بۇدان بىلاي قاتتى وتىن تاپشىلىعى بولمايدى. بۇل تۋرالى قر ەنەرگەتيكا ۆيتسە-ءمينيسترى باقىتجان جاقساليەۆ ەلىمىزدەگى كومىر وتىنىنىڭ ماسەلەسىنە قاتىستى جيىندا ءمالىم ەتتى.
ەنەرگەتيكا مينيسترلىگىنىڭ ءماجىلىس زالىندا باقىتجان جاقساليەۆتىڭ توراعالىق ەتۋىمەن وتكەن جيىنعا «قازاقستان تەمىر جولى» ۇك» اق وكىلدەرى مەن «شۇباركول كومىر» اق, «قاراجىرا» اق جەتەكشىلەرى جانە جەرگىلىكتى اتقارۋشى بيلىك وكىلدەرى قاتىستى. سونداي-اق, جيىن بارىسىندا الماتى قالاسى مەن الماتى, جامبىل وبلىستارىنىڭ جاۋاپتى ماماندارى ونلاين رەجيمى ارقىلى اتالمىش وڭىرلەردەگى قاتتى وتىننىڭ ماسەلەسى تۋرالى بايانداما جاسادى. ولاردىڭ باياندامالارىنا قاراعاندا, قازىرگى ۋاقىتتا ايماقتاردا وتىن تاپشىلىعى جوق. الماتى وبلىسىنا قاراستى ەسىك قالاسىنداعى كومىر ماسەلەسى تۇراقتالعان كورىنەدى. مينيسترلىكتەگىلەر الەۋمەتتىك جەلىلەردە تاراعان قاتتى وتىن توڭىرەگىندەگى تۇرعىنداردىڭ دۇرلىككەنى تۋرالى اقپاراتتار مەن بەينەجازبالار كورشى ەلدەردە تۇسىرىلگەنىن ايتادى.
– قاڭتاردىڭ قاتتى ايازىندا ەلىمىزدىڭ بىرقاتار ايماقتارىندا, اسىرەسە, وڭتۇستىك وڭىرلەردە كومىر تاپشىلىعىنىڭ بولعانى راس. بىراق قازىرگى ۋاقىتتا جاعداي رەتتەلدى. وڭتۇستىك وڭىرلەردەگى كومىر تاپشىلىعى قازىر قاتاڭ باقىلاۋدا. ەندى بۇل جونىندە ماسەلە بولمايدى, – دەگەن قر ەنەرگەتيكا ۆيتسە-ءمينيسترى باقىتجان جاقساليەۆ جۇرتشىلىقتى Whatsاpp الەۋمەتتىك جەلىسى ارقىلى تاراعان بەينەجازبالارعا, اركىمنىڭ قاۋەسەت سوزدەرىنە سەنبەۋگە شاقىردى.
«قاراجىرا» اق-تىڭ كوممەرتسيالىق اتقارۋشى ديرەكتورى اسەت سىدىقوۆ تا تىلشىلەرگە بەرگەن سۇحباتىندا وتكەن اپتاداعى ايازدى كۇندەر اتالمىش كومپانيانىڭ كومىر ءوندىرىسىن 30 پايىزعا ارتتىرعانىن اتاپ ءوتتى.
– جاڭا تەحنولوگيالاردىڭ ارقاسىندا 2017 جىلى 7 ملن توننا كومىر وندىردىك. ونىڭ الدىنداعى 6 جىل ىشىندە 6 ملن توننادان اسپاعان بولاتىنبىز. بيىل بۇل كورسەتكىشتى 8 ملن تونناعا جەتكىزسەك دەگەن جوسپارىمىز بار. سونىمەن قاتار, سىرتقا شىعاراتىن ەكسپورت كولەمىن دە ۇلعايتساق دەپ وتىرمىز. قازىردىڭ وزىندە وزبەكستان, قىرعىزستان, رەسەي, ۋكراينا, بەلارۋس مەملەكەتتەرىنە شىعاراتىن ەكسپورت كولەمى 300 مىڭ تونناعا كوبەيدى, – دەيدى ءا.سىدىقوۆ.
ايتا كەتۋ كەرەك, استانا قالاسى كاسىپكەرلىك جانە وندىرىستىك باسقارماسىنىڭ 26 قاڭتارداعى مالىمەتىنە سۇيەنسەك, ەلوردادا 60,5 ۆاگون, ياعني 4180 توننا كومىر قورى بار.
نۇرداۋلەت كاكىشەۆ
