ساناۋلى كۇندەردەن كەيىن استانا قالاسى حالىقارالىق تۋريستىك يندۋستريانىڭ ورتالىعىنا اينالادى. كەلگەن قوناقتارعا ساپالى قىزمەت كورسەتۋدى تالاپ ەتەتىن ورىنداردىڭ ءبىرى – قوعامدىق تاماقتانۋ.
قالانىڭ تۋريستىك دامۋى ءۇشىن حالىقارالىق كورمەنىڭ ماڭىزى زور. استانا قالاسىنىڭ كاسىپكەرلىك جانە ونەركاسىپ باسقارماسى جول كارتاسى اياسىندا قوعامدىق تاماقتانۋ ورىندارى مەن قوناقۇيلەردىڭ ءتىزىمىن جاساپ, ونداعى قىزمەت كورسەتۋ ساپاسىن ارتتىرۋ جۇمىستارىن جۇرگىزدى. اتاپ ايتقاندا, تاماقتانۋ ورىندارىندا ءمازىردىڭ ءۇش تىلدە دايىندالۋىنا, قوسىمشا پوست-تەرمينالدار ورناتۋعا, ىشكى جانە سىرتقى كەلبەتى مەن اباتتاندىرۋ جۇمىستارىنا كوڭىل ءبولىندى.
تاماقتانۋ
ورىندارى
ساقاداي ساي
بۇگىندە كەلگەن قوناقتار مەن قالا تۇرعىندارىنا قىزمەت كورسەتەتىن 273 مەيرامحانا, 460 كافە, 27 اسحانا ساقاداي ساي. وعان قوسا «حانشاتىر», «سارىارقا», «كەرۋەن», «MegaSilkWay», «ازيا پارك», «ارۋجان» جانە «دۋمان» سەكىلدى ساۋدا ويىن-ساۋىق ورتالىقتارىندا 100-دەن استام تاماقتانۋ ورىندارى جۇمىس ىستەيدى. جالپى, قوعامدىق تاماقتانۋ ورىندارى ءبىر مەزەتتە 106 مىڭ ادامدى قابىلداي الادى.
ايتا كەتەيىك, استانا قالاسىنىڭ اكىمدىگى مەن «استانا EXPO-2017» ۇلتتىق كومپانياسى «Recommended by EXPO-2017» جوباسىن جۇزەگە اسىرعان بولاتىن. باعدارلامانىڭ ماقساتى – تۋريستىك قىزمەتتىڭ ساپاسىن كوتەرۋ. وعان قالاداعى قوناقۇيلەر مەن حوستەلدەر, قوعامدىق تاماقتانۋ ورىندارى, ترانسپورتتىق كومپانيالار, ساۋدا ورىندارى جانە سۇلۋلىق سالوندارى بەلسەندى تۇردە قاتىستى. ارناۋلى ساراپشىلار اتالمىش كاسىپورىنداردىڭ قىزمەت دەڭگەيىن انىقتاۋ ءۇشىن باعالاۋ جۇمىستارىن جۇرگىزدى. ناتيجەسىندە جوعارى تالاپقا ساي كەلەتىن مەكەمەلەرگە «استانا قالاسىنىڭ التىن سەرىكتەستىگى», «كۇمىس سەرىكتەستىك», «قولا سەرىكتەستىك» نەمەسە «استانا قالاسىنىڭ سەرىكتەستىگى» ستاتۋسىن تاعايىندادى. جوبانىڭ قىزمەت كورسەتۋ دەڭگەيىنىڭ قورىتىندىسى بويىنشا 33 مەيرامحانا, 4 كوفەحانا, 10 گريل-بار, 3 جىلدام تاماقتانۋ ورنى, 1 شاراپحانا جانە 1 ستەيكحاۋس سەرىكتەس اتاندى. ارينە, دەنساۋلىق ساقتاۋ باسقارماسىنىڭ ماماندارى قوعامدىق ورىندارداعى بارلىق اسحانالاردىڭ قاۋىپسىزدىگىن قاتاڭ باقىلاماق.
