قالالىق اكىمدىكتە قالا تىرشىلىگىنە قاتىستى وتىرىس ءوتىپ, وندا جۇيەلى پروبلەمالار تالقىلاندى. جيىندا كوپبالالى انالاردىڭ جايى, قالانىڭ كوكتەمگى سۋ تاسقىنىنا دايىندىعى, سول سياقتى دارىگەرلەردىڭ جۇمىسىنا سالعىرتتىعى سەكىلدى ماڭىزدى ماسەلەلەر قوزعالدى.
قالا اكىمى باقىت سۇلتانوۆ جينالىستى كوپبالالى انالار ماسەلەسىن قاراستىرۋعا قاتىستى اكىمدىك تاراپىنان اتقارىلعان جۇيەلى ىستەردىڭ جۇزەگە اسىرىلۋ بارىسىنان باستادى.
– قازىر اۋدان اكىمدىكتەرى ءتيىستى مەكەمەلەرمەن بىرلەسىپ, قالاداعى ءورت قاۋىپسىزدىگىن كۇشەيتىپ جاتىر. بىزگە ءوزىنىڭ الەۋمەتتىك قيىن جاعدايىن ايتىپ كوپبالالى انالار حابارلاستى. ولارمەن بىرنەشە كەزدەسۋ وتكىزىپ, ءبارىنىڭ ءوتىنىش-ارىزىن قابىلدادىق. ونىڭ ەشبىرى اكىمدىك نازارىنان تىس قالمايدى, – دەدى ب.سۇلتانوۆ.
بۇعان قوسا, اكىم قالا تۇرعىندارى ءۇشىن «اشىق ەسىك» اپتالىعىن وتكىزۋدى تاپسىردى. ايتارلىعى, وتكەن اپتادا ەلورداداعى بارلىق اۋداننىڭ اكىمدەرى كوپبالالى وتباسىلارمەن كەزدەسۋ وتكىزگەن بولاتىن.
– قازىرگى كەزدە اۋدان اكىمدەرى ازاماتتاردى قابىلداپ جاتىر. بۇل جۇمىس جۇيەلى جانە تۇراقتى تۇردە جۇرگىزىلۋى ءتيىس. ءار ءوتىنىش بويىنشا ماسەلەنى شەشۋ كەرەك, – دەدى قالا اكىمى.
ءارى قاراي قالانىڭ كوكتەمگى سۋ تاسقىنىنا دايىندىعى پىسىقتالدى. اكىم 2018 جىلى 5527 سۋ باسۋ وقيعاسى تىركەلگەنىن جانە ونىڭ باسىم كوپشىلىگى بايقوڭىر اۋدانىنا تيەسىلى ەكەندىگىن ايتتى.
– كوكتەم شىعا وسى ماسەلە بويىنشا شاعىمدار تۇسەتىن بولادى. ەسىل اۋدانى اكىمدىگى «استانا تازالىق» جشس-پەن بىرلەسىپ, مايبالىق كولىنەن «نۇرا-ەسىل» ارناسىنا دەيىنگى كانالدى قاردان تازالاۋى كەرەك. ال سارىارقا مەن ەسىل اۋدانى اكىمدىگىنە ەسىل وزەنىنىڭ جاعاسىن بەكىتىپ, گاز اپپاراتۋراسى زاۋىتىنىڭ اۋدانى مەن ش.بەيسەكوۆا كوشەسى بويىنداعى كوپىردىڭ ار جاعىنداعى ساياجاي اۋماقتارىن سۋ باسۋدان قورعاۋ كەرەك. بارلىق اۋداندىق اكىمدىك پەن تجد بىرلەسىپ, سۋ باسۋ قاۋپى جوعارى 34 ۋچاسكەنى قاتاڭ باقىلاۋعا الۋدى تاپسىرامىن. وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى «سك قۇلاگەر» جشس-پەن بىرلەسىپ يلينكا تۇرعىن ءۇي ماسسيۆىندەگى بوگەتتى قوسىمشا بەكىتۋى كەرەك. كولىك جانە جول-كولىك ينفراقۇرىلىمىن دامىتۋ باسقارماسىنا سۋ تاسقىنى باستالعانعا دەيىن «نۇرلى جول» ۆوكزالى جانىنداعى جاڭا كوپىر قۇرىلىسى اۋدانىنداعى بوگەتتى بۇزۋدى تاپسىرامىن, – دەدى ب.سۇلتانوۆ.
سونىمەن قاتار, اكىم قالالىق ورتانى رەگەنەراتسيالاۋ, ستراتەگيالىق جانە بيۋدجەتتىك جوسپارلاۋ, قورشاعان ورتانى قورعاۋ جانە تابيعاتتى پايدالانۋ باسقارمالارىنىڭ باسشىلارىنا, «LRT قۇرىلىسىن سالۋ جونىندەگى ديرەكتسيا» جشس, «قازاۆتوجول» اق, «قازسۋشار» رمك, «قازگيدرومەت» رمك باسشىلىعىنا ءتيىستى تاپسىرمالار بەردى.
