باس قالادا شاعىن كاسىپكەرلىكتىڭ جاي-كۇيى قانداي؟ ونى ۇيىمداستىرۋدا قانداي كەدەرگى-كەمشىلىكتەر كەزدەسەدى؟ ەلوردالىق قوعامدىق كەڭەستىڭ كەزەكتى وتىرىسىندا «1000 ورىن – كوشە ساۋداسى» باعدارلاماسىن جۇزەگە اسىرۋ بارىسى قارالىپ, وندا وسى جانە باسقا دا وزەكتى ماسەلەلەر تالقىلاندى.
2016 جىلدان بەرى اتالعان باعدارلامانىڭ وپەراتورى بولىپ تابىلاتىن «Astana» الەۋمەتتىك-كاسىپكەرلىك كورپوراتسياسى» اق باسقارما توراعاسى رۇستەم قۋانىشباەۆتىڭ ايتۋىنشا, جوسپار بويىنشا جالپى 984 ۋچاسكەگە پاۆيلوندار ورنالاستىرۋ قاراستىرىلعان ەكەن. وتكەن ءۇش جىلدا سونىڭ 576 بويىنشا شارت جاسالىنىپتى. (409 شارت بويىنشا تۇراقتى جانە 114 شارت بويىنشا ماۋسىمدىق ساۋدا نىساندارى قويىلعان, 53-ءى بويىنشا پاۆيلوندار ورنالاستىرۋ ساتىسىندا). تاعى 206 شارت – ءوتىمدى ەمەس جەرلەردەن بەرىلگەن (ولار جىلۋ تراسساسىنىڭ بويىندا, تروتۋاردا, ت.س.س. جەرلەردە ورنالاسقان).
سونىڭ ارقاسىندا 1700 جاڭا جۇمىس ورىندارى اشىلىپ, 1,1 ملرد تەڭگەدەن استام ينۆەستيتسيا تارتىلدى. كاسىپكەرلەردىڭ ۇلتتىق پالاتاسى مەن ۇكىمەت اتالمىش باعدارلاماعا بىلتىر جوعارى باعا بەردى. 
«Astana» اكك بيىلدان باستاپ ەلەكتروندى اۋكتسيونعا كوشتى. وسى ارقىلى حالىققا ۋچاسكە ءبولۋ پروتسەستەرىنىڭ اشىقتىعى قامتاماسىز ەتىلدى. سونداي-اق مۇنان كەيىنگى ورناتىلاتىن بارلىق پاۆيلونداردىڭ ەسكيزدەرى بىرتەكتى بولاتىن بولدى.
– جىل سايىن باعدارلاما اياسىندا الەۋمەتتىك وسال توپ وكىلدەرىنە 15 ۋچاسكە بولىنەدى. سونداي-اق قازىرگى كۇنى كاسىپكەرلەردىڭ وڭىرلىك پالاتاسىمەن, قالالىق اكىمدىكپەن بىرلەسە وتىرىپ, ازاماتتاردىڭ بۇل توبىنا بولىنەتىن ۋچاسكەلەردىڭ سانىن 20-عا دەيىن كوبەيتۋ, نىسانداردىڭ ماقساتتىلىق تاعايىندالۋىن ۇلعايتۋ بويىنشا جۇمىستار جۇرگىزىلىپ جاتىر. ويتكەنى تۇرعىنداردان پاۆيلونداردىڭ ماقساتتىلىق تاعايىندالۋىن ۇلعايتۋ جونىندە وتىنىشتەر كوپتەپ تۇسەدى ەكەن, – دەدى رۇستەم قۋانىشباەۆ.
سونىمەن قاتار, الگى نىسانداردىڭ ارقايسىنىڭ QR كودتارى بار. مۇنداي كودتار پاۆيلونداردىڭ كورسەتكىش تاقتاسىندا بەرىلگەن. قاجەتسىنگەن كىسى سول ارقىلى پاۆيلوندار تۋرالى كەز كەلگەن مالىمەتتەردى الا الادى. وندا ۋچاسكەنىڭ كولەمى, يەسى, ماقساتتىلىعى, شارتتىڭ ءنومىرى جازىلعان.
«Astana» اكك كوشە ساۋداسىن جانداندىرۋ ءۇشىن كوپتەگەن جۇمىستار اتقارىپ جاتقانىمەن, جۇرتشىلىق اتالعان باعدارلامادان ءالى دە بولسا جەتكىلىكتى دەڭگەيدە قۇلاعدار ەمەس. سوندىقتان ونىڭ تانىمالدىعىن ارتتىرۋ ءۇشىن iQala قالالىق قىزمەتتەر ورتالىعىنىڭ مۇمكىندىكتەرىنە جۇگىنۋدىڭ پايداسى كوپ.
