وتكەن سەنبى كۇنى استانادا «ەۋرازيا» XIII حالىقارالىق كينوفەستيۆالى باستالدى. وسىعان وراي «وسكار», «التىن گلوبۋس» سىندى كينوونەرىندەگى بەدەلدى سىيلىقتاردىڭ يەگەرى, امەريكالىق اكتەر, پروديۋسەر, كينورەجيسسەر نيكولاس كەيدج جانە «پيانيست» كوركەم فيلمىنەن كەيىن اتى الەمگە تانىلعان «وسكار» مەن «سەزار» سىيلىقتارىنىڭ لاۋرەاتى ەدريان بروۋدي ەلوردا توپىراعىنا تابان تيگىزدى.
كينو الەمىندەگى ايتۋلى وقيعاعا قاتىسۋشىلارعا قازاقستان پرەزيدەنتى نۇرسۇلتان نازارباەۆ قۇتتىقتاۋ حاتىن جولدادى. ونى مادەنيەت جانە سپورت ءمينيسترى ارىستانبەك مۇحامەديۇلى وقىپ بەردى.
«بۇل فورۋم قازاقستاننىڭ مادەني ومىرىندەگى ايتۋلى وقيعالاردىڭ ءبىرى ءارى ورتالىق ازياداعى باستى كينوفەستيۆال الاڭى سانالادى. اشىق فورمات پەن ونىڭ كرەاتيۆتى تۇجىرىمداماسى وزىق تاجىريبەمەن جانە شىعارماشىلىق يدەيالارمەن تابىستى ءبولىسۋ ءۇشىن قولايلى جاعداي قالىپتاستىرادى. بيىل كينوفەستيۆالدىڭ «ەكسپو-2017» حالىقارالىق مامانداندىرىلعان كورمەسى اياسىندا ءوتىپ جاتقانىنىڭ سيمۆولدىق ءمانى بار. كورمەنىڭ «بولاشاقتىڭ ەنەرگياسى» اتتى تاقىرىبى كينوفورۋمنىڭ تەڭدەستىرىلگەن ءارى ۇيلەسىمدى الەم قۇرۋ جونىندەگى نەگىزگى ميسسياسىمەن ۇندەس. وسى كينوفورۋم وتاندىق كينەماتوگرافيانىڭ ودان ءارى دامۋى مەن تانىمالدىلىعىن ارتتىرۋعا, ءبىزدىڭ ءوڭىر مەن جالپى الەمدەگى كينوونەرىنىڭ ءرولىن كوتەرۋگە اتسالىساتىنىنا سەنىمدىمىن. كينوفەستيۆالگە ءساتتى تۇساۋكەسەرلەر, جاڭا ەسىمدەر مەن قىزىقتى تۋىندىلار, ال كورەرمەندەرگە ۇمىتىلماس جارقىن اسەرگە بولەنۋىن تىلەيمىن» دەلىنگەن مەملەكەت باسشىسىنىڭ قۇتتىقتاۋىندا.
– قازاقستانعا كەلىپ, «ەكسپو-2017» كورمەسىن تاماشالاۋدى وزىمە ۇلكەن مارتەبە كورىپ وتىرمىن. سىزدەردىڭ عاجايىپ مەملەكەتتەرىڭىزگە العاش مارتە تابان تيگىزدىم. استانا كەلگەن ادامنىڭ بويىنا قانات بىتىرەدى ەكەن. كينو قارىم-قاتىناستىڭ امبەباپ ءتىلى بولىپ سانالادى. كينو ونەرى ارقىلى ءارتۇرلى وقيعالار جايلى اڭگىمە شەرتىپ, بۇكىل الەمگە تاراتا الامىز. كينوفيلمدەردىڭ كومەگىمەن ءبىز سەزىمدەرىمىزدى بۇركەمەلەمەي, ءبىر-بىرىمىزگە كومەك بەرىپ, تۇسىنىسە الامىز. كينونىڭ ارقاسىندا كەز كەلگەن مادەني كەدەرگىلەردى جويا الامىز دەپ ويلايمىن, – دەدى نيكولاس كەيدج.
اتى اڭىزعا اينالعان ءانشىمىز بيبىگۇل تولەگەنوۆا ونىڭ قولىنان كينوفەستيۆالدىڭ ۇيىمداستىرۋ كوميتەتى تاعايىنداعان «كينەماتوگرافيا ونەرىنە قوسقان ۇلەسى ءۇشىن» اتتى ارنايى سىيلىقتى الدى.
فەستيۆالدىڭ ءوزى قازاق كينوسىنىڭ تاريحىنا التىن ارىپتەرمەن جازىلعان سۇلتان قوجىقوۆتىڭ «قىز جىبەك» فيلمىمەن اشىلدى. جوعارىداعى ارنايى سىيلىقتى وسى كينوتۋىندىدا باستى بەينەلەردى سومداعان قۇمان تاستانبەكوۆ پەن مەرۋەرت وتەكەشوۆاعا تاعى ءبىر گولليۆۋد جۇلدىزى ەدريان بروۋدي تاپسىردى.
