بۇگىندە استانادا 5900-دەن اسا ليفت بار. ولارعا مامانداندىرىلعان 63 ليفت شارۋاشىلىعى ۇيىمى قىزمەت كورسەتەدى. الايدا, ليفتىلەردىڭ ءبارى بىردەي ءوندىرىس قاۋىپسىزدىگى تالاپتارىنا ساي كەلەدى دەۋ قيىن. ارنايى بەلگىلەنگەن تەحنيكالىق نۇسقاۋلىق بويىنشا, جەدەلساتىلاردىڭ قىزمەت كورسەتۋ مەرزىمى 25 جىلدان اسپاۋى ءتيىس.
سوعان قاراماستان ەلوردادا پايدالانۋعا مەرزىمى ءتيىستى ۋاقىتىنان باياعىدا اسىپ كەتكەن ليفتىلەر بارشىلىق. استانا قالالىق تۇرعىن ءۇي ينسپەكتسياسى باسقارماسى كوتەرگىش قۇرىلعىلاردى باقىلاۋ ءبولىمىنىڭ باسشىسى دۋمان جايلىبەكوۆتىڭ ايتۋىنشا, ءبىر كوتەرگىش قۇرالدى اۋىستىرۋعا كوپ قاراجات كەتەدى. ونىڭ سىرتىندا, ليفت شارۋاشىلىعىمەن اينالىساتىن ۇيىمداردىڭ قۇرال-سايماندارى, ماتەريالدى-تەحنيكالىق بازاسى, اپاتتىق جاعدايداعى جەدەل قاۋىپسىزدىك قىزمەتى, قوسالقى بولشەكتەر قورى تالاپقا ساي كەلە بەرمەيدى. وسى ماسەلەگە باسىمدىق بەرەتىن تۇرعىندار دا از, وكىنىشكە قاراي. كوبى تومەن باعاعا قىزمەت كورسەتۋ ۇيىمدارىن ىزدەيدى دەيدى باسقارماداعىلار.
– تومەن باعامەن قىزمەت كورسەتۋشىلەردىڭ ءبىر مىسالى رەتىندە «ازيا ليفتسەرۆيس» جشس-ءىن ايتا الامىن. تۇرعىندار قىزمەتتىڭ ارزاندىعىنا قىزىققان. ءار ليفت ءۇشىن ايىنا 600 تەڭگەگە قىزمەت جاسايدى. وسىلايشا, 2015 جىلدىڭ ماۋسىمىنان باستاپ اتالمىش جشس ءوزىنىڭ جاۋاپكەرشىلىگىنە استاناداعى تۇرعىن ۇيلەردەگى 100-دەن اسا ءليفتىنى الادى. كەيىننەن بىزگە ليفت جۇمىسىنا بايلانىستى شاعىمدار تۇسە باستايدى. تەكسەرىس جۇرگىزدىك. ناتيجەسىندە سەرىكتەستىكتىڭ ليفتىلەردى كۇتىپ-باپتاۋداعى جۇمىسى زاڭنامالىق تالاپتارعا ساي بولماي شىقتى. نە ءوندىرىس بازاسى, نە بىلىكتى ماماندارى دا جوق. ءسويتىپ, وسى جىلدىڭ تامىز ايىندا اتالمىش ۇيىم قاراعان 50 ليفت جارامسىز بولىپ قالدى. از جۇمسايمىز دەگەن تۇرعىندار ەندى قانشاما ەسە كوپ شىعىندالادى. سەبەبى, ليفت قاجەت ەتەتىن جوندەۋ جۇمىستارى تۇرعىنداردىڭ ماقساتتى الىمدارى ارقىلى جۇرگىزىلەدى, – دەيدى دۋمان جايلىبەكوۆ.
ءليفتىنىڭ قىزمەت كورسەتۋ مەرزىمى 25 جىلعا جوبالانعانىن جوعارىدا ايتتىق. بىراق جەدەلساتىنىڭ پروفيلاكتيكالىق جانە جوندەۋ جۇمىستارىنا ءجىتى كوڭىل ءبولىنىپ وتىرسا, بۇل قوندىرعى شيرەك عاسىردان دا ارتىق ءجۇرىپ-تۇرۋى مۇمكىن ەكەن. سوندا ليفت جاعدايىنا الدىمەن كىم كوڭىل ءبولۋى كەرەك؟
– «تۇرعىن ءۇي قاتىناستارى تۋرالى» زاڭى بويىنشا ليفت تۇرعىنداردىڭ ۇجىمدىق مەنشىگى بولىپ تابىلادى. ليفت اۋىستىرۋدى قاجەت ەتسە, پاتەر يەلەرىنە قاراجات جيناپ, جاڭاسىن ورناتۋعا تۋرا كەلەدى. ۇيدەگى قابات سانىنا, ليفت مودەلىنە بايلانىستى بۇعان ورتا ەسەپپەن 6 ملن-نان 11 ملن تەڭگەگە دەيىن قارجى قاجەت, – دەيدى استانا قالاسى تۇرعىن ءۇي ينسپەكتسياسى باسقارماسىنىڭ ءبولىم باسشىسى دۋمان جايلىبەكوۆ. – كوپتەگەن ۇيدەگى ليفتتەردىڭ توزىعى جەتكەن. كوبىنە مونتاج ساپاسىز جاسالعان, نە بولماسا تۇرعىنداردىڭ ءوزى ۇقىپسىز پايدالانادى. ليفت تۇرعىندار مەنشىگى سانالاتىندىقتان, قىزمەت كورسەتۋشى ۇيىمدى دا پاتەر يەلەرى تاڭدايدى.
ءليفتتىڭ ۋاقىتىلى جوندەۋ جۇمىستارى مەن بىلىكتى مامانداردىڭ تەحنيكالىق قىزمەتىن تالاپ ەتەتىن كۇردەلى مەحانيزم ەكەنىن ەسكەرۋ كەرەك. ونىڭ زىرىلداپ جۇمىس ىستەۋى ءۇشىن وعان دەر كەزىندە دۇرىس كۇتىم كورسەتۋ قاجەت.
بۇگىندە استانا قالاسى تۇرعىن ءۇي ينسپەكتسياسى باسقارماسى قالامىزداعى ليفتىلىك ۇيىمداردىڭ زاڭنامالىق تالاپتارىن باقىلاپ, قىزمەت كورسەتۋدىڭ رەيتينگىن جاساپ جاتىر. جوعارىدا ءسوز بولعان ليفت ماسەلەسىنە قاتىستى كەز كەلگەن سۇراق بويىنشا ەلوردا تۇرعىندارى جۇك كوتەرگىش قۇرىلعىلاردى باقىلاۋ ءبولىمىنىڭ 32-13-58 نومىرىنە حابارلاسا الادى.
ءمادينا جاقىپ
