«قازاقستان» ۇلتتىق ارناسىنان 12 قىركۇيەكتەن باستاپ ءار دۇيسەنبى-بەيسەنبى ارالىعىندا «ايمان-شولپان» تەلەحيكاياسى كورسەتىلۋدە. 100 بولىمنەن تۇراتىن فيلم دۇنيە ەسىگىن اشقان ساتتەن ءومىر جولدارى ەكى ايرىلعان, الەۋمەتتىك جاعدايى ەكى ءتۇرلى وتباسىندا تاربيە العان ەگىز قىزدار ايمان مەن شولپان تاعدىرى تۋرالى باياندايدى.
وقيعا جەلىسىنە باس كەيىپكەرلەردىڭ قوعامدا الاتىن ورنى, ومىرگە دەگەن ءارتۇرلى, ءتىپتى قاراما-قايشى كوزقاراسى مەن وي-تۇيسىگى ارقاۋ بولعان. ءسويتىپ, ەكى وتباسىنداعى ءتۇرلى ۋاقيعالار شيەلەنىسى ەلىمىزدەگى وتباسى ينستيتۋتىن جانە وتباسى قۇندىلىقتارىن نىعايتۋعا جەتەلەپ, قوعامنىڭ ءتۇرلى الەۋمەتتىك توبى اراسىندا ءوزارا سىيلاستىق پەن ءوزارا تۇسىنۋشىلىك يدەياسىن ناسيحاتتايدى.
«كەيىپكەرلەردىڭ اتى نەگە ايمان مەن شولپان؟ بۇل – كىمنىڭ بولسىن ەسىندە ساقتالاتىن ەسىمدەر. ال قازاق حالقىنا تىپتەن جاقىن. ءاربىر قازاقتىلدى كورەرمەن, قازاقتىڭ تابيعاتىن تۇسىنەتىن ادام ءۇشىن بۇل ەسىمدەر وتە تانىس. سوندىقتان فيلم تاقىرىبى بەكەر تاڭدالمادى» دەيدى «قازاقستان» رترك» اق باسقارما ءتورايىمى نۇرجان مۇحامەدجانوۆا.
تەلەحيكايادا باستى رولدە ايمان مەن شولپان بەينەلەرىندە اكتريسا سالتانات باقاەۆا كورىنەدى. «فيلم ءتۇسىرىلىمىنىڭ الدىندا ءبىزدى ەكى ۇلكەن ماسەلە ويلاندىردى. باس كەيىپكەرلەردىڭ رولىنە ەگىز قىزداردى الايىق پا, الدە قوس رولگە ءبىر اكتريسانى تاڭدايىق پا دەپ باس قاتىردىق. ءتىپتى داۋلاسۋعا دەيىن باردىق. ايتىلعان پىكىرلەردى ەسكەرىپ, ەگىز قىزداردىڭ اراسىندا 80 جۇپقا ءرول ويناتىپ كوردىك. الايدا ەشقايسىسى كوڭىلىمىزدەن شىقپادى. سودان كەيىن اكتريسالاردىڭ اراسىندا كاستينگ جاريالادىق. سولاردىڭ ىشىندە سالتاناتتىڭ ويىنى تالعامىمىزعا ساي كەلدى. ءبىر-بىرىنە كەرەعار رولدەردى ول تاماشا الىپ شىقتى. ءتۇسىرۋ جۇمىستارىن قىسقا مەرزىمدە – ءتورت اي ىشىندە اياقتادىق. بىراق بۇل جايت ساپاعا اسەر ەتپەدى دەپ ويلايمىن» دەيدى ءفيلمنىڭ پروديۋسەرى رۋستام ازاماتوۆ.
سالتانات باقاەۆانىڭ ءوزى دە تۇسىرىلىمنەن العان اسەرىمەن ءبولىستى. «بۇل مەن ءۇشىن ۇلكەن جوبا بولدى. وسىنداي فيلمدە باستى ءرولدى سومداۋ ءبىرىنشى رەت ەنشىمە ءتيدى. تەلەحيكايا ارقىلى ءوزىمدى ەكى قىرىنان دا تانىتۋعا مۇمكىندىك الدىم. فيلم بۇگىنگى كۇندەگى وزەكتى ماسەلەلەردى تەرەڭنەن قوزعايدى. قازىر قوعامدا سابيلەردى پەرزەنتحانادان شىعارماي اۋىستىرىپ جىبەرۋ نەمەسە ساتۋ جاعدايلارى ءجيى ورىن الاتىن بولىپتى. تەلەحيكايا سول اششى شىندىقتى اشكەرەلەيدى» دەيدى اكتريسا.
نۇرجان مۇحامەدجانوۆانىڭ ايتۋىنشا, جاڭا تەلەۆيزيالىق ماۋسىمدا تەلەارنا كورەرمەندەرىنە وتاندىق 8 جاڭا تەلەحيكايا, جالپى العاندا, 200 بولىمنەن تۇراتىن كونتەنت ۇسىنىلادى. ولاردىڭ اراسىندا قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالاتىن «شەكارا شەبىندە» ءفيلمى, «ىڭكار جۇرەك» تەلەحيكاياسىنىڭ جالعاسى, «سۇيە بىلسەڭ» اتتى جاستارعا ارنالعان سەريال, الماتىنىڭ سيمۆولىنا اينالعان اپورت الماسىن ناسيحاتتايتىن «قىزىل الما» تەلەحيكاياسى, ت.ب. جوبالار بار.
امانعالي قالجانوۆ
