قازاقستان گيننەسىنىڭ رەكوردتار كىتابىنا ەنگەن ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ «قورقىت» ەتنو-ءانسامبلى 28 ماۋسىم كۇنى كومپوزيتور ەرمۇرات ۇسەنوۆتىڭ 70 جىلدىق مەرەيتويىنا ارنالعان كەش وتكىزدى.
«قورقىت» ەتنو-ءانسامبلى جانە جەكە ورىنداۋشىلار 28 ماۋسىم كۇنى قازاقستان رەسپۋبليكاسىنىڭ ەڭبەك سىڭىرگەن قايراتكەرى, كورنەكتى دومبىراشى, كومپوزيتور جانە پروفەسسور ەرمۇرات ۇسەنوۆتىڭ شىعارماشىلىعىنا ارنالعان «ءومىر داستان» كونتسەرتىن ۇسىندى. مۋزىكا اۋەسقويلارى اتى اڭىزعا اينالعان اۆتوردىڭ شىعارمالارىن, ونىڭ ىشىندە «قازاقتىڭ 1000 كۇيى» انتولوگياسىنا ەنگەن كۇيلەرىن تىڭداۋعا تاماشا مۇمكىندىك الدى. كونتسەرتكە ەرمۇرات ۇسەنوۆتىڭ ءوزى قاتىستى.
«ءومىر داستان» كونتسەرتىندە ەرمۇرات ۇسەنوۆتىڭ ۇزدىك شىعارمالارىن قازاقستان رەسپۋبليكاسىنىڭ ەڭبەك سىڭىرگەن قايراتكەرلەرى گۇلميرا سارينا, ارايلىم راقىم جانە ت.ب. ورىندادى. كورەرمەندەر جەكە ورىنداۋشىلاردى دا, «قورقىت» ەتنو-ءانسامبلىنىڭ ارتىستەرىن دە ىستىق ىقىلاسپەن قارسى الدى. ۇجىمدا ءاربىر مۋزىكانتتىڭ ءبىر ەمەس, بىرنەشە اسپاپتى مەڭگەرگەنىن اتاپ ءوتۋ كەرەك. وسىنداي امبەباپتىلىق ارقاسىندا ەتنو-انسامبل حالىق مۋزىكاسىن كەز كەلگەن قۇراممەن ورىنداي الادى. ال ساحناداعى مۋلتياسپاپشىلاردىڭ شەبەرلىگىن كورگەن كورەرمەندەر جىلى لەبىزدەرىن ءبىلدىردى. كونتسەرت كورەرمەندەردىڭ ۇلكەن قىزىعۋشىلىعىن تۋدىردى.
«قورقىتتىڭ» كوركەمدىك جەتەكشىسى, مادەنيەت قايراتكەرى شولپان قورعانبەكتىڭ ايتۋىنشا, «ەرمۇرات ۇسەنوۆتىڭ شىعارماشىلىعى تانىمال, ونىڭ شىعارمالارى حالىقتىڭ سۇيىسپەنشىلىگىنە بولەنگەن جانە ەرەكشە اسەر قالدىرادى. كونتسەرت تىڭداۋشىلارى اراسىندا جاستار دا بولدى, ەرمۇرات ۇسەنوۆتىڭ شىعارمالارى جاڭا بۋىنعا دا ۇنايدى».
ەرمۇرات ۇسەنوۆ – قازاقستاندىق مۋزىكا ونەرىندەگى اتى اڭىزعا اينالعان كوپ قىرلى تۇلعا. ونىڭ شىعارماشىلىق قازىناسىنان ءارتۇرلى كورنەكتى ورىنداۋشىلار ۇلكەن شابىت الادى.
