كۇن سۋىعاننان بەرى ەلوردانىڭ كوممۋنالدىق شارۋاشىلىق سالاسىنىڭ ماماندارى كۇشەيتىلگەن تارتىپكە كوشىپ, ەڭبەك كورىگىن قىزدىرا ءتۇستى. دۇيسەنبى كۇنى تۇندە استانا قالاسىنىڭ اكىمى اسەت يسەكەشەۆتىڭ ءوزى باس بولىپ, رەيدكە شىعىپ, جۋرناليستەرمەن بىرگە قالاداعى قار تازالاۋ جۇمىستارىن ارالادى.
– كۇننىڭ كۇرت سۋىتىپ كەتۋىنە بايلانىستى جەدەل شتاب توبى قۇرىلدى, – دەپ باستادى ءسوزىن استانا اكىمى. – بۇگىندە ول تاۋلىك بويى جۇمىس ىستەيدى. اسىرەسە, «استانا تازالىق» كاسىپورنىنىڭ جۇمىسى قىزىپ جاتىر دەسەك بولادى. ولار قوعامدىق كولىكتەر جۇرەتىن جولدار مەن جاياۋ جۇرگىنشىلەر وتكەلدەرى جانە الەۋمەتتىك نىساندارعا جاۋاپ بەرەدى. ال ءاربىر اۋلانىڭ ىشىندەگى قاردى پاتەر يەلەرى كووپەراتيۆتەرى تازالاۋ قاجەت. ەكى كۇن بويى قالىڭ قار جاۋعانىن كورىپ وتىرسىزدار. سوندىقتان باستى مىندەتىمىز قوعامدىق كولىكتەر جۇرەتىن جولداعى قاردى تازارتىپ, ولارعا ەشقانداي قيىندىق تۋعىزباۋ قاجەت, – دەدى اسەت ورەنتايۇلى. سونداي-اق, ول «ءبىز قىسقى مەزگىلگە مۇقيات دايىندالدىق. اكىم بولىپ كەلگەلى العاشقى قىس بولسا دا, مەن بۇعان سابىرمەن قارايمىن» دەپ جۋرناليستەرگە كۇلىپ جاۋاپ بەردى.
رەيد بارىسىندا الدىمەن العاشقى توقتاعان بەكەتىمىز سارىارقا اۋدانى بولدى. اۋدان اكىمى ارمان تۇرلىبەك قالا باسشىسىنا قار تازالاۋ شارالارى جوعارعى دەڭگەيدە جۇرگىزىلىپ جاتقانىن باياندادى. «قار قالىڭ جاۋعاننان بەرى ونى تازالاۋ جۇمىستارى ءۇزىلىسسىز جۇرگىزىلۋدە. ول ءۇشىن ەڭبەككەرلەرگە بارلىق جاعداي جاسالدى. تەحنيكالارعا قاجەتتى جانارماي قورى دا جەتكىلىكتى. قار تازالاۋشى ماشينالاردى جول پوليتسيا قىزمەتكەرلەرى الىپ ءجۇر. ارينە, پروبلەما دا جوق ەمەس. كەيبىر بيزنەس وكىلدەرى وزدەرىنىڭ اۋماقتارىنداعى قاردى تازالاۋعا اسىعار ەمەس. سونىڭ اسەرى كوممۋنالدىق قىزمەتكە كەدەرگى كەلتىرىپ وتىر» دەدى ول.
ودان كەيىن ەلوردا باسشىسى رەسپۋبليكا داڭعىلىنىڭ بويىنداعى قار تازالاپ جاتقان تەحنيكالاردىڭ جۇمىسىن قارادى. وسىندا الماتى اۋدانىنىڭ اكىمى ادىلبەك ءسارسەمباەۆ ءوز تەرريتورياسىندا اتقارىلىپ جاتقان جۇمىس جايىندا قىسقاشا ەسەپ بەردى.
– ءدال قازىرگى تاڭدا كوشەدەگى قار تازالاۋ جۇمىستارىنا 450 تەحنيكا تارتىلدى. ودان بولەك, ىشكى تازالاۋعا 140 ادام ءبولىندى. نەگىزگى كۇش رەسپۋبليكا, اباي, تاۋەلسىزدىك, ا.يمانوۆ جانە ش.ءۋاليحانوۆ كوشەلەرىنە ءتۇسىپ تۇر. تاڭعا دەيىن اتالعان كوشەلەر قاردان تازالانىپ تۇرادى, – دەپ ناقتىلاپ ايتىپ ءوتتى. ءوز كەزەگىندە قالا باسشىسى اۋدان اكىمدەرىنە تاعى دا قالاداعى الەۋمەتتىك نىساندارعا جاتاتىن عيماراتتاردىڭ جولدارى قاردان تازالانىپ تۇرۋ كەرەكتىگىن قاتاڭ تاپسىردى.
رەيد اياسىندا ءبىر بايقاعانىمىز, قالا تۇرعىندارى جەكە كولىكتەرىن جول بويىنا قالاي بولسا سولاي قويىپ كەتەدى. ول قار تازالاۋشى تەحنيكالارعا كادىمگىدەي كەدەرگى كەلتىرىپ, ۋاقىتتى دا بوس شىعىنداۋعا جاعداي تۋعىزادى. شارا بارىسىندا وسى ماسەلە دە ايتىلدى. قىسقاسى, استانا اكىمى ەلورداداعى قار تازالاۋ جۇمىستارىن كوزىمەن كورىپ, جۋرناليستەرگە ۇنەمى ونى نازاردا ۇستاپ وتىراتىنىن جەتكىزدى. راسىندا, كەشەدەن بەرى ەلوردادا قالىڭ جاۋعان قاردىڭ ەداۋىر بولىگى تازالانىپ, جولدىڭ بويى ايناداي جارقىراپ قالدى.
ازامات ەسەنجول
