«ەكسپو-2017» قازاق ءۇشىن نىسانالى وقيعا ەكەنىن باسا ايتقىم كەلەدى. رەسپۋبليكانىڭ بارلىق تۇكپىرىنەن كەلىپ جاتقان جاسى دا, ۇلكەنى دە وسى وقيعاعا وراي استانانى ءبىر كورۋگە مۇمكىندىك بولعانىن قۋانا ايتىپ جاتىر. بۇل, اسىرەسە, توي-تومالاق بولماسا, اياعى كوتەرىلە قويمايتىن الىس اۋىلداردا تۇرىپ جاتقان اعايىندار ءۇشىن ۇلكەن سەرپىلىس بولدى. ايتىپ ايتپاي نە كەرەك, شاقىرساڭ كەلمەيتىن تۋعان-تۋىستاردى ەلوردا تورىندە قارسى الىپ جاتقان جايىمىز بار.
بۇلار تەك ءبىزدىڭ عانا ەمەس, استانانىڭ ەسىك كورسەتكەن ۇلى تويىنا كەلگەن قوناقتارى ەكەنىن ايتۋىمىز كەرەك. تاۋەلسىز ەلىمىز ءۇشىن نىسانالى ەلوردامىزدىڭ بارشا قازاقستاندىقتاردىڭ جۇرەگىنە وتانشىل سەزىمىن ۇيالاتاتىن كورىكتى شاھاردى ءبىر كورۋدىڭ ماڭىزدىلىعى تۇسىنىكتى.
وسىنداي سىندارلى ساتتەردە, قاراپايىم حالىقتىڭ جايىن ەسكەرمەگەن جايتتارعا توقتالعىم كەلەدى. ەستەرىڭىزدە بولار, وسىدان بىرنەشە جىل بۇرىن قوس قاباتتى سەرۋەندەۋ اۆتوبۋسى قوسىلدى. العاشقى كەزدە قالانى كولىكپەن ارالاپ, كورۋشىلەرگە تولى اۆتوبۋستىڭ سوڭعى كەزدەرى سالونى تولماي بارا جاتقانىن تالاي كورگەنبىز. وعان دا ءمان بەرمەگەن ەدىك. ەندى اۋىلدان كەلگەن اعايىنداردى الدىما سالىپ اۆتوبۋسقا مىنگىزىپ جىبەرمەك بولعانىمدا ماسەلەنىڭ ءمان-جايىنا قانىقتىم.
ەكى ساعاتتاي قالا كوشەلەرىمەن ءجۇرىپ ءوتۋ, وعان قوسىمشا گيدتىڭ قىزمەتى بار بيلەت قۇنى – ەرەسەكتەرگە 3 مىڭ, بالالارعا – 2 مىڭ تەڭگە! ارينە, الىستان ات ارىتىپ كەلگەندەر ءۇشىن بۇل – قوماقتى سوما. ەلدەن كەلگەن ءبىر ەرەسەكتىڭ ىزىندە ەرىپ كەلگەن 3-4 بالا بار. ولاردىڭ باس-باسىنا ەكى مىڭداپ تولەپ, ءبىر ساعاتتىق سەرۋەنگە جىبەرۋگە قالتا كوتەرمەيدى. الايدا بالا ءۇشىن بۇكىل استانانى كولىكتىڭ ەكىنشى قاباتىندا وتىرىپ تاماشالاپ شىعۋ وتە اسەرلى-اق.
ال قالانىڭ قوعامدىق كولىگىندە ءجۇرۋ باعاسى – بالالار ءۇشىن 40 تەڭگە.
ارينە, ارنايى شىعارىلعان اينالدىرعان ەكى دانا سەرۋەن كولىگىن قوعامدىق كولىكپەن سالىستىرۋعا بولماس. دەگەنمەن, كولىكتىڭ اتى كولىك. جانار-جاعار مايى دا ءبىر. ەندەشە, باعاسىن سونشاما اسپانداتىپ, الىستان كەلگەن اعايىنداردىڭ ارمانىنا اينالدىرۋعا نە سەبەپ بولدى؟! بۇل جەردە تەمىر تۇلپاردىڭ «تەرى» مەن استانانى العاش كورگەن بالانىڭ العان اسەرىن تارازىعا قويعاندا كوپ نارسە ايقىندالار ەدى.
مەنىڭشە, ءتيىستى ورگاندار اۆتوبۋستىڭ شىعىنىن قايتا قاراپ, ولاردىڭ حالىققا قولجەتىمدى كولىككە اينالدىرۋدىڭ امالىن جاساۋ كەرەك. ماسەلەن,«بايتەرەكتى»تاماشالاۋ قۇنى بۇرىن اسپانداپ تۇراتىن, «ەكسپو» كەزىندە 5-6 ەسە ارزانداپتى. ەسەسىنە, حالىقتىڭ قاراسى قالىڭ.
ايگۇل ۋايسوۆا
