ەلوردانىڭ ە.راحماديەۆ اتىنداعى مەملەكەتتىك اكادەميالىق فيلارمونياسى قازاق وركەسترى مەن قازاقستان كومپوزيتورلار وداعى بىرلەسىپ, «جاسا, قازاقستان!» كونتسەرتىن ۇيىمداستىردى. «استانا» كونتسەرت زالىندا وتكەن كەش تاۋەلسىزدىكتىڭ 30 جىلدىعىنا ارنالدى.
كەشتىڭ الدىندا كومپوزيتورلار وداعىنىڭ جاڭا مۇشەلەرىنە ءتيىستى كۋالىكتەرىن تاپسىرۋ ءراسىمى ءوتتى. مۇنى وداق توراعاسى سەرىكجان ءابدىنۇروۆ پەن وركەستردىڭ باس ديريجەرى-كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى, پروفەسسور ايتقالي جايىموۆ اتقاردى. قازاق وركەسترى جەتەكشىسىنىڭ يىعىنا وداق اتىنان شاپان جابىلدى.
كومپوزيتورلار وداعىنىڭ قاتارىنا جاڭادان ەل اراسىنا كەڭ تارالعان «قارىنداسىما» ءانىنىڭ اۆتورى, قازاقستاننىڭ ەڭبەك سىڭىرگەن قايراتكەرى قايرات ءجۇنىسوۆ, قازاق ۇلتتىق ونەر ۋنيۆەرسيتەتىنىڭ «حورعا ديريجەرلەۋ» كافەدراسىنىڭ مەڭگەرۋشىسى باتىرجان سماقوۆ, رەسپۋبليكالىق جانە حالىقارالىق بايقاۋلاردىڭ لاۋرەاتتارى ازىمبەك جانباەۆ, الىبەك قادىروۆ, «قورقىت» ەتنوانسامبلىنىڭ كوركەمدىك جەتەكشىسى, مادەنيەت قايراتكەرى شولپان قورعانبەك قابىلداندى.
مۋزىكالىق كەش سىدىق مۇحامەدجانوۆتىڭ «شاتتىق وتانى» شىعارماسىمەن اشىلىپ, كەنجەبەك كۇمىسبەكوۆتىڭ «ارمان», ەلوردالىق فيلارمونيا قازاق وركەسترىنىڭ ديريجەرى, كۇيشى-كومپوزيتور, مادەنيەت قايراتكەرى نۇرلان بەكەنوۆتىڭ «وراقتى باتىر» تۋىندىلارىمەن, كەنەن ازىرباەۆتىڭ ءانى, باسقا دا وتكەن جانە قازىرگى كومپوزيتورلاردىڭ شىعارمالارىمەن جالعاستى.
قازاق وركەسترىنە ايتقالي جايىموۆ, نۇرلان بەكەنوۆ, ارمان جايىم, قوناق رەتىندە شاقىرىلعان قازاقستاننىڭ ەڭبەك سىڭىرگەن قايراتكەرى ءالي الپىسباەۆ پەن ەركىن نۇرىمبەتوۆ ديريجەرلىك ەتتى. قازاقستاننىڭ ەڭبەك سىڭىرگەن ءارتىسى جەكسەمبەك نۇرجاۋوۆ پەن دارىن قۇدايبەرگەن كۇي شەرتتى. قازاقستاننىڭ ەڭبەك سىڭىرگەن قايراتكەرى بيبىگۇل جانۇزاق, حالىقارالىق بايقاۋلاردىڭ لاۋرەاتتارى التىنبەك ءابىلدا, ايدوس وڭعارباي, بيبىگۇل تىنىشتىق, التىنبەك ارىستانبەك, ايگەرىم وراز ءان سالدى.
