جاز كەلسە استانادا كولىك سانى دا كۇرت كوبەيىپ كەتەدى. بۇل قالا تىرشىلىگىنە ايتارلىقتاي اسەر ەتەتىنى ءسوزسىز. سوندىقتان حالقىنىڭ سانى ميلليوننان اسقان قالانىڭ ىشىندەگى قوزعالىس ترافيگىن جەتىلدىرىپ وتىرۋ ەلوردا اكىمدىگى الدىنداعى وزەكتى ماسەلە بولىپ قالا بەرەدى. وسى ورايدا استانا اكىمى اسەت يسەكەشەۆ قولعا الىنىپ جاتقان شارالار جايىندا بايانداپ بەردى.
«استانا جان-جاقتى قارقىندى دامىپ كەلەدى. بۇگىنگى تاڭدا قالادا 400 مىڭنان اسا كولىك بار. بۇل جاعداي قالا ىشىندەگى قوزعالىس ترافيگىن قيىنداتا تۇسەدى. وسىنداي جاعدايدى ەسكەرە وتىرىپ, ءبىز كولىك كەشەنىن دامىتۋ باعدارلاماسىن ازىرلەدىك. ول قىسقا مەرزىمگە, ورتاشا جەدەل جانە ۇزاق مەرزىمگە ارنالعان شارالار ارقىلى جۇزەگە اسىرىلادى» دەپ اتاپ ءوتتى قالا باسشىسى.
اكىمنىڭ ايتۋىنشا, قىسقا مەرزىمگە ارنالعان شارالار اياسىندا قالاداعى قوعامدىق كولىك قۇرامى جاڭارتىلادى.
– وسىعان دەيىن ەلوردالىق اۆتوپارككە 358 اۆتوبۋس اكەلىنسە, جاقىن ارادا تاعى دا 380 جاڭا اۆتوبۋس قوسىلادى. سونداي-اق, 45 مەكتەپ اۆتوبۋستارىن الامىز, – دەپ حاباردار ەتتى استانا اكىمى. قالاداعى قوعامدىق كولىكتىڭ كىدىرىسسىز ءجۇرۋى ءۇشىن «Bus Lane» جولاقتارى دا كوبەيتىلەتىن بولادى.
– قازىرگى كەزدە قالا كوشەلەرىندە 38 شاقىرىم «Bus Lane» جولاقتارى بار. بۇگىندە تاعى دا 40 شاقىرىم قوسىلىپ جاتىر. وسىلايشا, 1 ماۋسىمعا دەيىن قالاداعى «Bus Lane» جولاقتارى 78 شاقىرىمعا جەتەدى. بۇل اۆتوبۋستار مەن رەسمي تاكسيلەردىڭ قالانىڭ نەگىزگى كوشەلەرىندە كىدىرىسسىز ءجۇرۋىن قامتاماسىز ەتەتىن بولادى. بۇل جاعداي, ارينە, جالپى كولىك يەلەرىنە قولايسىزدىق تۋعىزۋى مۇمكىن. الايدا ءبىرىنشى كەزەكتە قوعامدىق كولىكتىڭ قوزعالىسىنا باسىمدىق بەرۋدى ءجون ساناپ وتىرمىز. ەگەر جولاۋشىلار تاسىمالدايتىن اۆتوبۋستاردىڭ ءجۇرۋ ينتەرۆالى 5-10 مينۋتتان بولسا, بۇل – وتە جاقسى كورسەتكىش, – دەدى قالا اكىمى.
سونداي-اق, حالىقارالىق اۆتوبۋستاردى قابىلدايتىن ءۇش كولىك حابى انىقتالىپ وتىر. ەكى ۆوكزالعا جانە اۋەجايعا قاتىنايتىن باعدارلار كوبەيەتىن بولادى. اكىمدىك بەس مينۋت سايىن جۇرەتىن 7 شاتتل-باس باعدارلارىن دا ىسكە قوسادى.
اسەت يسەكەشەۆ, استانا قالاسىنىڭ اكىمى:
– ەكسپو-عا ەكى ميلليونداي قوناق كەلەتىنىن ەسكەرە وتىرىپ, قالاداعى كولىك قوزعالىسى وزەكتى بولا بەرەتىنىن تۇسىنەمىز. سوندىقتان دا ءبىز وسى ماسەلەنى جەڭىلدەتۋ ماقساتىندا ەكى شارا دايىنداپ, ونى ۇكىمەتتىڭ قاراۋىنا ۇسىنۋدى جوسپارلاپ وتىرمىز.
ءبىرىنشى شارا – قالا ىشىندەگى كەيبىر الدىن-الا انىقتالعان كوشەلەردە ساعات تاڭعى 6-دان تۇنگى 11-گە دەيىن جۇك تاسىمالدايتىن كولىكتەردىڭ جۇرۋىنە تىيىم سالۋ. بۇل شەكتەۋ كوممەرتسيالىق (ساۋدا) جانە قۇرىلىس نىساندارىنا قىزمەت كورسەتەتىن جۇك كولىكتەرىنە قاتىستى بولادى.
