نۇر-سۇلتان قالالىق ءماسليحاتتىڭ دەپۋتاتتىعىنا ۇمىتكەرلەر, Nur Otan پارتياسىنىڭ مۇشەلەرى حانزادا بالتاەۆا مەن قانات الين ونەر جانە مادەنيەت سالاسىنىڭ ادامدارىمەن Zoom فورماتىندا كەزدەسۋ وتكىزىپ, ونەر, مادەنيەت جانە سپورت سالاسىنا قاتىستى ماسەلەلەردى تالقىلادى.
«حالىقارالىق جاھاندىق ايەلدەر كوشباسشىلىعى» قوعامدىق بىرلەستىگىنىڭ باسشىسى حانزادا بالتاەۆا ءوزى باسقاراتىن بىرلەستىكتىڭ جۇمىسىنا شولۋ جاساپ, قوعام دامۋىنا ۇلەس قوسىپ جاتقانى تۋراسىندا ايتتى. «وتكەن جىلى قازاقستان مەن اراب ەلدەرى اراسىندا مادەني بايلانىس ورناتتىق. الىس-جاقىن شەت ەلدەردە, مىسالى, وزبەكستان, رەسەي, تاجىكستاننىڭ ۇكىمەتتىك ەمەس ۇيىمدارىمەن كەلىسسوزدەر جۇرگىزىپ, ايەلدەردى قولداۋعا بايلانىستى كوپتەگەن جۇمىستار جاسالدى. ولارمەن تاجىريبە الماستىق. سونىمەن بىرگە زاماناۋي كىتاپحانالار جاساقتاۋعا, مۋزەيلەر جۇمىسىن ناسيحاتتاۋعا بايلانىستى كوپتەگەن شارالار وتكىزدىك. بۇل حالىقتاردى ءوزارا ىنتىماقتاستىققا شاقىرادى. مەنىڭ ويىمشا, بۇل – تەك مەملەكەتتىڭ عانا ەمەس, ۇكىمەتتىك ەمەس ۇيىمداردىڭ, سونىمەن بىرگە ازاماتتاردىڭ دا مىندەتى. ءبىزدى تولعاندىراتىن ماسەلە كوپ. ايتالىق, قولونەرشىلەردىڭ ونەرىن ناسيحاتتاۋ, ءوزارا ساباقتاستىعىن جالعاستىرۋ باعىتىندا فەستيۆالدەر ۇيىمداستىرۋ دا ويىمىزدا بار» دەدى ول.
مەملەكەتتىك فيلارمونيا ديريجەرى نۇرلان بەكەنوۆ بالالاردى مادەنيەتكە باۋلۋدا ناقتى ىستەر كەرەگىن ايتتى. وقۋشىلار سارايىنان بىرنەشە بولمە ءبولىپ, بالالاردى سويلەۋ مادەنيەتى مەن مۋزىكاعا باۋليتىن ورىندار, «ءال-فارابي جولىمەن» دەپ اتالاتىن ريتوريكاعا قاتىستى ۇيىرمەلەر اشۋدى قولعا الۋ تۋرالى ۇسىنىس ءبىلدىردى.
قر گرەپپلينگ قاۋىمداستىعىنىڭ پرەزيدەنتى, گرەپپلينگ جانە دجيۋ-دجيتسۋدان الەم چەمپيونى قانات الين بۇقارالىق سپورتتى دامىتۋ, ونىڭ قولجەتىمدى بولۋى تۋرالى ويلارىمەن ءبولىستى. «ءبىزدىڭ ەلدە سپورتتى مەملەكەت قارجىلاندىرادى. سونىمەن قاتار, قازاقستاندا جەكە كاپيتالدى پايدالانۋدا جۇيەلىك ءتاسىل جوق, بۇل سپورتتىق شارالاردى قارجىلاندىرۋدىڭ جالپى كولەمىنەن كورىنەدى. بولىنگەن بيۋدجەتتىڭ كوپ بولىگى كاسىبي سپورتقا تيەسىلى» دەدى ول.
