كورمەنىڭ ساباعى ساليقالى
«ءۇش اي بويى الەم نازارىن اۋدارعان «ەكسپو-2017» حالىقارالىق مامانداندىرىلعان كورمەسى ەلىمىزدىڭ ابىرويىن اسقاقتاتىپ قانا قويعان جوق, جەرگىلىكتى پوليتسيا قىزمەتىنە قوعامدىق ءتارتىپتى ساقتاۋدا, جول ءجۇرۋ ەرەجەسىن قاداعالاپ, كورمەگە قاتىسۋشى شەتەلدىك قوناقتار مەن قاراپايىم ازاماتتاردىڭ قاۋىپسىزدىگىن قامتاماسىز ەتۋدە مول تاجىريبە جيناۋ مۇمكىندىگىن تۋعىزدى» دەدى استانا قالاسى اكىمدىگىندە وتكەن «ەكسپو-2017» كورمەسى كەزىندە ەلورداداعى قاۋىپسىزدىك پەن قۇقىق ءتارتىبىن قامتاماسىز ەتۋ» تاقىرىبىنا ارنالعان ءباسپاسوز ءماسليحاتىندا استانا قالاسى جەرگىلىكتى پوليتسيا قىزمەتىنىڭ باستىعى باقىتجان مالىباەۆ.
جەكە قۇرام تاۋلىك بويى جۇمىس ىستەپ, قوعامدىق ءتارتىپتى قاداعالاۋعا 9 مىڭعا جۋىق قىزمەتكەر تارتىلسا, تىكەلەي كورمە اۋماعىندا قاۋىپسىزدىكتى ساقتاۋعا 4 مىڭنان اسا ساقشى قىزمەت ەتتى. اسىرەسە, اعىلشىن ءتىلىن مەڭگەرگەن 200 ەرىكتى مەن قر ءىىم جوعارى وقۋ ورىندارىنىڭ 500 كۋرسانتى مەن وفيتسەرى بەلسەنە اتسالىستى.
كورمە كەزىندە قاۋىپسىزدىكتى قامتاماسىز ەتۋ ماقساتىندا قالا اكىمىنىڭ وكىمىمەن احۋال ورتالىعى قۇرىلدى. ارنايى قۇرىلعان شتابتا مامانداردىڭ كۇندەلىكتى كەزەكشىلىگى ۇيىمداستىرىلدى. ۋچاسكەلىك پوليتسيا ينسپەكتورلارى ەسەپتەگى كونتينگەنتتى, قارۋ يەلەرىن تەكسەرىپ, اۋلالار مەن پاتەرلەردى ارالاۋ, بەيالەۋمەتتىك باعىتتاعى تۇلعالارلى انىقتاۋ جۇمىستارى كۇشەيتىلدى. سونىڭ ناتيجەسىندە كوشەدەگى قىلمىس – 19 پايىزعا, قوعامدىق ورىندارداعى ءتارتىپ بۇزۋشىلىق 2,2 پايىزعا تومەندەدى.
قاۋىپسىزدىك پەن قۇقىق ءتارتىبىن قامتاماسىز ەتۋدىڭ زاماناۋي جۇيەسى قۇرىلدى. وزىق تاجىريبە مەن جاڭا تەحنولوگيالار قولدانىلدى. ادامدار جاپپاي جينالاتىن جەرلەردە, باسقا دا ماڭىزدى نىسانداردا ۆيدەوباقىلاۋ جۇيەسى جەلىلەرى كەڭەيتىلدى. كورمەگە كىرەتىن جەرلەر ايرىقشا باقىلاۋعا الىنىپ, بەت-الپەتتى تانىپ, تالدايتىن بەينەساراپتاما جۇمىس ىستەدى. سول ارقىلى قۇقىق قورعاۋ ورگاندارىنىڭ ارنايى مالىمەتتەر قورىنا كەلۋشىلەردىڭ قۇجاتتارى ءتىركەلىپ وتىردى.
ءباسپاسوز ءماسليحاتىندا ىشكى ىستەر ورگاندارىنداعى جاڭا ماماندار – پروفايلەر تۋرالى دا سۇراقتار قويىلدى.
