ماگيستراتۋرا مەن دوكتورانتۋراعا تۇسۋشىلەرگە ەكىنشى مۇمكىندىك تۋدى. كەشەندى تەستىلەۋگە قۇجات قابىلداۋ 1 قاراشادا باستالدى.
بۇدان بىلاي وقۋعا قابىلداۋ جىلىنا ەكى رەت وتكىزىلەدى. بايقاۋعا جازدا گرانتقا تۇسە الماعان ۇمىتكەرلەر دە, بۇرىن كەشەندى تەستىلەۋدەن وتپەگەندەر دە قاتىسا الادى.
ەڭ اۋەلى ەكىنشى كەشەندى تەستىلەۋگە قاتىسۋ ءۇشىن تىركەلۋ ۇلتتىق تەستىلەۋ ورتالىعىنىڭ app.testcenter.kz سايتىندا وتەدى. قۇجات قابىلداۋ 2021 جىلدىڭ 1-15 قاراشاسى ارالىعىندا جۇرگىزىلەدى. كەشەندى تەستىلەۋ 2021 جىلدىڭ 18 قاراشاسىنان 11 جەلتوقسانىنا دەيىن جالعاسادى.
ماگيستراتۋراعا گرانتقا ۇمىتكەرلەر ءداستۇرلى تۇردە شەت ءتىلى, ءبىلىم بەرۋ باعدارلامالارى توبىنىڭ بەيىنى جانە وقۋعا دايىندىعىن انىقتاۋ بويىنشا تەست تاپسىرادى. شەت ءتىلىن مەڭگەرگەنىن راستايتىن حالىقارالىق سەرتيفيكاتى بار ادامدار اۆتوماتتى تۇردە شەت ءتىلى بويىنشا تەستىلەۋدەن بوساتىلادى. تەست ناتيجەلەرىن تەستىلەۋ اياقتالعاننان كەيىن بىردەن بىلۋگە بولادى. ناتيجەلەرىمەن كەلىسپەگەن جاعدايدا قاتىسۋشىلار ەمتيحان اياقتالعان سوڭ, 30 مينۋتتان كەيىن ونلاين-اپەللياتسياعا ءوتىنىش بەرە الادى.
مەملەكەتتىك ءبىلىم بەرۋ تاپسىرىسى بويىنشا جانە اقىلى نەگىزدە عىلىمي-پەداگوگيكالىق ماگيستراتۋراعا ءتۇسۋ ءۇشىن شەكتى بالل – 75, بەيىندى ماگيستراتۋراعا ءتۇسۋ ءۇشىن 50 بالدى قۇرايدى.
ءبىلىم بەرۋ گرانتتارىن تاعايىنداۋ كونكۋرسىنا قاتىسۋ ءۇشىن قۇجاتتار بيىل 25 جەلتوقسانعا دەيىن قابىلدانادى. ماگيستراتۋراعا قابىلداۋ 2021 جىلعى 26 جەلتوقسان مەن 10 قاڭتار ارالىعىندا وتەدى.
ماگيستراتۋراعا تۇسۋشىلەر بارلىعى 3 مىڭنان اسا مەملەكەتتىك ءبىلىم گرانتىنا ۇمىتكەر بولا الادى. ماماندىقتار بولىنىسىندە ەڭ كوپ گرانت «حيميا» (172 گرانت), «ۆەتەريناريا» (169), «مەحانيكا جانە مەتالل وڭدەۋ» (156), «مەتاللۋرگيالىق ينجەنەريا» (137), «قۇرىلىس ماتەريالدارىن, بۇيىمدارىن مەن كونسترۋكتسيالارىن ءوندىرۋ» (132 گرانت), «ماتەريالتانۋ جانە جاڭا ماتەريالدار تەحنولوگياسى» (130) جانە باسقا ماماندىقتار بويىنشا بولىنگەن.
بيىل دوكتورانتۋراعا ءتۇسۋ ەرەجەلەرىنە وزگەرىستەر ەنگىزىلگەن ەدى. ەندى دوكتورانتۋراعا قابىلداۋ «1 تالاپكەر – 1 كومپيۋتەر – 1 كامەرا» قاعيداتى بويىنشا وڭىرلىك تەستىلەۋ ورتالىقتارىندا ەلەكتروندى فورماتتا وتەتىن ءتۇسۋ ەمتيحانىنىڭ ناتيجەلەرى بويىنشا جۇزەگە اسىرىلادى. بۇل ەمتيحان تاپسىرۋ كەزىندە اشىقتىقتى جانە ترانسپارەنتتىلىكتى قامتاماسىز ەتۋگە باعىتتالعان.
ءبىلىم جانە عىلىم مينيسترلىگىنىڭ مالىمدەۋىنشە, قابىلداۋ ەمتيحانى ەسسە جازۋ, دوكتورانتۋرادا وقۋعا دايىندىق تەستىلەۋى جانە ءبىلىم بەرۋ باعدارلاماسى توبىنىڭ بەيىنى بويىنشا ەمتيحانداردان تۇرادى.
ەكىنشى رەت وتكىزىلەتىن دوكتورانتۋراعا ءتۇسۋ ەمتيحانىنا قاتىسۋ ءۇشىن دە سول ۇلتتىق تەستىلەۋ ورتالىعىنىڭ app.testcenter.kz سايتىندا تىركەلۋ كەرەك. مۇندا دا ماگيستراتۋراداعىداي قابىلداۋ ەمتيحانى 2021 جىلدىڭ 18 قاراشاسى مەن 11 جەلتوقسانى ارالىعىندا, وقۋعا قابىلداۋ 2021 جىلعى 26 جەلتوقسان مەن 10 قاڭتار ارالىعىندا وتەدى. ايتا كەتەيىك, مەملەكەتتىك ءبىلىم بەرۋ تاپسىرىسى بويىنشا جانە اقىلى نەگىزدە وقۋعا ءتۇسۋ ءۇشىن ءوتۋ بالى 75 بالدى قۇرايدى.
