كەشە پارلامەنت پالاتالارىنىڭ بىرلەسكەن وتىرىسىندا «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭى ەكىنشى وقىلىمدا ماقۇلداندى.
كونستيتۋتسياعا تۇزەتۋلەردى ەكىنشى وقىلىمعا دايىنداۋ بارىسىندا پارلامەنت دەپۋتاتتارىمەن بىرگە كونستيتۋتسيالىق كەڭەس, باس پروكۋراتۋرا, جوعارعى سوت, نوتاريالدىق پالاتالار, قۇقىق قورعاۋ ورگاندارى اكادەمياسى, كاسىپوداقتار فەدەراتسياسى, زاڭگەرلەر وداعى, ادىلەت مينيسترلىگى سوتتىق ساراپتاما ورتالىعى باسقا دا وكىلدەردىڭ قاتىسۋىمەن كەڭ كولەمدە تالقىلاندى. پىكىرلەسۋگە بىرقاتار مەملەكەتتىك ەمەس ۇيىم مۇشەلەرى دە قاتىستى. زاڭنامالىق نورمالار جانە سەنات پەن ءماجىلىس دەپۋتاتتارى ەنگىزگەن وزگەرىستەر بىرلەسكەن كوميسسيا وتىرىسىندا قارالدى. پارلامەنت پالاتالارى دەپۋتاتتارىنىڭ الدىندا بايانداما جاساعان, اتالعان زاڭ جوباسى بويىنشا قۇرىلعان بىرلەسكەن كوميسسيانىڭ توراعاسى, ءماجىلىس دەپۋتاتى نۇرلان ءابدىروۆ مەملەكەت باسشىسى ۇسىنىپ وتىرعان زاڭ جوباسى كونستيتۋتسيانىڭ 19 بابىنا 26 تۇزەتۋ ەنگىزۋدى كوزدەيتىندىگىن اتاپ ءوتتى. كونستيتۋتسيادا كوزدەلىپ وتىرعان بارلىق ۇسىنىستاردى جان-جاقتى بايانداي كەلىپ, نۇرلان ءابدىروۆ بىرلەسكەن كوميسسيانىڭ «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسىن ەكىنشى وقىلىمدا تۇتاستاي قابىلداۋدى ۇسىناتىندىعىن جەتكىزدى. ۇسىنىس پارلامەنت دەپۋتاتتارىنان ءبىراۋىزدان قولداۋ تاۋىپ, ءتيىستى قاۋلى قابىلداندى. زاڭ ودان ءارى ەلباسىنا قول قويۋعا جولداندى.
كونستيتۋتسيانىڭ 72-بابىنا سايكەس, نۇرسۇلتان نازارباەۆ اتالعان زاڭدى مەملەكەتتىڭ قىزمەت قاعيداتتارى مەن باسقارۋ نىسانىنا نەگىزدەلگەن, كونستيتۋتسيادا بەلگىلەنگەن قۇندىلىقتارعا سايكەستىگى تۇرعىسىنان قاراستىرۋ ءۇشىن كونستيتۋتسيالىق كەڭەسكە ءوتىنىش ءبىلدىردى.
