالعاستىرۋدا. ءتيىستى قىزمەتتەردىڭ ءبارى تاۋلىك بويى جۇمىس ىستەيدى, بريگادالار كەزەكشىلىك ەتەدى, باعدارشامداردى, شامداردى, قورشاۋلاردى جوندەۋ, قۇلاعان اعاشتاردى شىعارۋ جانە ت.ب. جۇمىستار جۇرگىزىلۋدە.
قازىر قالادا قار كۇرەۋ جۇمىسىنا 1000-عا جۋىق ارنايى تەحنيكا مەن 1500-گە جۋىق جول جۇمىسشىسى جۇمىلدىرىلعان.
