وتكەن اپتادا ەلوردا تۇرعىندارى مەن قوناقتارىنىڭ قاۋىپسىزدىگىن, سونداي-اق, قالا تىنىشتىعىن كۇزەتەتىن جاۋىنگەرلەردىڭ سانى ارتتى. ۇلتتىق ۇلاننىڭ 5573 اسكەري بولىمىنە قابىلدانعان 790 جاس سارباز سالتاناتتى جاعدايدا وتانعا انت بەردى.
استانا ىرگەسىندەگى تمد بويىنشا ەڭ ۇلكەن اسكەري قالاشىقتا قۇقىقتىق ءتارتىپ اسكەرىنىڭ جەدەل ماقساتتاعى قۇراماسى ورنالاسقان. باحتيار قازانباەۆ پاۆلودار وبلىسى اقسۋ قالاسىنان كەلىپتى. «بيىلعى شاقىرىلىمعا تۇسكەنىم ءۇشىن وتە قۋانىشتىمىن. ءبىز ەكسپو كورمەسىنىڭ تىنىشتىعىن ساقتاۋعا اتسالىسامىز. الەمنىڭ ءار تۇكپىرىنەن كەلگەن قوناقتار بىزگە نازارلارىن اۋدارىپ, باعالارىن بەرەدى. ءبىز وزىمىزگە جۇكتەلگەن مىندەتتى ءمىنسىز اتقارۋىمىز كەرەك» دەيدى ول.
بۇگىندە بۇل قالاشىقتا قۇرامانىڭ جەكە قۇرامىمەن بىرگە, حالىقارالىق كورمە كەزىندەگى قاۋىپسىزدىكتى كۇشەيتۋ ماقساتىندا اسكەردىڭ باسقا وڭىردەگى اسكەر بولىمدەرىنەن ارنايى كەلگەن جاۋىنگەرلەر دە ءبىر وتباسىنداي بىرلىكتە قىزمەت اتقارىپ كەلەدى.
ۇلاندىقتار اۋقىمدى شارانىڭ قاۋىپسىزدىگىنە باعىتتالعان كۇشەيتىلگەن رەجيمدەگى قىزمەتكە مامىردىڭ 29-ىنان باستاپ كىرىسكەن بولاتىن. وسى ارالىقتا ءتۇرلى قىراعىلىق تانىتىپ, زاڭ بۇزۋشىلاردى قۇرىقتاپ, ۇلگىلى قىزمەتىمەن ەرەكشەلەنىپ كەلەدى.
قىرىق كۇن ارنايى وقۋ بەكەتتەرىندە جاتتىعىپ, اسكەري ءومىردىڭ كۇن تارتىبىنە داعدىلانىپ, ساپتىق دايىندىقتارىن شىڭداعان جاڭا شاقىرىلىم انت قابىلداۋ راسىمىنەن كەيىن قالا كوشەلەرىنىڭ تىنىشتىعىن كۇزەتۋ ءۇشىن جاۋىنگەرلىك قىزمەتكە كىرىسەدى.
گۇلجان راحمان
