بۇرناعى كۇنى استانا كولىك-لوگيستيكالىق ورتالىعى (كلو) ۇسىناتىن مۋلتيمودالدىق قىزمەت كورسەتۋدىڭ تولىق تسيكلى ىسكە قوسىلدى. وسىعان وراي وتكىزىلگەن ءىس-شاراعا قر ينۆەستيتسيالار جانە دامۋ ءمينيسترى اسەت يسەكەشەۆ, استانا اكىمى ادىلبەك جاقسىبەكوۆ جانە «قازاقستان تەمىرجولى» ۇك» اق پرەزيدەنتى اسقار مامين قاتىستى. قازاقستاننىڭ باس قالاسىندا ورتا ازياداعى «ا» كلاستى ءىرى كولىك-لوگيستيكا ورتالىعىنىڭ اشىلۋى ەلىمىز ومىرىندەگى ەلەۋلى وقيعا ەكەنى انىق. مۇنداي ىرگەلى نىسان الداعى ۋاقىتتا اقتوبە, پاۆلودار, الماتى, ورال, اتىراۋ, اقتاۋ, قوستاناي, سەمەي قالالارىندا سالىناتىن بولادى.
اعىمداعى جىلدىڭ اياعىنا دەيىن شىمكەنتتەگى كلو قۇرىلىسى اياقتالادى. ءسويتىپ, وبلىس ورتالىقتارىندا جۇكتەردى ساقتاۋعا, وڭدەۋگە جانە شوعىرلاندىرۋعا ارنالعان حابتار قۇرىلادى. كەلەشەكتە بۇل ايماقتىق قۇرىلىمدار مەملەكەت باسشىسى ن.ءا.نازارباەۆتىڭ «نۇرلى جول – بولاشاققا باستار جول» جولداۋىنىڭ يدەياسىنا سايكەس «ساۋلە قاعيداتى» بويىنشا استاناداعى ورتالىق حابپەن بايلانىسىپ جۇمىس ىستەمەك.
كولىك-لوگيستيكا ورتالىعى قاراعاندى-استانا رەسپۋبليكالىق ماگيسترالى بويىندا, قىرقىنشى تەمىرجول ستانتسياسىنىڭ تۇسىنداعى اينالما جولعا جاقىن ورنالاسقان.
كلو اۋماعىنداعى سالىنعان قۇرعاق قويما 29300, كليماتتىق قويما 13300, ديستريبۋتسيالىق ورتالىق 25000, كونتەينەر الاڭى 70000 شارشى مەتردى الىپ جاتىر. قويمانىڭ ارحيتەكتۋراسىنا, ارالىق ەنىنە, ساقتاۋ سورەلەرىنىڭ بيىكتىگىنە, تەمپەراتۋرالىق رەجيمىنە قويىلاتىن بارلىق تالاپتار ساقتالعان. ينفراقۇرىلىمدى اۆتوماتتاندىرۋ ۇدەرىستى ناقتى ۋاقىت رەجيمىندە قامتاماسىز ەتەدى. وزىق تەحنولوگيالاردى پايدالانۋ تاۋارلاردى تيەۋ-ءتۇسىرۋ بارىسىندا ورىندالاتىن وپەراتسيالاردىڭ جىلدامدىعىن ايتارلىقتاي ارتتىرادى, مۇندا جىلىنا 1 ملن تونناعا دەيىن جۇك وڭدەلەدى.
استاناداعى كلو تاسىمالداۋدىڭ مۋلتيمودالدىلىق تالاپتارىنا دا تولىق جاۋاپ بەرەدى: تاۋارلاردى تەمىرجول كولىگىنەن اۆتوموبيلگە ارتۋ جانە كەرىسىنشە قابىلداۋ ۇتىمدى ۇيىمداستىرىلعان. ۇزىندىعى 5 شاقىرىمدىق كىرەبەرىس تەمىر جولى تىكە قويماعا اپارادى.
كلو پايدالانۋعا بەرىلۋىنە بايلانىستى 850 جاڭا جۇمىس ورنى اشىلدى. استانالىق ورتالىقتىڭ ىسكەرلىك ارىپتەستەرى سونداي-اق, «قازاقستاننىڭ بوي كوتەرگەن بۇل ينفراقۇرىلىمى حالىقارالىق ستاندارتتارعا, ونىڭ ىشىندە مۋلتيمودالدىق قىزمەت كورسەتۋدىڭ ۇزدىك ۇلگىلەرىنە بىرتىندەپ جاقىنداپ كەلەدى, بۇل لوگيستيكا شىعىنىن ءبىرشاما ازايتادى» دەپ اتاپ كورسەتەدى.
كولىك-لوگيستيكالىق ورتالىعى ارقىلى جۇكتەردى ديستريبۋتسيالاۋ بويىنشا العاشقى وپەراتسيانىڭ باستالۋ راسىمىنە مەملەكەتتىك ورگانداردىڭ, كولىك جۇيەسىنىڭ, دەلدالدىق كومپانيالاردىڭ, قازاقستاندىق جانە شەتەلدىك ءوندىرىس ورىندارىنىڭ وكىلدەرى قاتىستى.
