كاسىپتىك-تەحنيكالىق كوللەدج ستۋدەنتتەرى ءۇشىن №3 قالالىق ەمحانانىڭ «جاس تولقىن» جاستار دەنساۋلىعى ورتالىعى سپورت جۇلدىزدارىمەن بىرگە جاتتىعۋ وتكىزدى. تاۋەلسىزدىكتىڭ 30 جىلدىعىنا وراي وتكىزىلگەن شارا اياسىندا «كوڭىلدى ستارت» جارىسى دا ۇيىمداستىرىلدى.
«№3 ەمحانا – ستۋدەنتتەرگە ارنالعان ەمدەۋ مەكەمەسى, سوندىقتان ەمحانا قىزمەتكەرلەرى قالاداعى جوو جانە كوللەدجدەرمەن تىعىز بايلانىستا وسىنداي شارالاردى ءجيى وتكىزەدى. ءبىزدىڭ باستى ماقساتىمىز – جاستاردى سپورتقا باۋلىپ, سالاۋاتتى ءومىر سالتىن ناسيحاتتاۋ» دەيدى №3 ەمحانا ديرەكتورى ساۋلە نۇراشەۆا.
تانىمال سپورتشىلار اراسىندا ەركىن كۇرەستەن سپورتشى, قازاقستاننىڭ ەڭبەك سىڭىرگەن سپورت شەبەرى گۋزەل مانيۋروۆا, اۋىر اتلەتيكادان قر سپورت شەبەرى سۆەتلانا پودوبەدوۆا, ازيا چەمپيوناتىنىڭ جۇلدەگەرى, كوركەم گيمناستيكا شەبەرى اننا اليابەۆا, تانىمال بوكسشى داۋرەن ەلەۋسىنوۆ, قر ەڭبەك سىڭىرگەن سپورت شەبەرى قانات ءابۋتاليپوۆ, قازاقستاندىق بەلگىلى اتلەت ايتىم جاقىپوۆ, سپورت شەبەرى سەرگەي تسىرۋلنيكوۆ بولدى.
«كوڭىلدى ستارت» جارىسىندا اتالعان نۇر-سۇلتان قالاسى اكىمدىگىنىڭ كاسىپتىك-تەحنيكالىق كوللەدجى ستۋدەنتتەرى 5 كومانداعا ءبولىنىپ, جىلدامدىقتى كورسەتەتىن تاپسىرمالاردى ورىندادى. اتاپ ايتقاندا, وڭ نەمەسە سول اياقپەن سەكىرۋ, فيشكالارعا قاراي جۇگىرۋ, دوپپەن سەكىرۋ, تەننيس راكەتكاسىمەن جۇگىرۋ, ۇلكەن دوپتى بەرۋ سىندى جارىس ۇيىمداستىرىلدى.
