«ەكسپو-2017» حالىقارالىق مامانداندىرىلعان كورمە قارساڭىندا قابانباي باتىر داڭعىلىندا ۇزىندىعى 3 شاقىرىمدى قۇرايتىن BUS LANE – اۆتوبۋستارعا ارنالعان جولاقتار ەنگىزىلدى. بۇل جوبانى جۇزەگە اسىرعان «استانا LRT» جشس ماماندارى قوعامدىق كولىكپەن كورمەنى كورۋگە باراتىن قالا تۇرعىندارى مەن قوناقتارى سول ارقىلى ەكسپو قالاشىعىنا كەپتەلىسسىز جىلدام جەتەدى دەپ وتىر.
استانادا فۋتبولدان ماڭىزدى حالىقارالىق ويىندار وتكەندە «ازيا پارك» ساۋدا-ويىن ساۋىق ورتالىعىنان ءارى قاراي كەپتەلىس ورىن الاتىنىن ءسوز رەتى كەلگەن سوڭ ايتا كەتەيىك. سول كەزدە «استانا ارەنا» ستاديونىنا جەتۋ قيىنعا سوعاتىنىن جانكۇيەرلەر بىلەدى. ال ستاديون كورمە قالاشىعىنا اپاراتىن جولدىڭ بويىندا تۇر. ەكسپو-دان كەيىن جولاقتار قالا بەرسە, حالىق جەڭىل كولىكتەن گورى اۆتوبۋسپەن ستاديونعا تەزىرەك بارادى.
جالپى, قالادا قازىر قوعامدىق كولىككە باسىمدىق بەرىلىپ وتىر. ماقسات – اۆتوبۋسپەن قاتىنايتىن حالىقتى دىتتەگەن جەرگە جىلدام جەتكىزۋ. Bus Lane ەنگىزۋدىڭ نەگىزىنەن كوزدەگەنى دە سول.
«ەكسپو-2017» حالىقارالىق كورمەسىنە دايىندىق شەڭبەرىندە قالادا اۆتوبۋستارعا ارنالعان جولاقتار قوسىمشا 12 كوشەگە ەنگىزىلدى. سونىڭ ءبىرى قابانباي باتىر داڭعىلىندا ورنالاسقان. مۇنداعى ءتورت جولاقتى جولدىڭ ەكى جولاعى قوعامدىق كولىككە ارنالادى. وسى داڭعىل بويىمەن 12 اۆتوبۋس باعدارى قاتىنايدى. ونىڭ تورتەۋى – قالالىق, تورتەۋى – قالاارالىق جانە تورتەۋ – «ەكسپو» كورمەسى ءۇشىن ارنايى قوسىلعان شاتتل-باس باعدارلار. ارنايى جولاقتارمەن جۇرۋگە قالالىق تاكسي قىزمەتىنىڭ, جەدەل جاردەم, ءورت ءسوندىرۋ, پوليتسيا كولىكتەرىنە دە رۇقسات ەتىلگەن» دەيدى «استانا LRT» جشس قوعامدىق كولىكتى دامىتۋ مامانى ءابدىحاميت تاماباەۆ.
قالادا العاش رەت Bus Lane ەنگىزىلگەندە جەكە اۆتوكولىك يەلەرى كەپتەلىستە بۇرىننان كوپ تۇراتىن بولدىق دەپ نارازى بولىپ جاتاتىن. قابانباي باتىر داڭعىلىندا دا اۆتوبۋستارعا ارنالعان جولاقتار پايدا بولعاندا سونداي اڭگىمە شىعىپ وتىر. «استانا LRT» جشس باسقارماسى توراعاسىنىڭ ورىنباسارى رۋستام حاليلەۆتىڭ ايتۋىنشا, قابانباي باتىر داڭعىلىنداعى ارنايى جولاقتار «ەكسپو» كورمەسى وتەتىن كەزەڭ بويى جۇمىس ىستەيدى. كورمە اياقتالعان سوڭ ساراپتاما جۇرگىزىلىپ, جولاقتاردى قالدىرۋ نەمەسە ءوشىرۋ ماسەلەسى سوندا شەشىلەدى. ياعني, ولاردىڭ تيىمدىلىگىن ۋاقىت كورسەتەدى. رۋستام حاليلەۆ جەكە اۆتوكولىك يەلەرىنە قابانباي باتىر داڭعىلىنىڭ بالاماسى رەتىندە تۇران داڭعىلىن ۇسىندى. ونىڭ سوزىنشە, تۇراندا ولار كەپتەلىستە كوپ تۇرماي, كەرەك جەرىنە تەز جەتەدى.
امانعالي قالجانوۆ
