«استانا وپەرا» تەاترىندا جاڭا جوبانىڭ شىمىلدىعى ءتۇرىلىپ, العاشقى كەش تەاتردىڭ باس ديريجەرى, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى
الان بورىباەۆتىڭ «مولەر, ۆولتەر جانە بومارشە نەمەسە فرانتسۋز كومەدياسىنىڭ نەگىزىن سالۋشىلار» اتتى وپەرالىق-سيمفونيالىق كونتسەرتپەن باستالدى.
جوبانىڭ وزگەشەلىگى – كونتسەرتتە جان-باتيست مولەردىڭ «توعىشار» كومەدياسى ەركىن وقىلىپ, ماەسترونىڭ ءوزى جاساعان مونولوگ نۇسقاسى ريحارد شتراۋستىڭ وسى شىعارماعا ارناپ جازعان مۋزىكاسىنان سيۋيتامەن بىرگە شىرقالدى. ءار جىلدارى اتالعان پەساداعى مۋزىكا مەن درامانىڭ ءساتتى ۇيلەسىمىن الان بورىباەۆ بالتيمور (اقش), دۋبلين (يرلانديا), ماينينگەندە (گەرمانيا) ۇسىنىپ, ونەرسۇيەر قاۋىمنىڭ زور قىزىعۋشىلىعىن تۋدىرعان ەدى.
مۋزىكالىق مونولوگتىڭ نەگىزگى قاھارمانى مولەردىڭ كەيىپكەرى جۋردەن مىرزا ەكەنىن ايتساق, الان بورىباەۆ ونى كۇلكىلى, سۇيكىمدى جانە اڭقىلداق ءارى پاڭ مىنەزدى ادام رەتىندە بەينەلەي بىلگەن. مولەردىڭ قولتاڭباسىن ساقتاپ قالعان. بارلىق وقيعا وسىنىڭ اينالاسىندا ءوربيدى. جۋردەن مىرزانى وركەستر مۋزىكانتى اسەت نەلدىباەۆ ءساتتى سومدادى.
كەشتىڭ كوركىن قىزدىرعان قازاقستاننىڭ ەڭبەك سىڭىرگەن قايراتكەرلەرى تالعات مۇساباەۆ, ايگۇل نيازوۆا, باشقۇرتستان رەسپۋبليكاسىنىڭ ەڭبەك سىڭىرگەن ءارتىسى الفيا كاريموۆا, «قۇرمەت» وردەنىنىڭ كاۆالەرى
ايزادا قاپونوۆا, حالىقارالىق بايقاۋلاردىڭ لاۋرەاتتارى تالعات عالەەۆ, ەۆگەني چاينيكوۆ, گۇلجانات ساپاقوۆا, ەرجان سايىپوۆ, شىڭعىس راسىلحان, ەرۇلان كامەل جانە تاعى باسقا تالانتتى ونەرپازداردىڭ ونەرى ەشكىمدى دە بەي-جاي قالدىرمادى. اياققا قۇيعان استاي, جىپ-جيناقى وتكەن كونتسەرتتىڭ رەجيسسەرى ەرەنباق تويكەنوۆتىڭ دە ەڭبەگىن ەرەكشە ايتىپ وتكەن ءجون.
