جان باعۋ ءۇشىن جايما بازارلاردى جاعالاپ, كوشەلەردىڭ قالتارىس-بۇلتارىسىندا تۇرىپ, جابايى ساۋدادان ناپاقا تاباتىندار جوق ەمەس. بىراق قالاي بولسا سولاي جايراپ جاتاتىن تاۋارلاردىڭ قالا سيقىن قاشىراتىنى بەلگىلى. سانيتارلىق تازالىق ساقتالمايتىن ورىنداردان يىستەنىپ, بۇزىلىپ كەتكەن تاعامداردى الساڭىز, ونىڭ اۋرۋ تۋدىرماسىنا كىم كەپىل؟ وسىنداي جايما بازارشىلاردىڭ جولىن كەسىپ, تۇتىنۋشىلارعا ساپالى قىزمەت كورسەتۋ ءۇشىن «كوشە ساۋداسىنا ارنالعان 1000 ورىن» جوباسى جۇزەگە اسىرىلۋدا.
630 پاۆيلون قىزمەت كورسەتۋدە
2016 جىلدان بەرى قولعا الىنعان جوبا بويىنشا بۇگىندە قالاداعى 630 ورىن جەكە كاسىپكەرلەرگە جالعا بەرىلىپتى. پاۆيلونداردىڭ 228-ءى كوكونىس پەن جەمىس-جيدەك ساتاتىن ورىن بولسا, قالعان 208-ءى فاست-فۋد, 75-ءى ازىق-تۇلىك, 50-ءى گۇل, 11-ءى گازەت-جۋرنال, 2-ەۋى كادەسىي ساۋداسىن دوڭگەلەتۋدە. سونىمەن قاتار, بىرەن-ساران اياق كيىم جوندەۋ, تۇرمىستىق قىزمەت كورسەتۋ سياقتى دۇڭگىرشەكتەر تاعى بار. وسى جوبانىڭ ارقاسىندا قالا قازىناسىنا 1,1 ملرد تەڭگە ينۆەستيتسيا قۇيىلعان.
«Astana» الەۋمەتتىك-كاسىپكەرلىك كورپوراتسياسى «كوشە ساۋداسىنا ارنالعان 1000 ورىن» جوباسىنىڭ جەتەكشىسى ساكەن ادىلبەكوۆتىڭ سوزىنشە, ءبىر جىلعا جالعا بەرىلەتىن جەردىڭ شارشى مەترى 20 مىڭ تەڭگەدەن باستالادى. ەگەر جەردىڭ كولەمى 20-30 شارشى مەتر بولسا, وندا جالعا الۋشى شارشى مەترىنە 16 مىڭ تەڭگە تولەيدى ەكەن. جالپى, جالعا بەرىلەتىن جەردىڭ ەڭ كولەمدىسى – 50 شارشى مەتر, ال ۇزاق مەرزىمى – 7 جىل. ساۋداگەر پاۆيلون اينالاسىنداعى 5 مەتر جەردىڭ تازالىعىن ءوز مىندەتىنە الادى. سونىمەن قاتار, ولارعا قويىلاتىن تاعى ءبىر تالاپ – پاۆيلوندار, كەلىسىمشارتتا كورسەتىلگەندەي, اعاش ياكي تەمىر ماتەريالدارمەن تۇرعىزىلۋى ءتيىس جانە ورنىنان قوزعاۋعا ىڭعايلى بولۋى شارت. ويتكەنى ول مەملەكەتتىڭ جەرى بولعاندىقتان, وندا كەز كەلگەن ۋاقىتتا جەراستى كارىز جۇيەسىن نەمەسە كابەلدەردى اۋىستىرۋ سياقتى جۇمىستار جۇرگىزىلۋى مۇمكىن.
جەر كونكۋرس, اۋكتسيون ارقىلى بەرىلەدى
بيزنەس باستاۋعا نيەتتى كەز كەلگەن قالا تۇرعىنى اتالمىش جوبا بويىنشا جۇمىس ىستەۋگە قۇقىلى. ول ءۇشىن ەڭ الدىمەن جەكە كاسىپكەر نەمەسە زاڭدى تۇلعا رەتىندە تىركەلۋى ءتيىس. ونىمەن قوسا, بانكتەن ەسەپ-شوت اشۋى قاجەت. ودان كەيىن جەكە كۋالىگى مەن سالىق كوميتەتىنەن قارىزىنىڭ بار-جوعى تۋرالى انىقتاما سۇرالادى. وسى جانە وزگە دە ءتيىستى قۇجاتتى تاپسىرعان سوڭ كاسىپكەر وزىنە ىڭعايلى جەردى الۋىنا مۇمكىندىگى بار. بىراق ول جەرگە باسقا دا ۇمىتكەرلەر كوز تىكسە, كاسىپكەرلەر اراسىندا كونكۋرس وتكىزىلەدى. كونكۋرستىڭ نۇكتەسىن قوياتىن كوميسسيا مۇشەلەرى – اۋداندىق اكىمدىك قىزمەتكەرلەرى مەن قالالىق ءماسليحات دەپۋتاتتارى جانە «اتامەكەن» ۇك» اق كاسىپكەرلەر پالاتاسىنىڭ وكىلدەرى. ولار ەڭ الدىمەن ۇمىتكەردىڭ مەملەكەت الدىنداعى قارىزىنىڭ بار-جوقتىعىنا باسا ءمان بەرەتىن كورىنەدى. ەگەر كونكۋرسقا قاتىسۋشىنىڭ 1 تەڭگە قارىزى بولسا, باسقالارعا جول بەرىپ الۋى ابدەن مۇمكىن. سونىمەن قاتار, كوميسسيا ۇمىتكەرلەردىڭ قۇجاتتارىنا, ونداعى ۇسىنىلعان قىزمەت ءتۇرىنىڭ باستاعالى وتىرعان جۇمىسىنا سايكەس كەلۋىن مۇقيات قارايدى. ال بەلگىلى ءبىر ورىنعا ءۇمىتتى كاسىپكەرلەر سانى 4-ەۋدەن اسسا, وندا ول جەر اۋكتسيونعا شىعارىلادى.
