كونە كىتاپتار كورمەسى
قر ۇلتتىق مۋزەيىندە «رۋحاني جاڭعىرۋ» باعدارلاماسى اياسىندا «كونە كىتاپتار – رۋحاني جاڭعىرۋدىڭ جارقىن جولى» اتتى كوشپەلى كورمە اشىلدى. كورمە استانا قالاسىنىڭ
20 جىلدىعىنا وراي ۇيىمداستىرىلدى.
كورمەگە وڭتۇستىك قازاقستان وبلىستىق مادەنيەت باسقارماسى تاريحي-مادەني ەتنوگرافيالىق ورتالىعىنىڭ قورىندا ساقتالعان 40-تان استام جادىگەر اكەلىندى. اتاپ ايتقاندا, تۇركىستان جەرىنە العاش يسلام ءدىنىن اكەلۋشىلەر – ىسقاق باب, ابد ال-جاليل بابتاردىڭ ءدىندى تاراتۋى تۋراسىنداعى ناسابنامالارى, احمەت ءياساۋيدىڭ شەجىرەسى جازىلعان ناسابناما, احمەت ءياساۋيدىڭ ءمورى, «ديۋاني حيكمەت», قولجازبالار, دۇعا كىتاپتار, پايعامبارلار ءومىرى تۋراسىنداعى كونە كىتاپتار, فيكح ماسەلەلەرى جايىندا جازىلعان باسىلىمدار بار.
كورمەنىڭ اشىلۋ سالتاناتىندا ءسوز العان وڭتۇستىك قازاقستان وبلىستىق تاريحي-مادەني ەتنوگرافيالىق ورتالىعىنىڭ
ديرەكتورى گۇلجانات دۇيسەنباەۆا: «ءبىز وسىعان دەيىن ەلىمىزدىڭ تۇكپىر-تۇكپىرىنە كوپتەگەن كورمەلەر اپاردىق. ەلورداعا ءبىرىنشى مارتە كەلىپ وتىرمىز. كۇللى قازاق ەلىنىڭ, استانانىڭ ماقتانىشىنا اينالعان ۇلتتىق مۋزەيدە كورمە ۇيىمداستىرا وتىرىپ, ەكى ءوڭىر اراسىنداعى مادەني بايلانىستى ارتتىرماق نيەتتەمىز» دەپ كورمە ەكسپوزيتسياسى جايىندا ايتتى.
كورمەدەگى قۇندى جادىگەرلەردىڭ ءبىرى – قوجا احمەت ياساۋي بابامىزدىڭ ءمورىنىڭ كوشىرمەسى. ءموردىڭ كوشىرمەسىن ەتنوگراف-عالىم ابۋباكىر ديۆاەۆ جاساتقان. قاق ورتاسىندا «سۇلتان قوجا احمەت ياساۋي» دەگەن جازۋ تۇر. ونىڭ استىندا «حيجرانىڭ 1212 جىلى» دەگەن بەلگى قويىلعان. اتالعان ەكى جازۋدىڭ اينالاسى ون بولىككە ءبولىنىپ, ارقايسىسىنا ادام اتتارى جازىلعان. ال ءموردىڭ جيەگىن اينالا «ەسىمدەردىڭ ەڭ ۇلىسى اللانىڭ اتىمەن, اللا بارلىعىن ءبىلۋشى ءھام كورۋشى» دەگەن جازۋ بار.
دوسجان سقاقوۆ