سەيسەنبى كۇنى استانا قالاسى اكىمىنىڭ ءبىرىنشى ورىنباسارى سەرگەي حوروشۋننىڭ ءتوراعالىعىمەن كوپپاتەرلى تۇرعىن ۇيلەرگە ۇلەستىك قاتىسۋ ماسەلەلەرى جونىندەگى ۆەدومستۆوارالىق كوميسسيانىڭ كەزەكتى وتىرىسى ءوتىپ, وندا نىسانداردى سالۋ بارىسىندا زاڭ بۇزۋشىلىققا جول بەرگەن 12 قۇرىلىس كومپانياسىنىڭ جايى تالقىلاندى.
ەلوردادا باسپانالى بولۋ – باستى ماسەلە. بىراق قالاي دا ءۇيلى بولامىن دەپ, كەز كەلگەن قۇرىلىس كومپانياسىنا قاراجات سالا بەرۋگە بولمايدى. اكىمنىڭ ءبىرىنشى ورىنباسارى سەرگەي حوروشۋننىڭ ايتۋىنشا, بۇگىندە تۇرعىن ۇيگە قاتىستى تۇيتكىلدىڭ ءبىرى – كەيبىر كومپانيالاردىڭ رۇقسات قۇجاتتارى بولماسا دا پاتەرلەردى ساتىلىمعا شىعارۋى بولىپ تۇر.
قۇرىلىس سالاسى – ەلوردا اكىمدىگىنىڭ ەرەكشە نازارىندا. جەرگىلىكتى بيلىك اكىمدىك سايتىنداعى «ۆيرتۋالدى قابىلداۋ بولمەسى» مەن «حالىقتىق باقىلاۋ» ايدارلارىنا كەلىپ تۇسكەن تۇرعىنداردىڭ ارىز-شاعىمىنا قاراي قۇرىلىستاردى ۇنەمى تەكسەرىپ, باقىلاپ وتىرادى. بۇگىندە قۇرىلىس سالۋ بارىسىندا زاڭدىلىقتى ساقتاماعان 41 نىسان انىقتالىپ وتىر. تاعى جەتى نىساننىڭ قۇرىلىس-مونتاجداۋ جۇمىستارىندا كەم-كەتىكتەر مەن ءوز ەركىمەن باسىپ الۋ دەرەكتەرى تىركەلگەن.
كەزەكتى جيىندا وسىنداي 12 قۇرىلىس نىسانىنىڭ ماسەلەسى قارالىپ, ولاردىڭ وكىلدەرىنەن تۇسىنىكتەمە الىندى.
مەملەكەتتىك ساۋلەت-قۇرىلىس باقىلاۋ باسقارماسى باسشىسىنىڭ ورىنباسارى داۋلەت دوسقۇلوۆ الدىمەن «استانادوريندۋستريا» جشس سالىپ جاتقان «بەيبارىس» تۇرعىن ءۇي كەشەنىنە توقتالدى. «بۇل نىساندى تۇرعىزۋ ءتورت كەزەڭگە بولىنگەن. قۇرىلىس سالۋشى نىساننىڭ ءبىرىنشى كەزەگى بويىنشا ەسكيزدىك جوبانى ماقۇلداعان, قۇرىلىسقا رۇقسات قۇجاتى بار جانە قۇرىلىس-مونتاجداۋ جۇمىستارى باستالعان. الايدا, قۇرىلىسشىلار نىساننىڭ ەكىنشى, ءۇشىنشى كەزەگىن ەشقانداي رۇقسات قۇجاتتارىنسىز جۇرگىزىپ وتىر. بۇعان قوسا, ولار ءتيىستى ليتسەنزيانىڭ جوقتىعىنا قاراماستان, ۇلەسكەرلەردىڭ قاراجاتىن تارتىپ, پاتەرلەردى زاڭسىز ساتۋمەن اينالىسقان» دەدى باسقارما باسشىسىنىڭ ورىنباسارى.
