ەلوردادا الەۋمەتتىك از قامتىلعان وتباسى بالالارىنا ارنالعان ءۇشىنشى Bilim all ورتالىعى اشىلدى. دەمەۋشىلەردىڭ قولداۋىمەن اشىلىپ جاتقان قوسىمشا ءبىلىم بەرۋ ورتالىقتارى اسىرەسە كوپبالالى وتباسىلار, مۇمكىندىگى شەكتەۋلى جانە تولىق ەمەس وتباسىلاردىڭ بالالارى ءۇشىن وتە ءتيىمدى بولىپ تۇر.
Strong Mothers Ns قوعامدىق قورىنىڭ باستاماسىمەن ەسىل اۋدانىندا اشىلعان Bilim all وقۋ ورتالىعىندا بالالارعا اعىلشىن تىلىنەن قوسىمشا ءبىلىم الۋعا جاعداي جاسالعان. ورتالىقتا تەگىن ءبىلىم الۋ ءۇشىن وسىنداعى اقىلى جۇمىس ىستەيتىن دومبىرا, روبوتوتەحنيكا, شاحمات, شىعارماشىلىق شەبەرحانا, گيتارا, اكتەرلىك شەبەرلىك, ۆوكال جانە فورتەپيانو ۇيىرمەلەرىنىڭ بىرىنە ارنايى باعامەن جازىلۋ قاجەت بولادى. توپتاردا 5-8 بالادان وقيدى, ءار ۇيىرمەنىڭ ءوز جۇمىس كەستەسى بار. وسىعان دەيىن وسىنداي ورتالىقتار سارىارقا جانە بايقوڭىر اۋداندارىندا اشىلعان.
«Bilim all ءبىلىم بەرۋ ورتالىقتارىن نۇر-سۇلتان قالاسى اكىمدىگىنىڭ جانە دەمەۋشىلەردىڭ قولداۋىمەن حالىقتىڭ الەۋمەتتىك وسال توپتارىنان شىققان ادامدار, كوپبالالى انالار اشقانى قۋانتادى. بۇل حالىقتىڭ الەۋمەتتىك وسال توپتارىنىڭ وكىلدەرى ءوز بيزنەسىن دامىتا الاتىندىعىن دالەلدەيدى. بۇل جەردە حالىق ءۇشىن ەڭ باستىسى قولجەتىمدىلىك بار» دەدى ورتالىقتىڭ اشىلۋىنا قاتىسقان نۇر-سۇلتان قالاسى اكىمىنىڭ كەڭەسشىسى قۋانىش مولدابەك.
Strong Mothers Ns قوعامدىق قورىنىڭ باسشىسى ءارى الەۋمەتتىك كاسىپكەر رايگۇل سەرىكباەۆانىڭ ايتۋىنشا, ورتالىقتار جەلىسىن اشۋعا كوپبالالى انا بولعانى ءارى ءوزىنىڭ تاجىريبەسى اسەر ەتكەن.
«مەن اعىلشىن ءتىلىنىڭ ۇستازىمىن جانە سەرىكتەستەرىم دە مۇعالىم, سوندىقتان ءبىز بىرگە Bilim all جوباسىن اشۋدى ۇيعاردىق. مەن انا رەتىندە بالالارىمدى وقىتۋدا قيىندىقتارعا تاپ بولدىم: ءبارى قىمبات جانە الىس. كوپبالالى وتباسىلاردان شىققان بالالاردىڭ قولجەتىمدى قوسىمشا ءبىلىم الۋىنا مۇمكىندىگى جوق. مۇنداي بالالارعا كومەكتەسۋ مەنىڭ ارمانىم بولدى. حالىقتىڭ الەۋمەتتىك وسال توپتارىنا: كوپبالالى وتباسىلاردان شىققان بالالار, مۇگەدەكتىگى بار جانە تولىق ەمەس وتباسىلاردان شىققان بالالار جاتادى» دەدى قوعامدىق قور باسشىسى.
ەستەرىڭىزگە سالا كەتەيىك, 2020 جىلدىڭ باسىنان باستاپ نۇر-سۇلتاندا اكىمدىكتىڭ قولداۋىمەن ءتۇرلى توپتاردىڭ باستاماسىمەن اشىلعان 10-عا جۋىق ورتالىق جۇمىس ىستەي باستادى. ولار حالىقتىڭ الەۋمەتتىك وسال توپتارىنا ارنالعان. بۇگىندە ولار ءساتتى جۇمىس ىستەپ, ءحاوت ساناتىنداعى ازاماتتارعا قولداۋ كورسەتۋدە. ولاردىڭ قاتارىندا «Strong Mothers» ءبىلىم بەرۋ ورتالىعى, «التىن شاڭىراق ۇياسى» كيىم تىگۋ تسەحى, «باقىتتى شاڭىراق» قىزمەت كورسەتۋ بويىنشا كوپسالالى ورتالىق بار.
سونىمەن قاتار قالا تۇرعىندارىنا ىڭعايلى بولۋ ءۇشىن نۇر-سۇلتاندا تۇرعىن ءۇي سالاسىندا قىزمەت كورسەتەتىن بىرىڭعاي ورتالىق جۇمىس ىستەيدى, وندا تۇرعىن ءۇي ماسەلەلەرى بويىنشا كەڭەس الۋعا بولادى. وسىلايشا مۇندا تۇرعىن ءۇي كەزەگىنە قالاي تۇرۋعا بولاتىنىن, تۇرعىن ءۇي كەزەگىنىڭ ءنومىرىن قالاي تەكسەرۋگە بولاتىنى, تۇرعىن ءۇي باعدارلامالارىنا كىم جانە قانداي پارامەترلەر بويىنشا قاتىسا الاتىنى, تۇرعىن ءۇي سەرتيفيكاتىن قالاي الۋعا بولاتىنى, كرەديتتىك/جالعا بەرىلەتىن پاتەرلەردى الۋ جانە باسقا دا ماسەلەلەر بويىنشا جۇگىنۋگە بولادى.
مۇنداي ورتالىقتار جۇمىستى جۇيەلەندىرۋگە جانە «ءبىر تەرەزە» قاعيداتى بويىنشا قىزمەت كورسەتۋگە مۇمكىندىك بەرەدى. 2019 جىلى ەلوردادا «جانۇيا» وتباسى ينستيتۋتىن قولداۋ ورتالىعى اشىلدى, وندا ماماندار ازاماتتارعا الەۋمەتتىك ماسەلەلەر بويىنشا كەڭەس بەرەدى. سونداي-اق جاستاردىڭ ماسەلەلەرىن شەشۋگە كومەكتەسۋ ءۇشىن قالادا جاستارعا قىزمەت كورسەتۋ ورتالىقتارى جۇمىس ىستەيدى.