الەم ءمازىرى
ۇسىنىلادى
«كورمەگە دايىندىق بارىسىندا اۋقىمدى شارالار اتقارىلدى. ءاربىر نىسان ءجىتى تەكسەرىلدى. ولاردىڭ ءبارى ىشكى-سىرتقى كەلبەتىن جاقسارتىپ, كۇردەلى جوندەۋ جۇمىستارىن جۇرگىزدى. ونداعى قىزمەتكەرلەر ارنايى كۋرستان ءوتىپ, بىلىكتىلىگىن ارتتىردى. ءبىزدىڭ الدىمىزداعى ەڭ باستى مىندەت – قىزمەت دەڭگەيىن كوتەرۋ. ول ءۇشىن استانالىق مەيرامحانا يەلەرىنىڭ قاتىسۋىمەن ترەنينگتەر وتكىزىلدى. «دامۋ» كاسىپكەرلىكتى دامىتۋ قورىمەن بىرلەسە وتىرىپ سالا ماماندارىنا ارنالعان تەگىن سەمينارلار ۇيىمداستىرىلدى. وعان 1300-دەن استام بيزنەس وكىلدىرى قاتىستى» دەيدى استانا قالاسىنىڭ كاسىپكەرلىك جانە ونەركاسىپ باسقارماسىنىڭ باسشىسى رىسگۇل قاۋعاباەۆا. ونىڭ ايتۋىنشا, شەتەلدىك قوناقتار ءۇشىن ۇلتتىق تاعامداردان بولەك, الەم ەلدەرىنىڭ سۇيىكتى تاعامدارىن ۇسىنۋعا كوڭىل بولىنبەك.
داياشىلارعا
سۇرانىس ارتتى
«ەكسپو-2017» كورمەسىنە دايىندىق جۇمىستارى بارىسىندا بايقاعانىمىزداي, اسىرەسە, كاسسيرلەر مەن داياشىلارعا سۇرانىس ارتقان. وسى تەندەنتسيانىڭ ارقاسىندا قالالىق قوعامدىق تاماقتانۋ جانە سەرۆيس كوللەدجىنىڭ بىتىرۋشىلەرى جۇمىسپەن قامتىلىپ وتىر.
تاعى ءبىر ماسەلە, قىزمەتكەرلەردىڭ اعىلشىن ءتىلىن ءبىلۋ دەڭگەيى بولاتىن. قازىرگى ۋاقىتتا بارلىق مەيرامحانا مەن كافە يەلەرى شەتەلدىك قوناقتاردى كۇتىپ الىپ, ولارعا قىزمەت ەتەتىن بىرنەشە ءتىل بىلەتىن اكىمشى, داياشى, سەكىلدى قىزمەتكەرلەر توبىن دايىنداعان.
جالپى, ەلوردا ەكونوميكاسىنىڭ ءبىر بولىگىن قىزمەت كورسەتۋ سالاسى قۇرايدى. وسىعان بايلانىستى, كورمە قارساڭىندا ساۋدا قىزمەتىن, مەيرامحانا بيزنەسىن جاڭا ساتىعا كوتەرىپ, اتالمىش باعىتتى كەڭىنەن دامىتۋ ماڭىزدى بولماق.
«وسى ماقساتتا شاعىن جانە ورتا بيزنەسكە جەڭىلدەتىلگەن نەسيە بەرەتىن «جاستار», «استانا سەرۆيس» جانە «ستارت اپ» باعدارلامالارى ىسكە قوسىلدى. باعا ساياساتىن تۇراقتاندىرۋ ماقساتىندا ساۋدا ورىندارىن قولداۋدىڭ تەتىكتەرى قاراستىرىلدى. تۇرعىنداردى ازىق-تۇلىك ونىمدەرىمەن قامتاماسىز ەتۋدە كوتەرمە جەتكىزۋشىلەرمەن, ايماقتارداعى اۋىلشارۋاشىلىق كاسىپورىندارمەن مەموراندۋم جاسالدى. الەۋمەتتىك ماڭىزى بار تاعام تۇرلەرىن ساتۋمەن اينالىساتىن ساۋدا جەلىلەرىنە جەڭىلدەتىلگەن نەسيە ۇسىنىلدى» دەيدى رىسگۇل قاۋعاباەۆا.
گۇلميرا
ايماعانبەت