– 20 كاسىپكەر ءبىر جەردى الۋعا نيەت بىلدىرسە, كوميسسيانىڭ شەشىم قابىلداۋى قيىن. ال اۋكتسيون ارقىلى ۇلەستىرىلەتىن ورىندار كاسىپكەرلەردىڭ سول جەردەن قانشا تابىس تابۋدى جوسپارلاپ وتىرعانىنا بايلانىستى بولادى, – دەيدى جوبا جەتەكشىسى.
مىسالى, اۋكتسيونعا قويىلعان ورىننان كاسىپكەرلەردىڭ ءبىرى ايىنا 500 مىڭ تەڭگە تابىس تابۋدى كوزدەسە, ەندى ءبىرىنىڭ جوسپارى 3 ميلليون تەڭگە بولۋى مۇمكىن. دەمەك, سول جەردى جالعا الۋعا ەكىنشىسىنىڭ مۇمكىندىگى كوپ دەگەن ءسوز. سونىمەن قاتار, جوبانىڭ ەرەجەسىنە سايكەس, كاسىبىن باستاۋعا نيەتتىلەر 50 اەك كولەمىندەگى كەپىلدىك جارنانى تولەگەنىن راستايتىن بانك بەلگىسى قويىلعان تولەم قۇجاتىن كونكۋرسقا قاتىسۋ ءۇشىن باسقا قۇجاتتارمەن بىرگە وتكىزەدى. ەگەر كونكۋرستان وتپەي قالعان جاعدايدا, قارجى يەسىنە قايتارىلادى.
جاڭا جوبانىڭ الەۋەتى زور
الداعى ۋاقىتتا قۇجات تاپسىرۋ, كونكۋرس, اۋكتسيون جۇيەلەرىنىڭ بارلىعى ەلەكتروندى تۇردە جۇزەگە اسىرىلماق. قازىرگى ۋاقىتتا «كوشە ساۋداسىنداعى 1000 ورىن» جوباسىنىڭ ەلەكتروندى پلاتفورماسى, ياعني بلوكچەين جۇيەسىنىڭ جوباسى ازىرلەنىپ جاتىر ەكەن. ەگەر بۇل جۇيە ساتىمەن جۇزەگە اسسا, ونىڭ كاسىپكەرلەر ءۇشىن وتە ءتيىمدى ەكەنىن ايتادى ماماندار. مىسالى, ۇمىتكەرلەر بۇرىنعىداي تەك تاڭنان كەشكە دەيىن عانا ەمەس, تاۋلىك بويى قۇجات تاپسىرۋعا مۇمكىندىكتەرى بولماق.
– دەنساۋلىعىنا, وتباسىنىڭ قاۋىپسىزدىگىنە اركىم ءوزى جاۋاپتى. سوندىقتان كەز كەلگەن ادام تۇتىناتىن دۇنيەلەرىنىڭ ساپالى بولعانىن قالايدى. بۇل تۇرعىدا «كوشە ساۋداسىنا ارنالعان 1000 ورىن» جوباسىنىڭ پايدالى جاقتارى وتە كوپ. اتاپ ايتساق, قالا كوشەلەرىندە ءتارتىپ ورنادى. باسەكەلەستىك كۇشەيىپ, زاڭدى تۇردە ساۋدا جۇرگىزەتىن كاسىپكەرلەر سانى ارتتى. كەلىسىمشارت نەگىزىندە سانيتارلىق تالاپ تا قاتاڭ ساقتالادى. مىسالى, بالمۇزداق ساتاتىندار ارنايى قولعاپ كيىپ, نورماعا ساي توڭازىتقىشتار قويادى. سونىمەن قاتار, الداعى ۋاقىتتا موبيلدىك قوسىمشانىڭ كومەگىمەن پاۆيلوندارداعى QR كودتار ارقىلى قىزمەت كورسەتۋشى كاسىپكەر تۋرالى بارلىق اقپاراتتى الۋعا بولادى, – دەيدى ساكەن ادىلبەكوۆ.
ونىڭ ايتۋىنشا, بۇرىننان زاڭدى تۇردە كاسىبىن دوڭگەلەتىپ جۇرگەن بيزنەسمەندەر ەرەجەگە سايكەس, «كوشە ساۋداسىنا ارنالعان 1000 ورىن» جوباسى بويىنشا ۇلەستىرىلەتىن ورىنداردى كونكۋرس پەن اۋكتسيونعا قاتىسپاي-اق بىردەن كەلىسىمشارتقا وتىرۋعا مۇمكىندىكتەرى بار. توقسان اۋىز ءسوزدىڭ توبىقتاي ءتۇيىنى – «جابايى ساۋدانى تاستايمىن, زاڭدى بيزنەس باستايمىن» دەسەڭىز, وسى جوباعا جۇگىنگەن ءجون.
