Astana LRT قۇرىلىسىنىڭ جوباسىنا كەتەتىن شىعىندار قايتا قاراستىرىلىپ, ناتيجەسىندە 1,2 ملرد-تاي اقش دوللارى ۇنەمدەلمەك. بۇل تۋرالى شاھار باسشىسى التاي كولگىنوۆ ۇكىمەت وتىرىسىندا مالىمدەدى.
ەلوردا اكىمىنىڭ ايتۋىنشا, جوبانىڭ باستاپقى جوسپارىندا Astana LRT-نى سالۋعا قىتاي دامۋ بانكىنەن قارىز الۋ كوزدەلگەن. ول بويىنشا جوبا قۇنى 1,8 ملرد اقش دوللارىن قۇرادى, ال 20 جىلدان كەيىن ونى 2,6 ملرد اقش دوللارى ەتىپ قايتارۋ كەرەك بولعان. ۇكىمەت تاراپىنان بۇل جوبادان باس تارتىلدى. ياعني قىتايدان قارىز الماي, ەسەسىنە جوباعا ىشكى قارىزدان قارجى جۇمسالادى. ناتيجەسىندە 800 ملن-نان اسا اقش دوللارى نەمەسە 300 ملرد-تان اسا تەڭگە ۇنەمدەلەتىن بولدى.
سونداي-اق التاي كولگىنوۆ مەملەكەت باسشىسىنىڭ تاپسىرماسىنا سايكەس اتالعان جوبانى قايتا وڭتايلاندىرۋ ماقساتىندا باسقا دا شارالاردىڭ قابىلدانعانىن جەتكىزدى.
– الدىمەن قىتاي تاراپىمەن كەلىسىمشارت قۇنىنا سالىقتى قوسۋ تۋرالى كەلىسىمگە كەلۋدى باستادىق. بۇل جۇمىس شىعىندى 200 ملن اقش دوللارىنا نەمەسە 76 ملرد تەڭگەگە دەيىن ازايتۋعا مۇمكىندىك بەرەدى. مۇنىمەن قوسا, «استانا» بانكىنەن 258 ملن دوللار قايتارىلاتىن بولادى. ەكىنشىدەن, قازىرگى ۋاقىتتا جولاۋشىلار اعىنىن ەسكەرە وتىرا, ەگەر العاشقى جوبادا 19 جىلجىمالى قۇرام نەمەسە كولىك قاراستىرىلعان بولسا, ءبىز ونى 12-گە دەيىن قىسقارتۋ مۇمكىندىگىن قاراستىرۋدامىز. ياعني العاشقى ۋاقىتتا جوبا بويىنشا ينتەرۆال 3 مينۋت بولسا, قازىر ءبىز ونى 10 مينۋتقا دەيىن وزگەرتۋدى قاراستىردىق. سونىڭ ناتيجەسىندە 40 ملن اقش دوللارىن نەمەسە 15 ملرد-تان استام تەڭگەنى ۇنەمدەۋگە بولادى. ۇشىنشىدەن, Astana LRT-دا جوسپارلانعان 18 ايالدامانى ءبىز 11-گە دەيىن ازايتامىز. سونىڭ ناتيجەسىندە جەراستى جولى دا قىسقارادى جانە مۇنىڭ ارقاسىندا 110 ملن اقش دوللارى نەمەسە 42 ملرد-تان اسا تەڭگە ۇنەمدەلەدى, – دەدى التاي سەيدىرۇلى.
بۇگىنگى تاڭدا LRT قۇرىلىسىنىڭ جوباسى 1,5 ملرد اقش دوللارىن قۇراپ وتىر. قورىتىندىلاعاندا, جوعارىدا اتالعان بارلىق شارالار جوبانىڭ شىعىنىن 1,2 ملرد اقش دوللارىنا دەيىن وڭتايلاندىرۋعا سەپتىگىن تيگىزەدى. ونىڭ 800 ملن-ى – قارىزدان باس تارتۋ ەسەبىنەن, قالعان 350 ملن-عا جۋىق قاراجات قۇرىلىس-مونتاج جۇمىستارى ەسەبىنەن ۇنەمدەلەدى.
قالا اكىمىنىڭ مالىمدەۋىنشە, «ءابۋ دابي پلازا» كەشەنىنەن اۋە رەيستەرىنە تىركەۋدەن ءوتىپ, اەروۆوكزال قاعيداسى سياقتى جولاۋشىلاردىڭ LRT-مەن اۋەجايعا تىكەلەي بارۋ مۇمكىندىگى قاراستىرىلىپ جاتىر. بۇل جۇيەنى «نۇرلى جول» جانە ەكسپو ستانسالارىندا دا پايدالانۋعا بولادى.
ايتا كەتۋ كەرەك, Astana LRT بۇرىنعى باسشىسى تالعات اردانعا حالىقارالىق ىزدەۋ جاريالاندى. كومپانيانىڭ قازىرگى باسشىسى ەرجان يگەنبەرديەۆتىڭ حابارلاۋىنشا, سىبايلاس جەمقورلىققا قارسى ءىس-قيمىل اگەنتتىگى ەكس-باسشىعا قاتىستى قىلمىستىق ءىس قوزعادى. بۇگىندە ونى قاماۋعا الۋ تۋرالى قولداۋحات بار. ەندى وسى ماسەلەمەن ينتەرپول ۇيىمى اينالىسىپ جاتىر.
ەستەرىڭىزگە سالساق, وتكەن جىلى تالعات اردانعا قىزمەتتىك وكىلەتتىگىن تەرىس پايدالاندى دەگەن ايىپ تاعىلعان ەدى. تەرگەۋ ماتەريالدارىنا سايكەس, ءتورت جىل بۇرىن استانا LRT-نىڭ بيۋدجەتتىك قاراجاتىنان مەردىگەر ءبىر كومپانياعا 300 ميلليون تەڭگە اۋدارىلعاندا, ليميتتەن 125 ميلليون تەڭگەگە ارتىق بولعانى انىقتالعان.
