جاقىندا ەلوردادا كەزەكتە تۇرعان وتباسىلارعا پاتەر كىلتى تابىستالدى. سونداي قۋانىشقا كەنەلگەن شاڭىراقتىڭ ءبىرى – كۇبان اجەمىزدىڭ وتباسى. ءبىز قۋانىش يەلەرىنە قۇتتى بولسىن ايتىپ بارىپ, كەيۋانانى اڭگىمەگە تارتتىق.
– بۇل اتالارىڭ مايقاننىڭ اماناتى عوي! ءتىرى كەزىمدە جاڭا پاتەردى كورگەنىمە شىن قۋاندىم. استانانىڭ باسشىلارىنا راقمەت! – دەيدى اپامىز.
«مايقاننىڭ اماناتى» دەگەندى نەمەرەسى تالعار مىرزابەك ءتۇسىندىرىپ بەردى. بۇعان دەيىن ەلوردانىڭ ىرگەسىندەگى قىزىلجار اۋىلىندا تۇرادى. سودان شاڭىراق يەسى مايقان اتامىز قالادا قولىمىزدى ىستىق سۋعا سالىپ, كۇتىنەيىك دەگەن ماقساتپەن باسپانا كەزەگىنە تۇرادى. بۇل 2008 جىل بولاتىن. سودان كۇن ارتىنان كۇن ءوتىپ, ۋاقىت زىمىراپ وتە بەرەدى. 2014 جىلى اتامىز باقيلىق بولىپ, تۇرعىن ءۇي كەزەگىندەگى كەزەكتىلىك اجەمىزگە اۋىسادى.
بيىل كۇبان اجەمىز ءسۇيىنشى جاڭالىقتى ەستىگەندە نە سەنەرىن, نە سەنبەسىن بىلمەيدى. قولىنداعى قىزى جانات باس قالاداعى نۇرعيسا تىلەنديەۆ كوشەسى 44/2 مەكەن جايىنداعى كوپ قاباتتى تۇرعىن ۇيگە اپارىپ, جاڭا پاتەردى اشقاندا عانا شۇكىرشىلىگىن ايتىپ, باسشىلارعا العىسىن جاۋدىرادى.
– ەكىنشى قىزىم جاناتتىڭ قولىندا تۇرامىن. قارتايعاندا ءوزىڭنىڭ جىلى ۇيىڭە كىرىپ-شىعىپ جۇرگەنگە نە جەتەدى؟ بۇل وتاعاسىمنىڭ ارمانى ەدى. ورىندالدى! شۇكىر, بۇل كۇنگە مەن جەتتىم. ۇكىمەتكە, قالانىڭ باسشىلارىنا راقمەت! ەلىمىز تىنىش, جەرىمىز ءبۇتىن بولسىن, – دەيدى قۋانىش يەسى.
ءسويتىپ, باسپانا كەزەگىندە تۇرعان 82 جاستاعى اجەمىز پاتەرلى بولدى.
بيىل استانادا 6,5 مىڭ الەۋمەتتىك پاتەر سالىنادى دەپ جوسپارلانعان ەدى. مىنە, كۇبان اجەمىزدىڭ قۋانىشى – سونداي يگىلىكتى ءىستىڭ ناتيجەسى.
بيىل رەسپۋبليكا بويىنشا باسپانا كەزەگىندە تۇرعان ادامداردىڭ سانى 647 مىڭنان استى. بىراق ولاردىڭ اراسىندا زاڭ تالاپتارىنا ساي كەلمەيتىن ازاماتتار دا از ەمەس. وسىنى جان-جاقتى زەردەلەگەن يندۋستريا جانە قۇرىلىس مينيسترلىگى باسپانا كەزەگىندە تۇرعان 223 مىڭ ۇمىتكەردى تىزىمنەن شىعارۋدى ۇيعاردى. ويتكەنى ولاردىڭ اراسىندا جەكە باسپاناسى بارى انىقتالدى. ياعني باسپاناعا تەزىرەك قول جەتكىزۋگە جول اشىلدى.