– ورتالىقتان ءبىز «1000 ورىن – كوشە ساۋداسى» باعدارلاماسى بويىنشا تۇراقتى تۇردە كەڭەس بەرىپ تۇراتىن ارنايى ورىن اشتىق. تاياۋ ۋاقىتتاردا وسى الاڭدا اشىق ەسىك كۇنىن وتكىزۋدى جوسپارلاپ وتىرمىز. شارا بارىسىندا باعدارلامانىڭ شارتتارى تۋرالى بۇگە-شىگەسىنە دەيىن ايتىپ بەرەتىن بولامىز, – دەدى ر.قۋانىشباەۆ.
كەڭەس وتىرىسىندا باعدارلامانى جۇزەگە اسىرۋ كەزىندە كەزدەسەتىن كەدەرگىلەر تۋرالى دا ايتىلدى. مىسالى, پاۆيلونداردىڭ اينالاسىنا كۇندەلىكتى تۇرمىستان ناتيجەسىندە ءتۇرلى قوقىستار جينالىپ قالادى. قوقىس سالالىق كاسىپورىندار مەن اۋداندىق اكىمدىكتەردىڭ بىرلەسكەن كۇشىمەن تۇراقتى شىعارىلىپ تۇرادى. تاعى ءبىر ماسەلە: كەزىندە اۆتوتۇراقتاردا, جىلۋ تراسساسىندا ورنالاسقان نەمەسە دۇرىس راسىمدەلمەگەن ۋچاسكەلەر بەرىلىپ كەتكەن. بۇل جايتتار جەكە-جەكە قارالىپ, قالالىق جەر كوميسسياسىنىڭ نازارىنا ۇسىنىلاتىن بولادى. اتالعان ۋچاسكەلەردىڭ تاعايىندالۋىن وزگەرتۋ نەمەسە ونىڭ يەلەرىنە جاڭا ۋچاسكەلەر بەرۋ ماسەلەسى قارالادى.
سونداي-اق باعدارلامانىڭ ءساتتى جۇمىس ىستەۋىنە جابايى ساۋدا بوگەت جاساپ تۇر. وسىعان وراي «Astana» اكك وكىلدەرى اۋداندىق اكىمدىك قىزمەتكەرلەرىمەن بىرگە تۇراقتى تۇردە قاداعالاۋلار جۇرگىزىپ تۇرادى. ويتكەنى قالانىڭ كەيبىر بۇرىشتارىنان قۇزىرلى ورگانداردىڭ رۇقساتىنسىز پاۆيلون اشىپ الۋ فاكتىلەرى كەزدەسەدى. ولارعا زاڭدى پاۆيلونداردىڭ QR كودتارىن سىرىپ الىپ, وزدەرىنە جاپسىرىپ قويادى نەمەسە اكىمدىك قىزمەتكەرلەرىنە «Astana» اكك-مەن جۇمىس ىستەيمىز دەپ الداپ جىبەرەدى. ولار ەشكىممەن ەشقانداي شارت جاساسپاستان, زاڭسىز ساۋداسىن جاساي بەرەدى. سويتە تۇرا, «Astana» اكك-ءنىڭ مۇنداي دۇڭگىرشەكتىڭ ارەكەتىن توقتاتۋعا, ايتپەسە ولارعا قاتىستى قانداي دا ءبىر شارا قولدانۋعا پارمەنسىز. ولارعا قارسى تەك سوتقا ارىزدانا الادى.
تاعى ءبىر جايت: پاۆيلونداردى ەلەكترمەن جابدىقتاۋ ماسەلەسى دە «1000 ورىن – كوشە ساۋداسى» باعدارلاماسىن جۇزەگە اسىرۋعا كوپ كەدەرگىسىن كەلتىرىپ تۇر. البەتتە, «استانا-رەك» بۇل ىستە قۇزىرەتتىلىگىنە ساي ورناتىلاتىن دۇڭگىرشەكتەردىڭ تەح.شارتتارىن ازىرلەپ, ەلەكتر جەلىسىن قوساتىن نۇكتەلەردى بەلگىلەپ بەرەدى. بىراق, ترانسفورماتورلىق كىشى ستانتسيالاردىڭ يەلەرى, پيك (پاتەر يەلەرى كووپەراتيۆى) وكىلدەرى كاسىپكەرلەردىڭ توق جەلىسىنە دەر كەزىندە قوسىلۋىنا مۇمكىندىك بەرە بەرمەيدى. ايتا بەرسە, پروبلەما از ەمەس. ولاردىڭ ءبارى جۇيەلى تۇردە شەشىمىن كۇتىپ تۇر.
…ايتا كەتەيىك, بۇگىندە جۇمىس ىستەپ تۇرعان 576 پاۆيلوننىڭ 206-ندا كوكونىس پەن جەمىس-جيدەك ساتىلادى, 196-سى – تەز تاماقتانۋ ورىندارى, 63-ى – ازىق-تۇلىك دۇڭگىرشەكتەرى, 47-ءسى – گۇل ساتۋ نىساندارى.
