كەشە استانا قالالىق ءماسليحاتىنىڭ قۇرىلىس, ەكولوگيا, كولىك, ساۋدا جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسيانىڭ وتىرىسىندا ەلورداداعى بازارلاردىڭ جاعدايى مەن «كوشە ساۋداسىنا ارنالعان 1000 ورىن» باعدارلاماسىنىڭ ورىندالۋ بارىسى قارالدى.
قالالىق كاسىپكەرلىك جانە ونەركاسىپ باسقارما باسشىسىنىڭ ورىنباسارى رۋسلان ىدىرىسوۆ پەن «اstana» الەۋمەتتىك-كاسىپكەرلىك كورپوراتسياسى» ۇك» اق اكتيۆتەردى باسقارۋ بويىنشا ديرەكتورى حالەل اكىمجانوۆ باياندامالارىن وقىعان سوڭ, بۇل ماسەلەلەردە شەشىمىن كۇتەتىن تۇيتكىلدەر ءالى دە كوپ ەكەنى انىقتالدى.
جالپى «كوشە ساۋداسىنا ارنالعان 1000 ورىن» باعدارلاماسى شاعىن جانە ورتا كاسىپكەرلىكتىڭ دامۋى, نەگىزىنەن وتباسىلىق بيزنەستىڭ ىلگەرىلەۋى, سونىڭ ىشىندە جۇمىسسىز حالىق ءۇشىن قولعا الىنعان. ول ءۇشىن 737 جەر تەلىمى انىقتالىپ, سايكەس كەلىسىمدەر جاسالدى.
قازىرگى تاڭدا اتالمىش باعدارلامانىڭ وپەراتورى «اstana» الەۋمەتتىك-كاسىپكەرلىك كورپوراتسياسى وتكىزگەن كونكۋرستاردىڭ قورىتىندىسىندا سۋبارەندا بويىنشا 425 كەلىسىمشارت جاسالدى. سونىڭ باسىم كوپشىلىگى جەمىس-كوكونىس جانە جىلدام دايارلاناتىن تاعامداردىڭ ساۋداسىنا ارنالعان. بۇعان قوسا ازىق-تۇلىك پەن گۇلدى, گازەتتەردى, كادەسىيلاردى ساتۋعا, تەحنيكالىق سەرۆيسكە, بالالار دەمالىسىنا, تۇرمىستىق قىزمەتتەر سەرۆيسىنە جەر تەلىمدەرى ءبولىندى. جەر تەلىمدەرى 7 جىلعا جالعا بەرىلەتىن بولدى.
الايدا مۇنىمەن قاتار ءبىراز ماسەلە تۋىندادى. اتاپ ايتساق, كوشە ساۋداسىنا ارنالعان كەيبىر دۇڭگىرشەكتەر پاركينگتەرگە ورناتىلىپ, كولىك يەلەرىنە قولايسىزدىق تۋعىزىپ وتىر. ماسەلەن, ءماسليحات دەپۋتاتى التىنشاش تابۋلدينا جەدەل جاردەم كولىگىن قوياتىن ورىندى تۇراقتى دۇڭگىرشەك «باسىپ العانىن» جەتكىزدى. ونىڭ ارىپتەستەرى زەينوللا شىبكەنوۆ ساۋدا ورىندارىنىڭ ەستەتيكالىق كورىنىسىنە, ءماجيت شايداروۆ سانيتارلىق جاعدايىنا نازار اۋداردى. كەيبىر دەپۋتاتتار جەر تەلىمىن جالعا بەرۋ مەرزىمىنىڭ ۇزاقتىعىنا كەلىسپەۋشىلىك تانىتتى.
الماز كيمنىڭ ايتۋىنشا, سىرتتاعى ساۋدا عيماراتتاعى ساۋداعا كەسىرىن تيگىزىپ وتىر. «دۇكەن يەلەرى ءتيىستى سالىق تولەگەننەن كەيىن ازىق-تۇلىكتى قىمباتتاۋ باعاعا ساتۋعا ءماجبۇر. ال ونىڭ تۋرا جانىندا ورنالاسقان دۇڭگىرشەكتىڭ سالىعى جوق, سوندىقتان تۇتىنۋشىعا ارزانداۋ بەرەدى. مۇنداي جاعدايدا, ارينە, دۇكەن يەسى ۇتىلادى. مىسالى, مەنىڭ دۇكەنىمدە قازىر قىزاناق وتپەي جاتىر» دەدى ول.
وتىرىستا سارىارقا اۋدانى اكىمىنىڭ ورىنباسارى تالعات راحمانبەردى كوشە ساۋداسىنا قاتىستى ءبىر تۇيتكىلدى شىعاردى. ونىڭ سوزىنشە, دۇڭگىرشەكتەردى جارىقتاندىرۋ ماسەلەسى شەشىمىن تاپپاي وتىر. ال ەسىل اۋدانىنداعى «نۇرجول» جەلەك جولىندا ساۋدا قىزىپ تۇر. كوپتەگەن ساۋدا ورىندارى وسى جەردە ورنالاسقان. الايدا ارالارىندا زاڭسىز تۇرعاندار دا بار.
قورىتا ايتقاندا, باعدارلامانىڭ ورىندالۋ بارىسى باقىلاۋسىز قالعان سياقتى. جوعارىدا اتالعان جانە وزگە ماسەلەلەردى ەستىگەندە سونى بايقادىق. دەپۋتاتتار دا باعدارلامانىڭ ورىندالۋىنا مونيتورينگ جۇرگىزۋ كەرەكتىگىنە كوزدەرى جەتكەندەي. بۇل ماسەلەگە گازەتىمىزدىڭ الداعى سانداردىڭ بىرىندە ورالاتىن بولامىز.
امانعالي قالجانوۆ
