جۇيەدەگى جەمقورلىق جويىلا ما؟
2007 جىلى تاراز قالاسىنداعى اۋليە-اتا ۋنيۆەرسيتەتىن مەملەكەتتىك تىلدە ءتامامداپ, ۇستازدىق ەڭبەك جولىنا قادام باسۋعا وڭىردەگى ءبىلىم مەكەمەلەرىنە «جورىققا» شىقتىم. بىراق ۇستاز بولۋعا نيەتىم بىردەن قايتىپ قالدى. ويتكەنى ءبىلىم مەكەمەسىنە جۇمىسقا تۇرۋ ءۇشىن قاي جەرگە بارسام دا 800 اقش دوللارى قاجەت بولدى.
بۇل ماسەلەنى كەلەسى جىلعا قالدىرىپ, ءبىر جىلىمدى بوسقا وتكىزبەيىن دەپ جامبىل وبلىستىق «اق جول» گازەتى مەن «قازاقستان تاراز» تەلەارناسىندا ۋاقىتشا سپورت ءتىلشىسى قىزمەتىن اتقاردىم. ءسويتىپ, اراعا ءبىر جىل سالىپ, ءوز ماماندىعىم بويىنشا (تاريح جانە گەوگرافيا ءپانىنىڭ مۇعالىمى) تاعى جۇمىستى بەلسەنە ىزدەستىرە باستادىم. كونكۋرس, تەست ارقىلى قابىلداناتىن بولعاندا وتەتىنىمە ەش كۇماندانبادىم. سوندىقتان وسى باعىتتا قىزۋ دايىندىق جۇمىستارىن دا جۇرگىزدىم. وكىنىشكە قاراي, ەش ناتيجەسىن بەرمەدى.
تارازداعى №9 مەكتەبىنە جۇمىسقا تۇرۋعا ورتاداعى «دەلدالداردان» ۇسىنىس ءتۇستى. اۋىلداعى اكەمنىڭ «گيسسار» تۇقىمدى 10 قويىن ساتىپ, مۇعالىم بولۋعا ءبىر قادام جاسادىم. كەلىسىلگەن كۇنى اتالعان ءبىلىم ورداسىنا 10 قويدىڭ اقشاسىن قالتاما سالىپ باردىم. سويتسەم ديرەكتور ورىنباسارى «ستاۆكانى» سول كۇنى ساعات ۇشتە ورتالىق ساياباقتا بوس ورىندار جارمەڭكەسىنە الىپ كەلۋىن ءوتىندى. مەن ءدال سولاي ىستەدىم. بىراق «بوس ورىندار جارمەڭكەسىنە كەلىپ تۇرىپ, قالاي تەگىن جۇمىس تاپپايمىن؟» دەگەن وي كەلدى. اقشانى بەرۋدەن باس تارتىپ, تەگىن جۇمىسقا تۇرۋعا ءۇمىتىمدى ءۇزىپ كەلە جاتقاندا, ورىسشا «ۆ سش №35 ترەبۋەتسيا ۋچيتەل يستوري ي گەوگرافي» دەگەن جازبانى كوزىم شالىپ قالدى. نە بولسا دا وسىنى كورەيىن دەپ شەشتىم. سەبەبى سول مەكتەپ مەن تۇراتىن ءۇيدىڭ ءدال الدىندا ورنالاسقان ەدى.
№35 مەكتەپكە باردىم. ديرەكتور كابينەتىنىڭ الدىندا تولىپ تۇرعان كەزەك, وڭشەڭ جاس قىزدار ەكەن. كابينەتتەن ديرەكتور شىعىپ جالعىز ەر ازاماتتى كورىپ, مەنى كابينەتىنە شاقىردى. جۇرەك دۇرسىلدەپ, «ءبىسمىللا» دەپ كىرە كەتتىم. كىرسەم, كابينەتىندەگى قابىرعادا 2008 جىلعا جاسالعان ۇلكەن كۇنتىزبەدە ءوزىمنىڭ جانە ءۇش دوسىمنىڭ سۋرەتى ءىلىنىپ تۇر. بۇل «باۋىرساقتار» كتك (كۆن) كومانداسىنىڭ قۇرامى ەدى. ستۋدەنت كەزدە «جۇلدىز» بولعانبىز عوي. كۇنتىزبەنى جاساعان ۋنيۆەرسيتەت ءبىزدى ۇمىتپاعانىنا قۋاندىم سول ساتتە.
