ە.راحماديەۆ اتىنداعى مەملەكەتتىك اكادەميالىق فيلارمونيانىڭ «سارىارقا» فولكلورلىق ءانسامبلى ححV كونتسەرتتىك ماۋسىمىن كۇيشى-كومپوزيتور اققىز (مۇگىلسىم) احمەتقىزىنىڭ 125 جىلدىعى مەن قازاقستاننىڭ حالىق ءارتىسى ماعاۋيا ءحامزيننىڭ 95 جىلدىعىنا ارنالعان «كۇي عۇمىر» كونتسەرتىمەن اشتى. كەش «استانا وپەرا» تەاترىنىڭ كامەرالىق زالىندا ءوتتى.
اققىز دەگەن اتپەن تانىمال مۇگىلسىم احمەتقىزى (1897−1987) تاتتىمبەتتىڭ كۇيشىلىك مەكتەبىن جالعاستىرۋشى, ونىڭ «قوسباسار», «سارجايلاۋ», «بەستورە» سىندى كۇيلەرىن ۇستاپ قالعان كۇيشى. ءوز جانىنان «قايران ەلىم», «اققىز», «جەتىم قىز», «قوسباسار», «قوڭىر كۇي» سىندى بىرنەشە كۇيدى, «جالعان-اي», «قايران باۋىرلارىم», «امان بول, امال قانشا», «ساعىنىش», «حانشايىم» اندەرىن قالدىردى. ال ماعاۋيا حامزين (1927−2000) – اققىزدىڭ شاكىرتى.
«كۇي عۇمىر» كەشىندە اققىز بەن ماعاۋيا حامزيننىڭ «قوسباسار», «جەتىم قىز», «قايران ەلىم», «عارىشكەرلەر ءۆالسى», «بەلگىسىز سولدات», «جايلاۋ» سىندى كۇيلەرى ورىندالدى.
قازاقستاننىڭ ەڭبەك سىڭىرگەن قايراتكەرى ەرنار مىڭتاەۆتىڭ جەتەكشىلىگىمەن ع.جۇبانوۆا اتىنداعى مەملەكەتتىك ىشەكتى اسپاپتار كۆارتەتىنىڭ ونەرى كەشتىڭ ەرەكشە كوركى بولدى. فيلارمونيا سوليستەرى, كومپوزيتورلار ارمان جايىموۆ پەن قۋات شىلدەباەۆتىڭ زاماناۋي ينتەرپرەتاتسياسىندا تاتتىمبەت پەن تولەگەن مومبەكوۆ كۇيلەرىن ورىندادى.
«ەكى كۇيشىنى ءبىر كونتسەرتتە بىرىكتىرگەنىمىز بەكەر ەمەس. ويتكەنى اققىز – ماعاۋيا ءحامزيننىڭ ۇستازى. ەكەۋى دە كۇيدىڭ ارقا ورىنداۋشىلىق مەكتەبىنىڭ مۇراگەرلەرى, شەرتپە ءداستۇرىن جالعاستىرۋشىلار. تاتتىمبەت, قىزداربەك, سەمبەك, ءابدي سەكىلدى كۇيشىلەر كەتىپ قالعاندا اققىز ولاردىڭ مۇراگەرى بولىپ قالدى. دينا شەشەمىز قۇرمانعازىنىڭ كۇيلەرىن جەتكىزگەن بولسا, اققىز تاتتىمبەت مەكتەبىن جەتكىزدى. ال, ماعاۋيا حامزينمەن بىرىكتىرگەن سەبەبىمىز ماعاۋيا – اققىزدىڭ شاكىرتى. تاريحتان بىلەمىز, قۇرمانعازىنىڭ ءستيلىن دينا جالعاستىرسا, دينانىڭ ءوزىنىڭ بولەك مەكتەبى بار. سول سەكىلدى, اققىز دا ءوز مەكتەبىن قالىپتاستىردى» دەيدى «سارىارقا» ءانسامبلىنىڭ كوركەمدىك جەتەكشىسى, حالىقارالىق جانە رەسپۋبليكالىق بايقاۋلاردىڭ لاۋرەاتى توعجان جاحين.
كونتسەرتتە «سارىارقا» ءانسامبلى جانە شەرتپە كۇي شەبەرلەرى جانعالي ءجۇزباي, قايرات ايتباەۆ, مارات نوكەەۆ, ەربولات ساپۋانوۆ, امانگەلدى ءسادۋوۆ, رۇستەم نۇركەنوۆ ونەر كورسەتتى. ارنايى شاقىرىلعان قوناقتار اققىزدىڭ شاكىرتى قالكەن قاسىموۆ پەن كۇيشى, اققىزدىڭ جيەنى بولات تاكىشەۆ قاتىستى. كەش قاتىسۋشىلارىنا ە.راحماديەۆ اتىنداعى مەملەكەتتىك اكادەميالىق فيلارمونيانىڭ باس ديرەكتورى ەرلان داكەنوۆ العىس حات تاپسىردى.
