9-10 قازان كۇندەرى بەيبىتشىلىك جانە كەلىسىم سارايىندا «Astana Musical» تەاترىنىڭ كەزەكتى پرەمەراسى كورەرمەندەرگە جول تارتادى. «استانا – مەنىڭ ماحابباتىم» اتالاتىن بۇل تۋىندى ليبرەتتوسىنىڭ اۆتورلارىى – قازاقستاننىڭ ەڭبەك سىڭىرگەن قايراتكەرى باقىت قايىربەكوۆ جانە ارتۋر ورەنبۋرگسكي. قويۋشى رەجيسسەرى – اسحات ماەميروۆ.. ميۋزيكل بارىسىندا اباي قۇنانبايۇلى, ارىستانبەك مۇحامەديۇلى, اقتوتى رايىمقۇلوۆا, قايرات باەكەنوۆ جانە حاميت شاڭعاليەۆتىڭ شىعارمالارى ورىندالادى.
«جاڭا ميۋزيكلدە ەلوردانىڭ كەلبەتى كورىنىپ, استانا – ارمانداردىڭ ورىندالىپ, ۇكىلى ءۇمىتتەردىڭ اقتالاتىن قالاسى رەتىندە سيپاتتالادى. اسىرەسە, «ءبايتەرەكتىڭ» قاسيەتىن, كيەسىن اشىپ كورسەتكىمىز كەلىپ وتىر. ياعني, «بايتەرەككە» شىن نيەتىمەن الاقانىن جايىپ كەلگەن ادامنىڭ تىلەگى قابىل بولاتىنىن اشقىمىز كەلەدى» دەيدى رەجيسسەر.
ونىڭ ايتۋىنشا, شىعارمانىڭ جەلىسى بىلايشا تارقاتىلادى: ءوتكەن عاسىردىڭ وتىزىنشى جىلدارداعى اشتىق كەزىندە جەر اۋىپ كەتكەن جاس بالا كەيىن اقساقالعا اينالادى. فرانتسيادا تۇراتىن ول جانار اتتى نەمەرەسىن اتامەكەنىنە جىبەرەدى. جانار استاناعا كەلىپ, انشىلەردىڭ حالىقارالىق بايقاۋىنا قاتىسادى. جەڭىمپاز اتانىپ, وسى جەردە نۇرجان دەگەن ءوزىنىڭ ماحابباتىن كەزدەستىرەدى. جاناردىڭ ماحابباتى جولى بولماي, ماماندىعىن انىقتاي الماي جۇرگەن جىگىتتى وزگەرتەدى. سودان نۇرجاندا ناعىز قازاق جىگىتىنە ءتان بۇكىل قاسيەتتەر اشىلا تۇسەدى, ول ءوزىن قالاي تۇلعاعا اينالىپ كەتكەنىن دە اڭعارماي قالادى.
بۇل قويىلىمدا ەكى جاستىڭ ماحابباتى ارقاۋ ەتىلىپ, سول ارقىلى ۇلتىمىزدىڭ بويىندا ساقتالعان وتباسىلىق قۇندىلىقتار ناسيحاتتالماق. شىعارماداعى جاناردىڭ: «ەيفەل مۇناراسىنىڭ قاسىندا ءجۇرىپ, پاريج عانا ماحاببات قالاسى دەپ ويلايتىنبىز. سويتسەك, ماحابباتتىڭ شىنايى مەكەنى, عاشىقتاردىڭ ولكەسى – استانا ەكەن عوي» دەگەن ءسوزى استانا اتىن اسقاقتاتۋعا عانا باعىتتالماي, كورەرمەندەردى ويلاندىرۋ ءۇشىن قوسىلعان.
امانعالي قالجانوۆ