ەكىنشى شارا – جۇمىس ۋاقىتىن تيىمدىلىككە يكەمدەۋ. كۇندەلىكتى ءومىر كورسەتىپ وتىرعانداي, قالانىڭ ورتالىق كوشەلەرىندەگى كولىك كەپتەلىسى تۇرعىنداردىڭ ءبىر مەزگىلدە بالاباقشاعا, مەكتەپكە جانە جۇمىسقا باراتىن ۋاقىتتا, ياعني 8.00-دەن 8.45 ارالىعىندا ورىن الادى. وسى جاعدايعا بايلانىستى, اتاپ ايتقاندا, ءبىر مەزگىلدىك ءنوپىردى جەڭىلدەتۋ ءۇشىن ۇكىمەتكە جۇمىستىڭ باستالۋ ۋاقىتىن وزگەرتۋ جونىندە قاۋلى قابىلداۋعا ۇسىنىس جاساپ وتىرمىز. اتاپ ايتقاندا, مەكتەپتەردەگى وقۋ بۇرىنعىداي – تاڭەرتەڭ 8-دەن, مينيسترلىكتەر مەن باسقا دا ورتالىق مەملەكەتتىك ورگانداردىڭ جۇمىسىن – 8.30-دان, جوو مەن ورتا ارنايى وقۋ ورىندارىنداعى وقۋدى – 10.00-دەن, حقكو مەن بانك جۇمىستارىن دا 10.00-دەن باستاۋدى ۇسىنامىز. وسى شارالار جۇزەگە اساتىن بولسا, قالا ىشىندەگى كولىك قوزعالىسى ەداۋىر جەڭىلدەيتىن ەدى.
استانا اكىمى, سونىمەن قاتار, قالا ىشىندە بەينەباقىلاۋ كامەرالارىنىڭ جىل سوڭىنا دەيىن 10 مىڭعا دەيىن جەتكىزىلەتىنىن ايتتى. بۇل كامەرالار ءۇي اۋلالارىندا, قوعامدىق ورىنداردا جانە جول بويلارىندا ورنالاسادى. سونىمەن قاتار, ديسپەتچەرلىك ورتالىق بەينەباقىلاۋ ارقىلى ءار اۆتوبۋستىڭ قوزعالىس بارىسىن باقىلايتىن بولادى. بۇل جالپى جولاۋشىلاردىڭ قاۋىپسىزدىگىن قامتاماسىز ەتۋگە, جۇرگىزۋشىلەردىڭ ءتارتىبىن قاداعالاۋعا مۇمكىندىك بەرەدى. قالا اكىمدىگىنىڭ كولىك قوزعالىسىن جاقسارتۋعا باعىتتالعان ورتاشا جەدەل شارالارى اياسىندا كولىك ينفراقۇرىلىمى قۇرىلىسى بويىنشا بىرقاتار جوبالاردى جۇزەگە اسىرۋ كوزدەلىپ وتىر.
– ءبىز مينيسترلىكتەر ءۇيى جانە ەسكى «مەگا» ماڭايىندا بىرنەشە جول ايىرىعىن جوبالاۋدى باستادىق. سونداي-اق, جاياۋ جۇرگىنشىلەرگە ارنالعان جول ينفراقۇرىلىمىن جاقسارتۋعا دا ەرەكشە ماڭىز بەرىلمەك. بۇدان باسقا, قازىر جۇزەگە اسىرىلا باستاعان اقىلى اۆتوتۇراقتار جۇيەسىن دامىتۋ دا جالعاساتىن بولادى, – دەدى ءا.يسەكەشەۆ.
جاياۋ جۇرگىنشىلەر مەن ۆەلوسيپەدپەن جۇرۋشىلەر ايماعىن دامىتۋ دا جوسپارلانىپ وتىر.ۇزاق مەرزىمدى شارالار دا قالاداعى كولىك قوزعالىسىن جاقسارتۋدى كەڭىنەن قاراستىرادى.
قازىر كىشى اينالما جول قۇرىلىسى جۇرگىزىلىپ جاتىر. بيىل ۇلى دالا ەلى كوشەسى بويىنان جاڭا تەمىرجول ۆوكزالىنا دەيىن جەتكىزەتىن ەكى كوپىرلى جولدىڭ قۇرىلىسى باستالادى. سونىمەن قاتار, تاۋەلسىزدىك داڭعىلىنان سارايشىق كوشەسىنە كوپىر ارقىلى وتەتىن, ۇلى دالا ەلى كوشەسى مەن بەيسەكوۆا كوشەسىن جالعاستىراتىن جول قۇرىلىستارىنىڭ قۇجاتتامالارى ازىرلەنىپ جاتىر. بۇل جوبالاردىڭ جۇزەگە اسىرىلۋى ەكى جىل ۋاقىتقا ەسەپتەلگەن.
سونداي-اق, ۇزاق مەرزىمدى شارالاردىڭ قاتارىنا لرت قۇرىلىسىن دا جاتقىزۋعا بولادى. بۇل جوبا جۇزەگە اسقان جاعدايدا, قالانىڭ ءبىرقاتار اۋداندارىندا تۇراتىن جالپى كولىك يە-
لەرىنىڭ كوپشىلىگى قوعامدىق كولىكتىڭ قىزمەتىنە جۇگىنەتىنى بولجانىپ وتىر.
عالىم قوجابەكوۆ
