كورمەككە جاقسى كورمەلەر
10-17 تامىز ارالىعىندا ەلوردادا ەرەكشە كورمە اپتالىعى ءوتتى. «Tribute album» دەپ جالپى اتپەن اتالعان شارادا استانالىق ونەر الەمىنىڭ وكىلدەرى ءوز شەبەرحانالارىنىڭ ەسىگىن اشىپ, ءتورىن كورسەتتى.
ءتورىن كورسەتتى دەيتىندەي بار. مۇنداي فورمالدى ەمەس كەزدەسۋلەر كوبىنە ءوز پاتەرلەرىندە وتەدى. شەتەلدەردە «apartment exhibitions» دەپ اتالاتىن كورمەنىڭ بۇل تۇرىندە سۋرەتشىنىڭ ءوز ءۇيى كورمە زالىنا اينالادى. ونى استانادا العاش رەت ۇيىمداستىرعان ونەرتانۋشى ايگۇل يبراەۆا ەلوردالىقتاردىڭ بيىك ونەرگە دەگەن تالعامىن سىناماققا نيەت ەتىپتى. «استانالىقتاردى ۇلكەن ونەردى باعالامايدى, جالپى ەلدە بولىپ جاتقان ءتۇرلى مادەني شارالاردىڭ كوپتىگىنە قاراماستان بەلسەندىلىگى تومەن. تەك شەنەۋىكتەر قالاسى» دەپ جوسىقسىز جازعىرىپ جاتادى. بۇنىڭ ءبارى – ۇشقارى ايتىلعان نارسە. شىن مانىندە, قالا تۇرعىندارىن ونەردىڭ ءاربىر باعىتىنان جان-جاقتى حاباردار, شىن ونەردى باعالاي الاتىن ناعىز اشىق جاندار دەر ەدىم. ءبىر اپتا بويىندا وتكىزىلگەن سۋرەتشىلەرمەن كەزدەسۋلەردە وسىعان كوزىم جەتتى.
ونەرتانۋشى رەتىندە ەلوردالىق سۋرەتشىلەردىڭ شەبەرحاناسىندا بولىپ, ولاردىڭ بۇگىنگى تىنىس-تىرشىلىگىمەن تانىسىپ, ولاردى ويلاندىرىپ جۇرگەن ماڭىزدى سۇراقتاردى ەستىگىم كەلدى. وسى الاڭدى زەرتتەي كەلە, تەرەڭىنەن زەردەلەپ, وسىلار تۋرالى جازعىم كەلەدى» دەيدى ونەرتانۋشى.
شۆەد جانە «717 ستريت-ارت»
مەنى ەۆگەني شۆەدتىڭ ونەرى تاڭعالدىردى دەۋگە بولادى. قالاداعى ءۇيلەردىڭ ىرگەتاسىن نەمەسە بيىك قاقپالاردىڭ ءتۇرلى-ءتۇستى بوياۋلى سۋرەتتەرىنە قاراپ, ەرىككەن جەتكىنشەكتەردىڭ ەرمەگى دەپ ويلاۋشى ەدىم. سويتسەم, ونىڭ باسىندا «717 ستريت-ارت» سۋرەتشىلەر توبى تۇر ەكەن. راسىندا بۇل سۋرەتشىلەر ءۇشىن ءتۇن جامىلىپ, ۇيلەردىڭ بوس قابىرعالارىن ورنەكتەپ, قالتارىستاردا قولتاڭباسىن قالدىرۋدى ناعىز ونەردىڭ ءوزى دەپ قابىلدايدى. ءتىپتى, وسىنداي تۇندە جورتقاندار ءۇشىن دۇكەن اشىپ تا ۇلگەرىپتى. مۇندا تەك قانا بوياۋ-سپرەيلەر, كوشەنى كوركەمدەيتىن قالامدار ساتىلادى. وسى شارا اياسىندا قولونەرىمەن اينالىساتىن جاستار, كيىم تىگىپ, اشەكەيلىك بۇيىمدار جاسايتىندار دا ءوز ونەرىن كورسەتۋگە مۇمكىندىك الدى.
«ءشاي-پاي» ءىشىپ قايتالىق
«ءشاي-پاي», «قىزىل-كادمي» – ارت-توبىنىڭ كورمەسى. سىعاناق كوشەسىندەگى «7 بوشكە» دەپ اتالاتىن ۇيلەردىڭ ءبىرىنىڭ تومەنگى قاباتىندا ورنالاسقان جايدا جينالعاندار ءومىر تۋرالى ءسوز قوزعادى. قازىرگى كۇنگى ادامداردىڭ ءبىر-بىرىنە ۋاقىت ءبولىپ, ءتىپتى كورشىسىنىڭ دە ەسىگىن قاقپايتىنىن ايتىپ, الەۋمەتتىك ءماسەلەنى كوتەردى. ادامداردىڭ جاقىنداستىراتىن بيىك ونەردىڭ رولىنە توقتالدى. مۇندا ايگەرىم ماجيتحانقىزى (كۋراتور, ۆيدەو-ارت), ءاليا كانيبەكوۆا (فوتوگرافيا, كيىزدى كوركەمدەۋشى), ناتاليا ليگاي (جيۆوپيس), گۇلمارال تاتيباەۆا (جيۆوپيس, ينستالياتسيا), بەيبىت اسەمقۇل (فوتوگرافيا), جەڭىس مولدابەكوۆ (جيۆوپيس) قوناقتارعا داستارحان جايىپ, ءشاي بەرەدى.
ونەر اپتالىعى شەبەر مەن قارپايىم ادامداردىڭ اراسىنداعى شەكارانى جويىپ جىبەرىپ, سۋرەتشىلەر حالىقتىڭ ۇنىنە دەن قويدى. كورەرمەندەر شەبەردىڭ قۇپياسىمەن تانىستى. ورتاق ادامزاتقا ءتان قۇندىلىقتاردى ناسيحاتتاۋ ارقىلى ەكى جاقتا ۇتىسپەن شىقتى دەۋگە ابدەن بولادى.
ايگۇل ۋايسوۆا