كەشە «استانا وپەرا» تەاترىنىڭ كامەرالىق زالىندا قازىرگى زامانعى وتاندىق مۋزىكاعا ارنالعان «تۇساۋكەسەرلەر كەشى» ءوتتى. كونتسەرت قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي «قازىرگى زامانعى كومپوزيتورلار» تسيكلى اياسىندا ۇيىمداستىرىلدى.
كورەرمەندەر كەڭەس دۇيسەكەەۆ, بالنۇر قىدىربەك, سەرىك ەركىمبەكوۆ, تولەگەن مۇحامەدجانوۆ, سەرىك ءابدىنۇروۆ سىندى تانىمال كومپوزيتورلاردىڭ جانە جاس سازگەرلەردىڭ مۋزىكاسىنا قۇلاق قۇرىشىن قاندىردى.
كەشتىڭ ءبىرىنشى بولىمىندە جەكە جانە اسپاپتىق ءانسامبلدىڭ سۇيەمەلدەۋىمەن مۋزىكالىق شىعارمالار ورىندالسا, ەكىنشى بولىمىندە قازاقستاننىڭ ەڭبەك ءسىڭىرگەن قايراتكەرى ابزال مۇحيتدينوۆ جەتەكشىلىك ەتەتىن «استانا وپەرا» تەاترىنىڭ كامەرالىق وركەسترى ونەر كورسەتتى.
– ەلىمىزدىڭ تاۋەلسىزدىگىنە بيىل 25 جىل تولىپ وتىر. وسى جىلدار ىشىندە تالاي مۋزىكالىق شىعارمالار جازىلدى. ەگەمەن ەلدىڭ شىعارماشىلىق كەڭىستىگى دە جاس بۋىن كومپوزيتورلارىمەن تولىقتى. بۇگىنگى زاماننىڭ كومپوزيتورلارى شىعارمالارىنسىز قازاقستاننىڭ مۋزىكا الەمىن ەلەستەتۋ مۇمكىن ەمەس. ءبىزدىڭ ماقساتىمىز – تانىمال كومپوزيتورلارمەن قاتار جاستارعا دا قولداۋ كورسەتۋ. جالپى جاس كومپوزيتورلاردىڭ تىرناقالدى تۋىندىلارىنىڭ «استانا وپەرا» تەاترى سىندى ۇلكەن ساحنادا ورىندالۋى ولاردىڭ شىعارماشىلىعىنا ۇلكەن مۇمكىندىك اشادى. اتالمىش كونتسەرت جاستارعا شابىت بەرىپ, شىعارماشىلىقتارىنىڭ شىڭدالۋىنا سەپ بولدى دەپ ويلايمىن, – دەگەن ديريجەر وسىنداي كونتسەرتتەر وتاندىق كومپوزيتورلىق مەكتەپتىڭ, جالپى العاندا, قازاقستاندىق مۋزىكانىڭ قاي باعىتتا دامىپ وتىرعانىن كورسەتەتىنىن جەتكىزدى.
امانعالي قالجانوۆ
