كۇمىسبەكوۆ كۇيلەرى كۇمبىرلەدى

بيىل كورنەكتى كومپوزيتور, قازاقستاننىڭ حالىق ءارتىسى, مەملەكەتتىك سىيلىقتىڭ يەگەرى كەنجەبەك كۇمىسبەكوۆتىڭ تۋعانىنا 90 جىل تولادى. كومپوزيتوردىڭ شوقتىعى بيىك شىعارمالارىنىڭ ءبىرى – «دالا سىرى» سيمفونيالىق داستانى. وسىعان وراي «استانا» كونتسەرت زالىندا استانا قالاسى مەملەكەتتىك اكادەميالىق فيلارمونياسى قازاق وركەسترىنىڭ اتالمىش داستانمەن اتتاس كونتسەرتى ءوتتى.

ارقا جەرىندە دۇنيەگە كەلگەن كومپوزيتور وسى ءوڭىردىڭ باي مۋزىكالىق ءداستۇرىن بويىنا ءسىڭىرىپ ءوستى. سوندىقتان دا ونىڭ ارتىنا قالدىرعان مۇراسى ۇلتتىق بوياۋىنىڭ قانىقتىعىمەن ەرەكشەلەنەدى. ماسەلەن, جوعارىدا اتالعان «دالا سىرى» داستانىندا ول ءوز شىعارماشىلىعىن حالىق مۋزىكاسىمەن, حالىق كومپوزيتورلارى تۋىندىلارىمەن ۇشتاستىرا ءبىلدى. داستاندى مۇقيات تىڭداعان ادامنىڭ قۇلاعىنا ۇلى ابايدىڭ «كوزىمنىڭ قاراسى» ءانىنىڭ سازى انىق ەستىلەدى.
جالپى, كەنجەبەك كۇمىسبەكوۆ – اباي ولەڭدەرىن ونەرىنىڭ وزەگىنە اينالدىرعان كومپوزيتورلاردىڭ بىرەگەيى. مىسالى, دانىشپانىمىزدىڭ «دومبىراعا قول سۇقپا», «قالقام-اي, مەن ۇندەمەي جۇرەمىن كوپ» ولەڭدەرىنە ءان-رومانستار جازدى. بۇعان قوسا, «قورقىت تۋرالى اڭىز», «فارابي سازى», «ىقىلاس تۋرالى پوەما», «شالقىما», «سارىوزەن سازدارى» سياقتى مۋزىكالىق پوەما جانرىنا جاتاتىن كەسەك تۋىندىلاردى دۇنيەگە اكەلدى.
وسىلارمەن قاتار, قازاقتىڭ كۇي ونەرىنىڭ ورىستەۋىنە ءبىرشاما ەڭبەك ءسىڭىردى. سونىڭ ىشىندە «ءبيشى قايىڭ», «امانات», «ارمان», ت.ب. كۇيلەردى ۇلتتىڭ قورجىنىنا قوستى.
قازاق وركەسترىنىڭ كوركەمدىك جەتەكشىسى-باس ديريجەرى, قر ەڭبەك سىڭىرگەن قايراتكەرى, پروفەسسور ايتقالي جايىموۆ پەن وسى ونەر ۇجىمىنىڭ ديريجەرى, قر مادەنيەت قايراتكەرى نۇرلان بەكەنوۆتىڭ باعىتتاۋىمەن وركەستر «دالا سىرىنان» باستاپ جوعارىدا اتالعان بىرقاتار شىعارمالاردى ورىندادى.
كەنجەبەك كۇمىسبەكوۆ – كۇردەلى تۋىندىلارمەن قاتار, ەل اراسىندا ايتىلىپ جۇرگەن بىرنەشە ءاننىڭ دە اۆتورى. «مەنىڭ دالام», «اياۋلى مەنىڭ مەكەنىم», «دومبىراشى قۇربىما», «جار نازى», «اق اقمولا – استانا», «قارقارالى» سىندى اندەردى فيلارمونيا سوليستەرى شىرقادى.
بۇل كونتسەرتتە كوزى تىرىسىندە دوستارى «قازاقتىڭ بەتحوۆەنى» اتاپ كەتكەن كومپوزيتوردىڭ ەسىمى جاڭعىردى. ءان اۋەلەپ, كۇي كۇمبىرلەگەن كەشتە كەنجەبەك كۇمىسبەكوۆتىڭ شىعارماشىلىعى اشىلعانداي بولدى.

امانعالي قالجانوۆ