كۇن رايىنىڭ قولايسىزدىعىنا قاراماستان, ءداستۇرلى اۋىلشارۋاشىلىق جارمەڭكەسى ءوز رەتىمەن ءوتتى. «قازاقستان» سپورت كەشەنى مەن «الاي» ساۋدا-لوگيستيكالىق ورتالىعى الدىنداعى الاڭعا وڭتۇستىك قازاقستان مەن اتىراۋ وبلىسىنىڭ تاۋار وندىرۋشىلەرى 205 توننادان استام ءونىم جەتكىزدى.
استانا قالاسى اۋىل شارۋاشىلىعى باسقارماسىنىڭ ماماندارى تاۋارلار بازارداعى باعادان 15-20 پايىزعا تومەن دەيدى. ومىردە بارلىعى سالىستىرمالى تۇردە باعالانادى عوي. جارمەڭكەگە اعىلعان جۇرت بۇل جولى دا قىمباتشىلىقتى سەزىندى. ءبىر پىكىرگە قۇلاق اسىپ كورەيىك.
– وڭىردەن كەلەتىن اۋىلشارۋاشىلىق ونىمدەرىن اسىعا كۇتەمىز. ءبىر جاعىنان قالتاداعى اقشاڭدى ۇنەمدەيسىڭ, ەكىنشى جاعىنان ەش قوسپاسىز تابيعي جەمىس-جيدەك پەن كوكونىستى ساتىپ الاسىڭ. اتىراۋدىڭ بالىعىن ىزدەپ كەلگەندەر كوپ, سازاننىڭ ءبىر كەلىسى – 450 تەڭگە, جايىن – 600, تىكەندى بالىق (كەفال) – 1100 جانە شورتان بالىق 500 تەڭگەگە ساتىلدى. باعاسى دا جاقسى, ءوزى دە ءدامدى. بىراق كەي-كەيدە تاۋارلار استانالىق بازاردان قىمباتتىراق. ماسەلەن, قايتا وڭدەلگەن بالىق ونىمدەرىن الىپ جاتقان ادام كورمەدىك, – دەدى استانالىق جاس جۇبايلار.
بۇل جولى جارمەڭكەدە 10 جۇمىرتقا 200 تەڭگەگە ساتىلدى. ال نارىقتا جۇمىرتقانىڭ 10 داناسى 280-300 تەڭگەگە دەيىن بارادى. وڭتۇستىك جەمىس-جيدەك, كوكونىس, كەپتىرىلگەن جەمىس, جاڭعاقتى كوپتەپ الىپ كەلدى. باعالارى دا كوڭىلگە قونىمدى, قالتاعا ءتيىمدى.وقىرماننىڭ ەسىنە سالا كەتەيىك, استانادا 13 مامىردان 1 قازانعا دەيىن اۋىلشارۋاشىلىق جارمەڭكەلەر اپتا سايىن وتكىزىلىپ تۇرادى. ءار سەنبى جانە جەكسەنبى كۇندەرى ايماقتاعى ساتۋشىلار «قازاقستان» سپورت كەشەنى مەن «الاي» ساۋدا-لوگيستيكالىق ورتالىعىندا ءوز تاۋارلارىن قالا تۇرعىندارى مەن قوناقتارىنا ۇسىنادى. كەلەسى جارمەڭكەدەن قاپى قالماڭىزدار!
گۇلدانا تالعاتقىزى
