كوشپەلى قوعامدىق قابىلداۋ
«جاريا» حالىقارالىق ورتالىعى» قوعامدىق قورى مەن «قىرعىزستان-استانا» قىرعىز ەتنومادەني ورتالىعى مەملەكەتتىك قىزمەت كورسەتۋ اياسىندا جەمقورلىققا قارسى مادەنيەتتى قالىپتاستىرۋ تاقىرىبىندا كوشپەلى قوعامدىق قابىلداۋ وتكىزدى.
«نۇر وتان» پارتياسىنىڭ استانا قالالىق فيليالى جانە قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنتىمەن بىرلەسكەن جۇمىس جوسپارىنا سايكەس, استانا قالاسىنىڭ كوشى-قون باسقارماسى مەن الماتى اۋدانىنىڭ حقكو قىزمەتكەرلەرىمەن كەزدەستى. وسىلايشا, ەڭبەك ميگرانتتارى قاتىسىنداعى كورسەتىلەتىن مەملەكەتتىك قىزمەتتىڭ ساپاسى جايىندا ءسوز قوزعالىپ, ازاماتتاردىڭ شاعىمدارىمەن تانىستى. ءىس-شارا بارىسىندا قوعامدا جەمقورلىققا قارسى مادەنيەتتىڭ قالىپتاسۋىنا بۇقارالىق اقپارات قۇرالدارىنىڭ, ازاماتتىق قوعامنىڭ ىقپالىن ارتتىرۋ ماسەلەسى دە قارالدى. استانا قالاسى ءىىد كوشى-قون پوليتسياسى باسقارماسىنىڭ باستىعى گۇلۆيرا دونەنباەۆا «ەكسپو-2017» كورمەسىنىڭ باستالۋىنا بايلانىستى جاڭا ەرەجەمەن تانىستىردى. «ەلورداداعى ەڭبەك ميگرانتتارى اراسىندا قىرعىزداردىڭ ۇلەس سالماعى باسىم. سوندىقتان دا قاتىسۋشىلارعا قىرعىز تىلىندە جازىلعان ەڭبەك ميگرانتىنىڭ قۇقىقتارى مەن قولدانىستاعى زاڭنىڭ تالاپتارى كورسەتىلگەن جادىناما تاراتىلدى. «1421» جەدەل جەلى ىسكە قوسىلىپ, ميگراتسيا سالاسىنداعى جەمقورلىق فاكتىلەرى تۋرالى ءتيىستى ورگاندارعا شاعىمدانۋعا مۇمكىندىك بەرىپ وتىر. وسى تۇرعىدا مۇددەلى ورگاندارمەن بىرلەسە وتىرىپ, جەمقورلىققا قارسى مادەنيەتتى قالىپتاستىرا الامىز» دەدى «قىرعىزستان-استانا» قىرعىز ەتنومادەني ورتالىعىنىڭ جەتەكشىسى شاۆكات يسمايلوۆ.
ايگۇل ۋايسوۆا