«ەكسپو-2017» حالىقارالىق مامانداندىرىلعان كورمەسى اياسىندا استانا قالاسىندا ەجەلدەن الۋان ءتۇرلi مادەنيەتتەر توعىسىپ, مىڭجىلدىقتار مۇراسىنىڭ كونە جۇرتى – جامبىل وبلىسى كۇندەرى وتەدى.
ەلوردالىقتار «ۇلى جىبەك جولى. كونە تارازدان اسقاق استاناعا تارتۋ» دەگەن تاقىرىپپەن تاعايىندالعان ەتنومادەني كەرۋەنىن 26 شىلدەدە «حانشاتىر» ويىن-ساۋىق ورتالىعىنىڭ «عاشىقتار» ساياباعىندا قارسى الادى. كەشكىسىن 21.30-دا ەكسپو اۋماعىنا قاراستى «امفيتەاتردا» «اۋەنى اسەم اۋليەاتا» اتتى مەرەكەلىك كونتسەرت كوپشىلىك نازارىنا ۇسىنىلادى.
27-28 شىلدە كۇندەرى «جاستار» تەاترى مەن م.گوركي اتىنداعى مەملەكەتتىك اكادەميالىق ورىس دراما تەاترندا ەلوردالىق كورەرمەندەرگە ارعىنباي بەكبوسىننىڭ «دومالاق ەنە» اتتى دراماسى جانە باسقا دا قىزىقتى كومەديالار نازارعا ۇسىنىلادى.
وسى كۇندەرى استانا قالالىق «قازانات» يپپودرومى اۋماعىنداعى ەتنواۋىلدا «جامبىلىم قانداي تاماشا», «كۇي كەرۋەنى», «دۋماندى ەلىم!» اتتى مەرەكەلىك كونتسەرتتەر وتكىزىلەدى.
اتادان بالاعا ميراس بولعان عاجاپ دۇنيەلەرىن جامبىل وبلىسىنىڭ بەلگىلى قولونەر شەبەرلەرىنىڭ كورمەسى وتەدى. سونىمەن قاتار, ەتنواۋىلدا كوكپار, اۋدارىسپاق, جامبى اتۋ, تەڭگە ءىلۋ, قازاق كۇرەسى, اسىق اتۋ, بەس تاس, الاڭداعى توعىزقۇمالاق ويىندارىنان كورسەتىلىم, قۇسبەگىلەر مەن تازى يتتەر كورمەسىن وتكىزۋ جوسپارلانۋدا.
اپتانىڭ سوڭىنا قاراي, «قازاقستان» سپورت كەشەنى الدىنداعى الاڭدا جامبىل وبلىسى تاۋار ءوندىرۋشىلەرىنىڭ كورمە-جارمەڭكەسى وتەدى. استانا قالاسىنداعى جامبىل وبلىسىنىڭ كۇندەرىن «تارازىم – تاريح اق تاڭى, استانام – ەلدىڭ ماقتانى!» اتتى وبلىس جۇلدىزدارىنىڭ قاتىسۋىمەن گالا-كونتسەرت وتەدى دەپ كۇتىلۋدە.
ايگۇل ۋايسوۆا