«بۇل بىزگە ەقىۇ كەزىنەن تانىس. وسى ماماندىققا قاتىستى ەقىۇ وكىلدەرى ەكى رەت وقىتۋ, تاجىريبە الماسۋ ساباقتارىن وتكىزگەن بولاتىن. پروفايلەر دەگەنىمىز – ەڭ شۇعىل قيمىلدايتىن, قازىرگى زامان تالابىنا ساي قىزمەتكەرلەر. ولارعا «ەكسپو» كورمەسىنىڭ الدىندا حالىقارالىق دارەجەدەگى پسيحولوگتار ءدارىس بەرگەن ەدى. ماماندىق يەلەرى الەۋمەتتىك قاۋىپتى ادامداردى ءجۇرىس-تۇرىسىنان, سوزىنەن, قيمىل-قوزعالىسىنان, كيىم كيىسىنەن ءاپ ساتتە اڭعارىپ, شۇعىل شەشىم قابىلداي الادى» دەيدى استانا قالاسى ىشكى ىستەر دەپارتامەنتى اكىمشىلىك پوليتسياسىنىڭ ءبولىم باستىعى تيمۋر قازىباەۆ.
«وسى باعىتتا كۇش قۇرىلىمدارىندا از عانا ۋاقىتتىڭ ءىشىندە ءوزارا تىعىز قارىم-قاتىناس ورناپ, وزىق تاجىريبە قالىپتاستى. بۇرىن ەسەپتە تۇرعان كۇدىكتى ادامدار تۋرالى اقپاراتتار الماسىلىپ, مالىمەتتەر ناقتىلاندى. كريمينالدى پوليتسيا, ەسىرتكىمەن كۇرەس جانە ۋچاسكەلىك پوليتسيانىڭ كۇندەلىكتى جۇمىستارىندا ارنايى دايىندىقتان ءوتكەن جۇزدەن اسا قىزمەتكەر حالىقارالىق دارەجەدەگى ماڭىزدى ءىس-شارانىڭ ويداعىداي وتۋىنە بەلسەنە اتسالىستى» دەدى ول.
– «ەكسپو» حالىقارالىق مامانداندىرىلعان كورمەسى اۋماعىندا ءبىز, نەگىزىنەن, الدىن الۋ ءىس-شارالارىمەن اينالىستىق. قاۋىپ تۋعىزاتىنداي وقيعا بولعان جوق. كەيبىر تەمەكىنىڭ تۇقىلىن تاستاۋ, بەلگىلەنبەگەن جەردەن ءجۇرۋ سياقتى ۇساق-تۇيەك ءتارتىپ بۇزۋشىلىقتار بولماسا, قىلمىسكەردىڭ كىرىپ كەتۋى نەمەسە قارۋ الىپ وتۋگە ارەكەتتەنۋ دەگەن سياقتى ماسەلەلەر ءتىركەلگەن جوق. ارينە, تىيىم سالىنعان زاتتاردى ۇمىتىپ, قالتالارىنا سالىپ الىپ كەلۋ, كەزدىك, سەلەبە ءتارىزدى سۋىق قارۋلاردىڭ تابىلعان ساتتەرى بولدى. الايدا ول بەلگىلى ءبىر تەرىس ماقساتتى كوزدەگەندىكتەن ەمەس, سالعىرتتىقتان ورىن الىپ جاتتى, – دەدى باقىتجان مالىباەۆ.
وسىلايشا, قۇقىق قورعاۋ مەن ارناۋلى ورىنداردىڭ كورمەگە دايىندىق جانە كورمەنى وتكىزۋ كەزىندەگى قارقىندى جۇمىسى قاۋىپسىز قالاعا ءتان احۋال قالىپتاستىرىپ, قىلمىس دەڭگەيىنىڭ تومەندەۋىنە ءارى استانانى ەڭ قاۋىپسىز قالا دەپ تانۋعا مۇمكىندىك تۋعىزدى.
تاڭاتار تولەۋعاليەۆ