ديرەكتور «قاي ۋنيۆەرسيتەتتى ءبىتىردىڭ؟» دەپ سۇرادى. ەش ساسپاستان «قابىرعاداعى كۇنتىزبەدەگى ۋنيۆەرسيتەتتى» دەپپىن ونداعى ءوزىمدى كورسەتۋ ماقساتىندا… اقىرى بايقادى اۋ, «مىناۋ جىگىت سەنسىڭ بە؟» دەدى الدىمەن. سوسىن «ءبىزدىڭ مەكتەپ – ورىس مەكتەبى. ورىسشا ساباق بەرە الاسىڭ با؟» دەگەندە, تاعى ساسپاستان «ارينە, بەرەمىن» دەپ جاۋاپ بەردىم. ونداعى ويىم – قالاي بولسا دا جۇمىسقا تۇرۋ. تاعى بىرنەشە سۇراق قويىپ: «مىنا قۇجاتتاردى جيناپ كەل دە, ەرتەڭنەن باستاپ جۇمىسقا كىرىس» دەپ ايتقاندا, ءوڭىم بە, ءتۇسىم بە ەكەنىن اجىراتا الماي قالدىم. قۋانىشتان كابينەتتەن قالاي شىققانىمدى بىلمەيمىن. ويىما بىردەن قالتامداعى 10 قويدىڭ اقشاسى تۇسە قالدى. ۇيات بولماسىن دەگەن ويمەن تىم بولماسا 3 قويدىڭ اقشاسىن بەرەيىن دەپ كونۆەرتكە 300 دوللاردى سالىپ, قايتا كىردىم.
«كلارا يساققىزى, مىنا حاتتى سىزگە اتا-انامنىڭ اتىنان…» دەي بەرىپ ەدىم, «حاتتى ءوزىڭ وقى, جاڭا وقۋ جىلىنا دايىندال» دەپ شىعارىپ سالدى. «ال كەرەك بولسا, و زامان دا, بۇ زامان, مۇنداي دا عاجايىپ بولادى ەكەن عوي» دەگەن وي مازامدى الدى. قوجاعاپانوۆا كلارا يساققىزىنداي مەكتەپ ديرەكتورىن سول وڭىردە كەزدەستىرۋ وتە سيرەك ەدى.
ءبىر كۇن وتپەي باعاناعى «دەلدالدار» مەن №9 مەكتەپ ديرەكتورىنىڭ ورىنباسارى «نە بولدى؟ الىپ كەلسەيشى» دەپ مازالاپ جىبەرگەندە: «اپكە, رەنجىمەڭىز. مەن جۇمىس تاپتىم. سىزدەرگە بارمايتىن بولدىم» دەگەنىمدە, بىردەن «قانشا بەردىڭ؟» دەگەن سۇراق قويدى. تەگىن جۇمىسقا تۇرعانىمدى ايتقانىمدا ەشكىم سەنبەدى.
وڭتۇستىك ءوڭىرى عانا ەمەس, جالپى ءبىلىم وردالارىنداعى وسىنداي جيىركەنىشتى جەمقورلىق جۇيەنى قالاي جويۋعا بولاتىنى جونىندە ايتار ۇسىنىستارىڭىز بولسا, جازا وتىرىڭىزدار.
ەلجان اسىلباەۆ,
ءا.بوكەيحان اتىنداعى №76 مەكتەپ-ليتسەي
ديرەكتورىنىڭ وقۋ ءىسى جونىندەگى ورىنباسارى