– استاناعا سوڭعى رەت وسىدان بەس جىل بۇرىن كەلگەن ەدىم. سودان بەرى قالالارىڭىزدىڭ قۇلپىرىپ شىعا كەلگەنىن كورىپ وتىرمىن. وسىنشاما ىستىق قۇشاقپەن ءوزىمدى قازاقستاننان وزگە ەلدە قارسى المايدى. سول ءۇشىن سىزدەرگە مىڭ دا ءبىر العىس! قازىر ەلدەرىڭىز تۋرالى ءبىرشاما ءبىلىپ قالدىم. استانا – وتە اسەم قالا. مۇنداعى ساۋلەت ونەرىنىڭ ءار بولشەگىندە عاجاپ سىر جاتىر. استانادا مادەنيەت پەن ونەردىڭ تىنىسى بىردەن سەزىلەدى. «ەكسپو-2017» كورمەسىن بارىپ كورۋگە ۇلگەرىپ, تاۋسىلماس اسەر الدىم. قازاقستاندا ەڭ زاماناۋي «جاسىل ەنەرگيا» تەحنولوگياسى ەنگىزىلىپ جاتقانىنا كوزىم جەتتى. بۇگىندەرى الەم جىلدام وزگەرۋدە. سودان ءبارىمىز ءبىر-بىرىمىزگە ۇقساپ بارامىز. سىزدەردىڭ باي رۋحاني مۇرالارىڭىز بار. جالعىز ايتارىم, وسى ۇلتتىق بىرەگەيلىكتەن ايىرىلماڭىزدار, – دەدى ەدريان بروۋدي.
فەستيۆالدىڭ سالتاناتتى اشىلۋىندا كسرو حالىق ءارتىسى بيبىگۇل تولەگەنوۆا, «ەۋرازيا» حالىقارالىق كينوفەستيۆالىنىڭ پرەزيدەنتى, قر حالىق ءارتىسى, قازاقستاننىڭ ەڭبەك ەرى ايمان مۇساقوجاەۆا, بيىل ونەرىمەن الەمدى ءدۇر سىلكىندىرگەن ديماش قۇدايبەرگەنوۆ ونەر كورسەتىپ, حالىقتىڭ زور قوشەمەتىنە بولەندى.
بيىلعى كينوفەستيۆال باعدارلاماسىنا الىس جانە جاقىن شەتەلدەردەن, قازاقستان مەن ورتالىق ازيادان 296 فيلم ەنگەن. ال ولاردىڭ ىشىندەگى تاڭداپ الىنعان 101 فيلم نەگىزگى كونكۋرسقا قاتىسىپ جاتىر. سونداي-اق, 14 ءفيلمنىڭ الەمدىك پرەمەراسى, 11 كينوتۋىندىنىڭ ازيالىق تۇساۋكەسەرى وتۋدە. سونىڭ ىشىندە 28 شىلدە كۇنى نەگىزگى كونكۋرستىڭ قازىلار القاسىنىڭ تالقىسىنا ەلىمىزدىڭ اتىنان ءسابيت قۇرمانبەكوۆتىڭ «ورالمان» ءفيلمى ۇسىنىلادى. سونداي-اق, العاشقى كۇننەن 2016-2017 جىلدارى جاڭالىق بولعان وتاندىق تۋىندىلار كورسەتىلۋدە. ولاردىڭ اراسىندا رۇستەم ءابدىراشتىڭ «قازاق حاندىعى: الماس قىلىش» ءفيلمى دە بار.
مۇنىمەن قاتار كينوفەستيۆال اياسىندا قازاقستان رەسپۋبليكاسى تۇڭعىش پرەزيدەنتى قورىنىڭ قولداۋىمەن «بەس قۇرلىق» بالالار كينوفەستيۆالى ۇيىمداستىرىلدى. 5 فيلمنەن قۇرالعان كونكۋرستىق, جانە 10 فيلمنەن قۇرالعان كونكۋرستان تىس باعدارلامادا قازاقستان, فرانتسيا, نيدەرلاند, قىتاي, اۋعانستان, يران, تۋنيس, پەرۋ, ءۇندىستان, مەكسيكا, يسپانيا, يتاليا, دانيا, گرۋزيا جانە ت.ب. ەلدەردىڭ شىعارماشىلىق توپتارىنىڭ جۇمىستارى كينوسۇيەر قاۋىمنىڭ نازارىنا ۇسىنىلۋدا. مۇندا «ۇزدىك فيلم», «ۇزدىك ستسەناري» جانە «ۇزدىك بالا بەينەسى» اتالىمدارىندا جەڭىمپازدار انىقتالادى.
«ەۋرازيا» XIII حالىقارالىق كينوفەستيۆالى باعدارلاماسىنا ەنگەن فيلمدەردى «Mega Silk Way» ساۋدا-ويىن-ساۋىق ورتالىعىنداعى «Chaplin Cinemas» كينوتەاترىندا 28 شىلدەگە دەيىن كۇندەلىكتى تاماشالاۋعا بولادى.
امانعالي قالجانوۆ
