قالاىشىلىك اۆتوبۋستارداعى ەلەكتروندىق تولەم جۇيەسىنىڭ 2016 جىلدان بەرى جۇزەگە اسىرىلا باستاعانى بەلگىلى. بۇل تۇرعىدا قوعامدىق كولىكتەردە تەگىن جول جۇرۋگە جەڭىلدىگى بار جولاۋشىلار, ياعني زەينەتكەرلەر دە ارناۋلى قۇجاتتارىن «Astra plat» كارتاسىنا الماستىرۋعا ءتيىس-ءتى.
بىراق كەيبىر جەڭىلدىك يەلەرى جاڭا ءجۇيەگە باعىنعىسى كەلمەيدى. ماسەلەن, زەينەتكەرلەردىڭ كوبىسى كارتا الۋعا قۇلىقسىز بولسا, ال كارتاسى بارلاردىڭ كەيبىرى جول جۇرگەندە ونى ۆاليداتورعا وتكىزۋگە ەرىنەتىن ءتارىزدى. ال ءار ساپار سايىن كارتانى ۆاليداتورعا تيگىزۋدىڭ الداعى جىلدارى بيۋدجەتتى قالىپتاستىرۋ ءۇشىن ماڭىزى زور ەكەنىن ايتادى ماماندار. ويتكەنى جەڭىلدىكپەن جول جۇرەتىندەردىڭ شىعىنى جەرگىلىكتى بيۋدجەت ەسەبىنەن وتەلەدى. رەسمي اقپاراتقا سۇيەنسەك, جۇمىسپەن قامتۋ, ەڭبەك جانە الەۋمەتتىك قورعاۋ باسقارماسى جەڭىلدىكپەن جۇرەتىندەردىڭ شىعىنىن وتەۋ ءۇشىن تاسىمالداۋشىلارعا جىلىنا 1 ملرد 300 ملن تەڭگە بولەدى ەكەن. الايدا جەڭىلدىك يەلەرىنىڭ بارلىعىن كارتا الۋعا شاقىرعان كەيبىر كوندۋكتورلار كارتاسى جوقتارعا بۇدان بىلاي تەگىن جول ءجۇرۋ قۇقىعى بولمايتىنىن ايتىپ, جالعان اقپارات تاراتقان. سونىڭ سالدارىنان ساناۋلى كۇن ىشىندە «Astra plat» كارتاسىن الۋعا اسىققان جۇرت كاسسا الدىندا ۇزىن-سونار كەزەككە تۇرىپ, ايعاي-شۋ شىعارعان كورىنەدى. بۇل تۇرعىدا جاۋاپتى ماماندارعا حابارلاسىپ, ماسەلەنىڭ ءمان-جايىن سۇرادىق.
– نەگىزىندە قوعامدىق كولىكتەردە جەڭىلدىكپەن تەگىن جۇرەتىن جولاۋشىلاردىڭ بارلىعى «Astra plat» كارتاسىن الىپ, ونى ءار ساپار سايىن ۆاليداتورعا تيگىزىپ تۇرۋعا مىندەتتى ەكەنى راس. بىراق ولاردى كارتامەن قامتۋ ءبىر كۇندە جۇزەگە اساتىن جۇمىس ەمەس. ياعني الداعى ۋاقىتتا جەڭىلدىككە يە جولاۋشىلاردىڭ بارلىعى بىرتىندەپ ارناۋلى قۇجاتتان كارتاعا كوشۋى كەرەك. وعان دەيىن سول قۇجاتتارىمەن تەگىن جۇرۋگە قۇقىقتارى بار. ءدال قازىرگى ۋاقىتتا استانادا تىركەلگەن 114 مىڭ جەڭىلدىككە يە ازاماتتىڭ 80 مىڭىنا كارتا بەرىلگەن. ولاردىڭ قالعانى دا نەعۇرلىم جاقىن ارادا قاجەت كارتانى الىپ العاندارى دۇرىس. الايدا مىندەتتى تۇردە ەكى-ءۇش ايدىڭ ىشىندە ۇلگەرۋى كەرەك دەگەن شەكتەۋ جوق. ويتكەنى كۇنىنە تەك 800 كارتا عانا بەرىلەدى, – دەگەن «استانا LRT» جشس قوعاممەن بايلانىس دەپارتامەنتىنىڭ ديرەكتورى ناۋات ازانباەۆا, – كوندۋكتورلار اراسىندا جولاۋشىلاردان تولەم كارتاسىن تالاپ ەتىپ, كارتاسى جوقتارىنا جول اقىسىن تولەتكەندەرى دە بار ەكەن. ءبىز كوندۋكتورلارعا جەڭىلدىك كارتاسىن مىندەتتى تۇردە ۆاليداتوردان وتكىزۋ كەرەكتىگىن تاپسىرعانبىز. بىراق ولارعا باسشىلىق تاراپىنان كارتانى تالاپ ەتۋ تۋرالى تاپسىرما بەرىلگەن ەمەس, – دەيدى.
ەگەر جولاۋشىلاردان تاعى دا وسىنداي شاعىمدار تۇسەتىن بولسا, اۆتوپارك باسشىلىعى قىزمەتكەرلەرىنە تيىسىنشە شارا قولدانباق. ماسەلەن, كوندۋكتورلار سىياقىدان قاعىلۋى مۇمكىن. ال ەگەر ولاردىڭ ۇستىنەن ءۇش رەت شاعىم تۇسسە, وندا بىردەن جۇمىستان بوساتىلماق. بىراق ونداي جاعدايدىڭ ازىرگە بولماعانىن ايتادى ماماندار.
نۇرداۋلەت كاكىشەۆ
