«استانالىق» بازار كاسىپكەرلەرىنە رەفەرەندۋمدا كوتەرىلەتىن كونستيتۋتسيالىق رەفورمالار ءتۇسىندىرىلدى. ءىس-شاراعا جازۋشى سادىبەك تۇگەل, «Jaqsylyq foundation Qazaqstan» قورىنىڭ باسشىسى ايگەرىم قالدىعۇلوۆا جانە باسقا دا كاسىپ يەلەرى قاتىسىپ, الداعى رەفەرەندۋم ماسەلەسىن تالقىلادى.
سادىبەك تۇگەلدىڭ ايتۋىنشا, قازىرگى تاڭدا قازاقستانعا رەفەرەندۋم وتكىزۋ قاجەت.
– 5 ماۋسىمدا بولاتىن رەفەرەندۋم حالقىمىز ءۇشىن, ونىڭ بولاشاعى ءۇشىن ماڭىزى وتە زور. دەر كەزىندە وتكىزىلىپ وتىر دەپ ەسەپتەيمىن. ويتكەنى تاۋەلسىزدىك العانىمىزعا 30 جىلدان استى. دەگەنمەن قانداي ەل بولعانىمىزدى قاڭتار وقيعاسى كورسەتتى. ەندى ءبىزدىڭ مىندەتىمىز – وسىنداي جاعدايعا جول بەرمەۋ ءۇشىن رەفورما جۇرگىزۋ. رەفەرەندۋم دەگەن – رەفورما. بۇل – زامان تالابى. اتا زاڭىمىزدىڭ 33 بابىنا 56 وزگەرىس ەنگىزىلمەك. كونستيتۋتسياعا بايلانىستى 5 باعىتى ايقىندالىپ وتىر. ءبىرىنشى, سۋپەرپرەزيدەنتتىك مودەلدەن كلاسسيكالىق پرەزيدەنتتىك مودەلگە كوشۋ. ەكىنشى, بيلىك تەتىكتەرىن وزگەرتۋ. ءۇشىنشى, پارلامەنتتىڭ ءرولىن جوعارىلاتۋ. ءتورتىنشى, حالىقتىڭ بەلسەندىلىگىن ارتتىرۋ. بەسىنشى, قاراپايىم ادامداردىڭ قۇقىعىن قورعاۋ.
«استانالىق» بازاردا ءوز ءىسىن دوڭگەلەتىپ جۇرگەن كاسىپكەر كامشات الپىسبەكوۆانىڭ ايتۋىنشا, رەفەرەندۋم ءۇشىن ازاماتتاردىڭ بەلسەندىلىگى ماڭىزدى.
– ءبىزدىڭ اۋىزبىرشىلىگىمىز بولۋ كەرەك. پرەزيدەنتتىڭ جالعىز ءوزى ەشتەڭە ىستەي المايدى. سوندىقتان ەلدەگى ساياسي جاعدايعا, رەفورمالارعا بەلسەندى اتسالىسىپ, ءوز بەلسەندىلىگىمىزدى ءبىلدىرۋىمىز قاجەت, – دەدى كاسىپ يەسى, كوپبالالى انا كامشات الپىسبەكوۆا.
