ەلوردادا جىل سوڭىنا دەيىن 8 مىڭ ءۇي گازعا قوسىلادى. قالعان ءۇي-جايلار كوگىلدىر وتىنمەن كەلەسى جىلى قامتىلماق. ال بيىلشا گازعا قولى جەتپەگەندەر كومىر جاعا تۇرادى.
جىلدا وسى مەزگىلدە جۇرت جاپپاي سابىلىپ كومىر ىزدەپ جۇرەتىن. بيىل مۇنداي دۇربەلەڭ جوق. كوكتەم تۋا توتەننەن كەلگەن كوروناۆيرۋس ىندەتى قالاداعى اعايىننىڭ ەرتەڭ كومىر باعاسى قىمباتتاپ كەتۋى مۇمكىن دەگەن كۇدىگىن قوزدىرسا كەرەك, قىسقا ەرتە باستان قامدانىپتى. وتىنمەن جابدىقتاۋشىلار كومىر ساۋداسى جازدىڭ ورتا شەنىندە قىزۋ جۇرگەنىن ايتادى. ال قازىر قاتتى وتىنعا دەگەن سۇرانىس سايابىرسىعان. ونىڭ ۇستىنە قالا قويمالارداعى كومىر قورى بيىلعا ەمەس, كەلەسى قىسقا دا مولىنان جەتەتىندەي بولىپ ءۇيىلىپتى. سونىمەن بىرگە ەلورداعا كوگىلدىر وتىننىڭ كەلۋى كومىرگە دەگەن سۇرانىستى ەداۋىر ازايتقان.
كومىر قويماسىنىڭ مەڭگەرۋشىسى ەرلان تاجىكەنوۆ كومىر باعاسى بىلتىرعى مەجەدەن قىمباتتاعان جوق دەيدى. الدىڭعى جىلى دا وسى باعا بولعان.
– قويمادا كومىر جەتكىلىكتى. بىرنەشە ءتۇرى بار. باعاسى وسكەن جوق, بۇرىنعىسىنشا. بىراق كومىرگە دەگەن سۇرانىستىڭ كۇرت تومەندەپ كەتۋىن تەك قالاعا كوگىلدىر وتىننىڭ جەتكىزىلۋىمەن عانا بايلانىستىرماۋ كەرەك. ىندەتتىڭ كەسىرىنەن ادامداردىڭ كوبى جۇمىستارىنان ايىرىلدى. كۇنىن كورىپ, وتباسىن اسىراپ وتىرعان تابىستارى توقتادى. قالتالارىندا تام-تۇم عانا اقشالارى قالدى. كومىر ساتىپ الا الماي وتىرعان وتباسىلار قانشاما! – دەدى ول كوپشىلىك ەلدىڭ مۇشكىل جاعدايىنان حاباردار ەكەنىن ءبىلدىرىپ.
قالالىق وتىن-ەنەرگەتيكالىق رەسۋرستار ءبولىمىنىڭ باسشىسى ماقسات ەسماعۇلوۆ بيىلعى جىلى «جەلەزنودوروجنىي», «پرومىشلەننىي», «كوكتال-1» جانە «كوكتال-2» تۇرعىن الاپتارىنا گاز بەرۋ جوسپارلانىپ وتىرعانىن ايتتى:
– سونداي-اق «اگروگورودوك» تۇرعىن الابىنىڭ ءبىر بولىگى دە گازبەن قامتىلاتىن بولادى. قالادا ۇزىن-ىرعاسى 20 مىڭ ءۇيدى گازعا قوسۋ كوزدەلگەن. گازداندىرۋ جۇمىستارى كەلەسى جىلى جالعاسادى, – دەدى ءبولىم باسشىسى.
