استانا قالاسى ءماسليحاتىنىڭ كەزەكتى سەسسياسىندا قالا ءومىرىنىڭ ماڭىزدى سالالارىنا قاتىستى ماسەلەلەر قارالىپ, ونىڭ وڭ شەشىمدەرى دەپۋتاتتار قولداۋىنا يە بولدى. سەسسيانىڭ كۇن تارتىبىندەگى ەلورداداعى قۇقىقتىق ءتارتىپتى قورعاۋ جانە قوعامدىق قاۋىپسىزدىكتى قامتاماسىز ەتۋ شارالارى بارىسىن دەپۋتاتتار ۇنەمى نازاردا ۇستاپ كەلەدى.
استانالىق ىشكى ىستەر دەپارتامەنتى جەكە قۇرامىنىڭ 42 پايىزى عانا قىزمەتكە قولايلى ورىن-جايمەن قامتاماسىز ەتىلگەنىنەن حالىق قالاۋلىلارى بەيحابار ەمەس. سەسسيا الدىندا ولار قۇقىق قورعاۋ ورگاندارىنىڭ جۇمىسىمەن تانىسىپ, بارلىق جايتتى ءوز كوزدەرىمەن كورىپ كەلگەن بولاتىن. دەپۋتاتتار ءتارتىپ ساقشىلارىنىڭ كەڭسەلەرى تالاپقا ساي كەلمەيدى دەگەن توقتامعا كەلگەن-ءدى. مىسالى, سارىارقا اۋداندىق ءىىد 1968-1969 جىلدارى سالىنعان عيماراتتا ورنالاسقان. ودان بولەك, وسى قىزمەتكە بولىنگەن 1906, 1946 جانە 1976 جىلعى كونە ۇيلەردىڭ اپاتتى جاعدايى جۇمىستى ۇيلەستىرۋدە ءبىرشاما قولايسىزدىق تۋىنداتىپ وتىرعانى دا راس. ال, ەسىل اۋدانىنىڭ ءىىد جالعا الىنعان ەكى كوتتەدجدە ورنالاسقان سەبەپتى, جىل سايىن بىرنەشە ميلليونداعان قاراجات وسىعان ءبولىنىپ وتىر.
استانا قالاسى ىشكى ىستەر دەپارتامەنتىنىڭ باستىعى امانتاي اۋباكىروۆ ەلوردا دا قوعامدىق قاۋىپسىزدىك پەن قۇقىقتىق ءتارتىپتى قورعاۋ بارىسىنداعى اتقارىلعان جۇمىستاردىڭ ءناتيجەلەرىنە تالداۋ جاسادى.
دەپۋتاتتاردىڭ قالالىق پوليتسەيلەردىڭ قىراعىلىعىن ەسەلەيتىن ەكسپو-2017 حالىقارالىق كورمەسى وتەتىن كەزەڭگە قانداي دايىندىقپەن كەلىپ وتىر دەگەن سۇراقتارىنا دا تولىمدى جاۋاپ الىندى. وسى كۇنگە دەيىن كۇندەلىكتى جۇمىستارىنان بولەك, ءتارتىپ ساقشىلارى اعىلشىن تىلىندە اۋىزەكى سويلەسۋدى ۇيرەنسە, اراسىندا العاشقى دارىگەرلىك كومەك كورسەتۋ بويىنشا دا بىلىمدەرىن ارتتىرۋ ۇستىندە ەكەن.
سەسسيادا قالالىق مۇگەدەكتەر قاتارىنداعى كەمتار بالالاردى ۇيدە وقىتۋعا جۇمساعان شىعىندارىن ءوندىرىپ الۋ ءتارتىبى مەن مولشەرى تۋرالى قارالىپ, ماقۇلداندى. وسىعان سايكەس, شىعىنداردى وتەۋ ءوتىنىش ءبىلدىرگەن ايدان باستاپ «استانا قالاسىنىڭ ءبىلىم باسقارماسى» مەملەكەتتىك مەكەمەسى جانىنداعى ۆەدومستۆوارالىق پسيحولوگيالىق-مەديتسينالىق-پەداگوگيكالىق كونسۋلتاتسيا قورىتىندىسىندا بەلگىلەنگەن مەرزىم اياقتالعانعا دەيىن ۇسىنىلاتىن بولادى.
سونىمەن بىرگە, وسى جيىندا ءماسليحاتتىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسياسىنىڭ ەسەبى تىڭدالدى. كوميسسيا توراعاسى ءماجيت شايداروۆ حالىقتى الەۋمەتتىك قورعاۋ, ءبىلىم بەرۋ, جاستار ساياساتى, سالاماتتى ءومىر سالتىن قالىپتاستىرۋ, مادەني مۇرالاردى ساقتاۋ بويىنشا جۇمىستاردى ءتيىمدى جۇرگىزۋدەگى دەپۋتاتتار تاراپىنان جاسالعان ناقتى قادامدارعا توقتالدى. كۇن تارتىبىنە ەنگىزىلگەن مەملەكەتتىك قاجەتتىلىكتەر ءۇشىن جەر ۋچاسكەلەرىن جانە وندا
ورنالاسقان جىلجىمايتىن مۇلىك وبەكتىلەرىن ساتىپ الۋ تۋرالى شارتتاردىڭ جوبالارى ماقۇلداندى.
ايگۇل ۋايسوۆا