«SatConstructionGroup» جشس سالىپ جاتقان «سەمەينىي» تۇرعىن ءۇي كەشەنىنىڭ رۇقسات قۇجاتتارىنىڭ قاتارىندا ەسكيزدىك جوبانىڭ كەلىسىمى مەن جۇمىس جوباسىنىڭ مەملەكەتتىك ساراپتاماسى بار, ال قۇرىلىس سالۋعا رۇقسات ازىرشە نىساننىڭ قاڭقاسىن تۇرعىزۋعا عانا بەرىلىپتى. قالعان قۇجاتتارى تۇگەل ەمەس.
ال سىعاناق پەن ش.بەيسەكوۆا كوشەلەرىنىڭ قيىلىسىندا ورنالاسقان «كوركەم تاۋەر» تۇرعىن ءۇي كەشەنىنىڭ (قۇرىلىس سالۋشى – IndustrialInnovationGroup» جشس) قۇجاتتارىندا ەسكيزدىك جوبا كەلىسىمى, جۇمىس جوباسىنىڭ مەملەكەتتىك ساراپتاماسى بولعانىمەن, بارلىق نىساندى سالۋعا بەرىلەتىن رۇقسات قۇجاتى بولماي شىقققان.
بۇدان وزگە, زاڭدى بەلدەن باسىپ, ءتيىستى قۇجاتتارى تۇگەل بولماسا دا جارناماسىن جاريالاپ, پاتەرلەردى ساتىپ كەلگەن مىناداي قۇرىلىس نىساندارىنىڭ اتى بەلگىلى بولدى:
«ەلىماي» تك («وتاۋسيتي» تقك), «تۇران كۆارتالى» (توو «قازستروي ت-ي-ا»), №199 بەن س304 كوشەلەرىنىڭ قيىلىسىندا ورنالاسقان تۇرعىن ءۇي كەشەنى (قۇرىلىس يەسى – «اگروپرومگراجستروي»), «ەكودوم» تك («نۇر نۇر» تقك),»زەرە – 2» تك («التىن ساپا 2011» جشس), «لەيا+» پەن تك «لەيا سارىبۇلاق» («BestRealEstate» جشس), «لازۋرنىي بەرەگ» تك («سيمۋرگ 2000» جشس) جانە سىعاناق كوشەسىنىڭ وڭتۇستىك ءبولىگىندە, تۇران داڭعىلىنىڭ باتىسىندا جوبالانعان كوپپاتەرلى تۇرعىن ءۇي كەشەنى, قۇرىلىس سالۋشىسى – ليتۆاك گريگوري بوريسوۆيچ.
اتالعان نىسانداردىڭ قۇجاتتارى تولىق ەمەس, ارقايسىسىندا شيكىلىكتەر بار. سوعان قاراماستان قۇرىلىس سالۋشىلار پاتەرلەردى ساۋداعا شىعارىپ كەلگەن.
استانا اكىمىنىڭ ءبىرىنشى ورىنباسارى سەرگەي حوروشۋن قالا تۇرعىندارىن قاراجاتىن ۇيگە سالاردا كۇماندى كومپانيالاردان اۋلاق بولۋعا شاقىردى. الدىمەن قۇرىلىس كومپانياسىنىڭ قۇجاتتارىن سۇراستىرىپ, ءتيىستى رۇقسات قاعازدارىن تۇگەل تەكسەرىپ العانى ءجون نەمەسە اكىمدىككە, وعان قاراستى ءتيىستى باسقارمالاردىڭ كومەگىنە جۇگىنۋگە بولادى. مۇنداي اقپاراتتى ءبىلگىسى كەلگەن تۇرعىندار استانا قالاسى اكىمدىگىنىڭ www.astana.gov.kz سايتىن قاراۋعا نەمەسە ساۋلەت جانە قالا قۇرىلىسى باسقارماسى مەن مەملەكەتتىك ساۋلەت-قۇرىلىس باقىلاۋ باسقارماسىنا حابارلاسۋعا بولادى. ولار سۇراۋ جىبەرىلگەن قۇرىلىس نىسانى تۋرالى تولىققاندى مالىمەت بەرۋگە ارقاشان دايىن.
قىمبات توقتامۇرات
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
