ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جانىنداعى كوپىر استىندا جاڭا قوعامدىق كەڭىستىك پايدا بولادى. وندا ستريتبول, كونكي, ۇستەل تەننيسى جانە جاتتىعۋ الاڭدارى بولادى.
سونىمەن قاتار «ارقار» كوپىرىنىڭ استىنداعى اۋماقتا دەمالىس الاڭى كەڭەيتىلىپ, ولار جاڭا گراففيتيمەن تولىقتىرىلدى. سپورتتىڭ بەلسەندى تۇرىنە ارنالعان الاڭ گەننادي گولوۆكين بەينەلەنگەن مۋرالمەن بەزەندىرىلەدى. ول كوشە فيتنەسى جابدىقتارىمەن, workout الاڭىمەن, گانتەلدەرمەن, شتانگالارمەن جانە ت.ب. جابدىقتالادى. جاقىن جەردە بالالارعا ارنالعان الاڭ بولادى. بۇل ونەر تۋىندىلارىن ەلىمىزدىڭ ءار قالاسىنان كەلگەن قىلقالام شەبەرلەرى سالدى. سونداي-اق «ارقار» كوپىرىنىڭ استىنداعى كەڭىستىك ترياتلون جانە پرەزيدەنت ساياباقتارىن بىرىكتىردى.
بۇگىندە ەلوردا اكىمدىگى شاھار تۇرعىندارىنىڭ دەمالىسى ءۇشىن جايلى جاعداي جاساۋعا ەرەكشە كوڭىل ءبولىپ, بۇرىن بوس جاتقان جەرلەر اۋلالىق الاڭدارمەن, شاعىن ساياباقتارمەن جانە جەلەكجولدارمەن كوركەيتىلدى. ماسەلەن, بۇعان دەيىن شاكارىم قۇدايبەردىۇلى داڭعىلى, 17/6 مەكەنجايىنداعى بوس جاتقان ايماق اباتتاندىرىلىپ, فۋتبول الاڭى سالىندى. اۆتوتۇراق ماسەلەسى دە وڭ شەشىلدى. 