قالاداعى جۇيەلى ماسەلەلەر قاتارىندا دەنساۋلىق سالاسى دا بار. وسى جولى مەدقىزمەتكەرلەردىڭ دورەكى قىزمەت كورسەتۋىنە قاتىستى ماسەلە كوتەرىلدى.
– الەۋمەتتىك جەلىدە جازىپ, شۋ كوتەرمەيىنشە, دۇرىس جۇمىس ىستەي المايسىزدار ما؟ – دەدى قوعامدىق دەنساۋلىق ساقتاۋ باسقارماسىنىڭ باسشىسى قامالجان نادىروۆقا قاراتا. – جىل باسىنان بەرگى رەيتينگتە تۇسكەن شاعىمداردى نەگىزسىز دەيسىز. جەل بولماسا, ءشوپتىڭ باسى قيمىلدامايدى. تارتىپكە كەلتىرىڭىز! – دەپ توقتالدى اكىم.
بۇعان قوسا, اكىم دارىگەرلەردىڭ جالاقىسىن كوتەرۋ جايىن قوزعاپ, دامۋ ستراتەگياسىن ازىرلەۋ كەزىندە جەرگىلىكتى بيۋدجەت ەسەبىنەن بۇل ماسەلە قاراستىرىلاتىنىن جەتكىزدى.
2019 جىلدىڭ 1 اقپانىنداعى جاعداي بويىنشا قالا بيۋدجەتىنىڭ ورىندالۋى, وبەكتىلەردى قالانىڭ كوممۋنالدىق مەنشىگىنە قابىلداۋ تۋرالى قالا اكىمىنىڭ ورىنباسارى اسقار ءامرين ايتىپ بەردى. ال الەۋمەتتىك ماڭىزى بار ازىق-تۇلىك تاۋارلارىنىڭ باعالارى, SMART-سيتي جوبالارىن ىسكە اسىرۋ جانە «سەرگەك» بەينەباقىلاۋ كامەرالارىن قوسۋ بارىسى تۋرالى قالا اكىمىنىڭ ورىنباسارى ماليكا بەكتۇروۆا باياندادى.
سونداي-اق, قالا اكىمى ليفت شارۋاشىلىعى جۇمىسىنا بايلانىستى وزەكتى ماسەلەلەرگە نازار اۋداردى. «ليفتىلەردىڭ ناشار جاعدايى مەن تۇرعىنداردى ەۆاكۋاتسيالاۋ ماسەلەسىن قايتا قاراۋعا شاقىرامىن. تۇراقتى باقىلاۋدا ۇستاپ, اتقارىلعان جۇمىس جايىندا اي سايىن بايانداپ وتىرىڭىز» دەدى اكىم.
ودان ءارى ۇلەستىك قۇرىلىسقا قاتىسۋشىلاردىڭ ماسەلەلەرى جانە iKomek ورتالىعىنىڭ جۇمىسى بويىنشا بايانداما تىڭدالدى. ءورت قاۋىپسىزدىگىنىڭ ماسەلەسى قارالدى. جىل باستالعالى قالا تۇرعىندارىنان كوپ قاباتتى تۇرعىن ءۇيلەر مەن ادامدار كوپ جينالاتىن ورىندارداعى ءورت قاۋىپسىزدىگىن تەكسەرۋ بويىنشا 31 ءوتىنىش تۇسكەن. بارلىق سۇراق بويىنشا تجد تاراپىنان «وسى ءوتىنىش بويىنشا استانا قالاسى توتەنشە جاعدايلار دەپارتامەنتىنە حات جازىڭىز» دەگەن جەلەۋمەن جابىلعان.
– وسى شارا جەدەل ارەكەت ەتۋگە كەدەرگى كەلتىرىپ, جۇرتتىڭ قاۋىپسىزدىگىنە قاۋىپ تۋدىرۋدا. مۇنداي ارەكەتتەردىڭ ناتيجەسىن كورىپ ءجۇرمىز, – دەپ اتاپ ءوتتى اكىم تجد-ءنىڭ باسشىسىنا قاراتا. – سىزدەر ارىز تۇسكەن مەكەنجايعا بارىپ جازباشا ءوتىنىشىن سول جەردەن جازعىزىپ الا الاسىزدار عوي. قوسىمشا ماسەلەلەر تۋدىرماي, بىردەن اتقارىپ تاستاۋعا بولادى عوي. توتەنشە جاعدايلار دەپارتامەنتىنە iKomek ورتالىعى ارقىلى ءورت قاۋىپسىزدىگىنە بايلانىستى تۇسەتىن وتىنىشتەردى قاراۋ, ورىنداۋ ءتاسىلىن قايتا تالقىلاۋدى تاپسىرامىن, – دەدى اكىم.
بۇدان ءارى 2017-2019 جىلدارعا ارنالعان «نۇرلى جول» جانە «نۇرلى جەر» مەملەكەتتىك باعدارلاماسىنىڭ ينفراقۇرىلىمدىق دامۋى, اۋلالاردىڭ اباتتاندىرىلۋى مەن قاۋىپسىزدىگىن جۇزەگە اسىرۋ بارىسى قارالدى. وتىرىس قورىتىندىسى بويىنشا قالا اكىمى ءتيىستى قۇرىلىمدارعا ناقتى تاپسىرمالار بەردى.
